استانا ەكونوميكالىق فورۋمى

ول بيىل دا ايگىلىلەردىڭ باسىن قوسپاق پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماليحاتىندا الداعى 24-26 مامىردا وتەتىن استانا ەكونوميكالىق فو­رۋمى تۋرالى ايتىلدى. وعان «ەكونو­ميكا­لىق زەرتتەۋلەر ينستيتۋتى» اق باس­قارما توراعاسى اسەت ەرعاليەۆ قاتىستى. «اەف-تىڭ باستى تاقىرىبى – «جاڭا ەكونوميكالىق اقيقات: ءارتاراپتاندىرۋ, يننوۆا­تسيا­لار جانە ءبىلىم ەكونوميكاسى». اتالمىش تاقىرىپ شەڭبەرىندە الەمدىك ەكونوميكانى دامىتۋدىڭ نەگىزگى ۇردىستەرى مەن سىن-تەگەۋ­رىن­دەرى, سونىمەن قاتار, جاڭا ەكونو­ميكالىق اقيقات داۋىرىندە ۇزاق مەرزىمدى ەكونوميكالىق وسۋمەن قامتاماسىز ەتۋ ماسە­لەلەرى تالقىلانادى», دەدى ءا.ەر­عاليەۆ. ونىڭ ايتۋىنشا, فورۋم جاھاندىق ەكونوميكانى ورنىق­تى دامىتۋدىڭ سىن-تەگەۋرىن­دەرى مەن تاۋەكەلدەرىن, الەمدىك قارجى-ەكونوميكالىق جۇيەنىڭ قازىرگى ماسەلەلەرىن شەشۋ جول­دارىن تالقىلاۋ ءۇشىن جەتەكشى حالىق­ارالىق ساراپشىلار, بيزنەس پەن مەملەكەت وكىلدەرىنىڭ ۇلكەن توبىن بىرىكتىرەتىن اۋقىمدى الاڭ بولىپ تابىلادى. جىل سايىنعى استانا ەكونو­ميكا­لىق فورۋمى قازاقستان رەس­­­پۋب­­­ليكاسىنىڭ پرەزيدەنتى نۇر­سۇل­تان نازارباەۆتىڭ باستا­ماسى بو­يىنشا وتكىزىلىپ كەلەدى. فورۋم بيىل توعىزىنشى مارتە وتكىزىلمەك. بيىلعى جىلى دا وعان ادەتتەگى­دەي بيزنەس جانە ساراپتاۋ قاۋىمداس­تىق­تارىنىڭ الەمگە تانىمال وكىلدەرى, ءىرى قارجىلىق قۇرىلىمداردىڭ جەتەكشىلەرى, حالىقارالىق ۇيىمداردىڭ باسشىلارى, نوبەل سىيلىعىنىڭ لاۋرەاتتارى قاتىسادى دەپ كۇتىلۋدە. ولاردىڭ قاتارىندا عالامتور-كوممەرتسيا سالا­سىندا قىتايلىق AliBaba Group كومپا­نياسىنىڭ نەگىزىن قالاۋشى دجەك ما, حۆق باسقارۋشى-ديرەكتورى كريستين لاگارد, ەقدب پرەزيدەنتى سۋما چاكرابارتي, بريتاندىق «The Economist» جۋرنالىنىڭ نۇسقاسى بويىنشا الەمدەگى ەڭ بەدەلدى ەكونوميستەردىڭ ۇشتىگىنە كىرەتىن كولۋمبيا ۋنيۆەرسيتەتى جەر ينستيتۋتىنىڭ ديرەكتورى دجەففري ساكس, ماسساچۋسەتس تەحنولوگيالىق ينستيتۋتىننىڭ ەكونوميكا پروفەسسورى, «Why Nations Fail: The Origins of Power, Prosperity, and Poverty» الەمدىك بەستسەللەرىنىڭ اۆتورى دارون ادجەموگلۋ, اقش-تىڭ بۇرىنعى پرەزيدەنتى رونالد رەيگاننىڭ جانە ۇلىبريتانيا پرەمەر-ءمينيسترى مارگارەت تەتچەردىڭ بۇرىنعى كەڭەسشىسى ارتۋر لاففەر, لەونتەۆ سىيلىعىنىڭ لاۋرەاتى حا-دجۋن چانگ, «ۆاليۋتالىق سوعىستار» بەستسەللەرىنىڭ اۆتورى سۋن حۋنبين, سونداي-اق, ەكونو­ميكا سالاسى بويىنشا نوبەل سىيلىعىنىڭ لاۋرەاتتارى ەدۆارد پرەسكوتت, كريستوفەر پيسساريدەس پەن توماس ساردجەنت بار. «بيىلعى جىلى پلەنارلىق وتىرىس نەگىزگى شارادان العاش رەت جەكەلەي «قازاقستان» ورتالىق كونتسەرت زالىندا وتكىزىلمەك. ال فورۋم اياسىنداعى باسقا جيىندار بۇرىنعىداي تاۋەلسىزدىك سارايىندا بولادى. فورۋم شەڭبەرىندە 20-عا جۋىق ءىس-شارا جوسپارلانعان. ونىڭ قاتارىندا دۇنيەجۇزىنە تانىمال «The Economist» حالىقارالىق بەدەلدى جۋرنالىمەن بىرلەسە ۇيىمداستىرىلاتىن قازاقستان ينۆەستيتسيالىق ءسامميتىن, بواو ازيالىق فورۋمى حاتشىلىعىمەن بىرلەسە ۇيىمداستىرىلاتىن ۇلى جىبەك جولى ەلدەرىنىڭ فورۋمىن, «The Financial Times» حالىقارالىق بەدەلدى باسىلىمىمەن بىرلەسە وتكىزىلەتىن جەكەشەلەندىرۋ ءجونىن­دەگى قازاقستان فورۋمىن ايرىق­شا اتاپ وتۋگە بولادى, دەدى «ەكو­نوميكالىق زەرتتەۋلەر ينستيتۋتى» اق باسقارما توراعاسى. سونداي-اق, ول اەف-2016 قارساڭىندا 24 مامىر كۇنى حۆق باسقارۋشى-ديرەكتورى كريستين لاگارد جانە ورتالىق ازيا, كاۆكاز جانە ەاەو-عا مۇشە ەلدەر ۇكى­مەتتەرىنىڭ قاتىسۋىمەن حۆق ايماقتىق فورۋمى وتەتىندىگىن جەتكىزدى. سونىمەن قاتار, فورۋم اياقتالعان سوڭ, كەلەسى كۇنى قازاقستان رەس­پۋب­ليكاسى پرەزيدەنتىنىڭ جانىنداعى شە­تەل ينۆەستورلارى كەڭە­سىنىڭ 29-شى پلە­نارلىق وتىرىسى وتكى­زىل­مەك. استانا ەكونوميكالىق فورۋمى شەڭبەرىندە ەكونوميكالىق تاقىرىپتار بويىنشا نەگىزگى سپيكەرلەردىڭ دارىستەر وتكىزۋى, قاتىسۋشىلار ءۇشىن Blockchain تەحنولوگياسىن قولدانۋ بويىنشا ۆوركشوپتار سەرياسى, بيزنەس-گۋرۋ جانە جەتەكشى الەمدىك ساراپ­شىلاردان نەتۆوركينگتەر, شەبەرلىك ساباقتارىن وتكىزۋ جوسپارلانۋدا, سونداي-اق, قازاق­ستان­دىق جوعارى وقۋ ورىندارىنىڭ ستۋ­دەنتتەرىنە ارنالعان بىرقاتار ءىس-شارالار ۇيىمداستىرىلادى. ال ەىدۇ, بۇۇ, دۇنيەجۇزىلىك بانك, ادب, ەقدب سەكىلدى حالىقارالىق ۇيىمدار مەن قارجى ينستيتۋتتارى فورۋمنىڭ سەرىكتەستەرى بولىپ سانالادى. دينارا بىتىكوۆا, «ەگەمەن قازاقستان»