قازاقستان رەسپۋبليكاسى ەنەرگەتيكا مينيسترلىگىنىڭ بۇيرىعى №144 

2015 جىلعى 25 اقپان, استانا قالاسى قورشاعان ورتانى قورعاۋ سالاسىنداعى جوبالاردىڭ اشىق كونكۋرستارىن وتكىزۋ قاعيدالارىن بەكىتۋ تۋرالى قازاقستان رەسپۋبليكاسىنىڭ 2007 جىلعى 9 قاڭتارداعى ەكولوگيالىق كودەكسىنىڭ 17-بابىنىڭ 38-8) تارماقشاسىنا سايكەس بۇيىرامىن: 1. قوسا بەرىلىپ وتىرعان قورشاعان ورتانى قورعاۋ سالاسىنداعى جوبالاردىڭ اشىق كونكۋرستارىن وتكىزۋ قاعيدالارى بەكىتىلسىن. 2. قازاقستان رەسپۋبليكاسى ەنەرگەتيكا مينيسترلىگىنىڭ ەكولوگيالىق مونيتورينگ جانە اقپارات دەپارتامەنتى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن: 1) قازاقستان رەسپۋبليكاسىنىڭ ادىلەت مينيسترلىگىندە وسى بۇيرىقتىڭ مەملەكەتتىك تىركەلۋىن; 2) وسى بۇيرىق قازاقستان رەسپۋبليكاسىنىڭ ادىلەت مينيسترلىگىندە مەملەكەتتىك تىركەلگەنىنەن كەيىن ونىڭ كوشىرمەسىن كۇنتىزبەلىك ون كۇن ىشىندە مەرزىمدى ءباسپاسوز باسىلىمداردا جانە «ادىلەت» اقپاراتتىق-قۇقىقتىق جۇيەسىندە رەسمي جاريالاۋعا جولدانۋىن; 3) وسى بۇيرىقتىڭ قازاقستان رەسپۋبليكاسى ەنەرگەتيكا مينيسترلىگىنىڭ رەسمي ينتەرنەت-رەسۋرسىندا جانە مەملەكەتتىك ورگانداردىڭ ينترانەت-پورتالىندا ورنالاستىرۋىن; 4) وسى بۇيرىقتى قازاقستان رەسپۋبليكاسى ادىلەت مينيسترلىگىندە مەملەكەتتىك تىركەگەننەن كەيىن ون جۇمىس كۇنى ىشىندە قازاقستان رەسپۋبليكاسى ەنەرگەتيكا مينيسترلىگىنىڭ زاڭ قىزمەتى دەپارتامەنتىنە وسى تارماقتىڭ 2) جانە 3) تارماقشالارىمەن كوزدەلگەن ءىس-شارالاردىڭ ورىندالۋى تۋرالى مالىمەتتەردى ۇسىنۋدى قامتاماسىز ەتسىن. 3. وسى بۇيرىقتىڭ ورىندالۋىن باقىلاۋ جەتەكشىلىك ەتەتىن قازاقستان رەسپۋبليكاسىنىڭ ەنەرگەتيكا ۆيتسە-مينيسترىنە جۇكتەلسىن. 4. وسى بۇيرىق العاشقى رەسمي جاريالانعانىنان كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى. مينيستر ۆ.شكولنيك قازاقستان رەسپۋبليكاسى ەنەرگەتيكا ءمينيسترىنىڭ 2015 جىلعى 25 اقپانداعى №144 بۇيرىعىمەن بەكىتىلگەن قورشاعان ورتانى قورعاۋ سالاسىنداعى جوبالاردىڭ اشىق كونكۋرستارىن وتكىزۋ قاعيدالارى 1. جالپى ەرەجەلەر 1. وسى قورشاعان ورتانى قورعاۋ سالاسىنداعى جوبالاردىڭ اشىق كونكۋرستارىن وتكىزۋ قاعيدالارى (بۇدان ءارى – قاعيدالار) 2007 جىلعى 9 قاڭتارداعى قازاقستان رەسپۋبليكاسى ەكولوگيالىق كودەكسىنىڭ 17-بابىنىڭ 38-8) تارماقشاسىنا سايكەس ازىرلەنگەن جانە قورشاعان ورتانى قورعاۋ سالاسىنداعى جوبالاردىڭ اشىق كونكۋرستارىن وتكىزۋ ءتارتىبىن ايقىندايدى. 2. وسى قاعيدالاردا مىناداي ۇعىمدار پايدالانىلادى: 1) قورشاعان ورتانى قورعاۋ سالاسىنداعى جوبا – قورشاعان ورتانى قورعاۋ سالاسىنداعى بەلگىلى ءبىر ماقساتقا (ماقساتتارعا) جەتۋگە باعىتتالعان جوسپارلانعان ءىس-شارا; 2) قورشاعان ورتانى قورعاۋ سالاسىنداعى باسىمدىقتار – شۇعىل پراكتيكالىق جۇزەگە اسۋ ءۇشىن نەعۇرلىم ماڭىزدى دەپ تانىلعان قورشاعان ورتانى قورعاۋ جونىندەگى قىزمەتتىڭ باعىتتارى. 3. ەكولوگيالىق باعدارلامالاردى ازىرلەۋ ءۇشىن قورشاعان ورتانى قورعاۋ سالاسىنداعى ۋاكىلەتتى ورگان نە جەرگىلىكتى اتقارۋشى ورگاندار قورشاعان ورتانى قورعاۋ سالاسىنداعى جوبالاردىڭ (بۇدان ءارى – جوبالار) اشىق كونكۋرستارىن وتكىزۋ جولىمەن قورشاعان ورتانى قورعاۋ جونىندەگى جوبالاردى ىرىكتەۋدى جۇرگىزەدى. 2. قورشاعان ورتانى قورعاۋ سالاسىنداعى جوبالاردىڭ اشىق كونكۋرستارىن وتكىزۋ ءتارتىبى 4. جوبالاردىڭ اشىق كونكۋرسىنىڭ پروتسەسى مىناداي كەزەڭدەردەن تۇرادى: 1) كونكۋرستىڭ شارتتارىن بەكىتۋ; 2) كونكۋرستىق كوميسسيا قۇرۋ; 3) قازاقستان رەسپۋبليكاسىنىڭ بۇكىل اۋماعىنا تاراتىلاتىن مەرزىمدى باسپا باسىلىمىندا حابارلاندىرۋ جاريالاۋ; 4) جوبالاردى قاراۋ جانە باعالاۋ; 5) كونكۋرستىڭ قورىتىندىلارىنىڭ حاتتاماسىنا قول قويۋ. 5.ءار جوبا ءۇشىن كونكۋرستىڭ شارتتارىن قورشاعان ورتانى قورعاۋ سالاسىنداعى ۋاكىلەتتى ورگان نە جەرگىلىكتى اتقارۋشى ورگاندار (بۇدان ءارى – كونكۋرستى ۇيىمداستىرۋشى) بەكىتەدى. كونكۋرستىڭ شارتتارى جوبالاردىڭ ماقساتتارىن, مەرزىمدەرىن جانە ىسكە اسىرۋ شارتتارىن قامتيتىن جوبالارعا قويىلاتىن تالاپتاردان تۇرادى. 6. كونكۋرستى ۇيىمداستىرۋشى سانى كەمىندە جەتى ادامنان كونكۋرستىق كوميسسيا قۇرادى. كونكۋرستىق كوميسسيا توراعادان, كوميسسيا مۇشەلەرىنەن جانە حاتشىدان تۇرادى. 7. جوبالاردىڭ اشىق كونكۋرسىن وتكىزۋ تۋرالى حابارلاندىرۋدا مىنا مالىمەتتەر بولۋعا ءتيىس: 1) كونكۋرستى ۇيىمداستىرۋشىنىڭ اتاۋى جانە ورنالاسقان جەرى; 2) كونكۋرستى وتكىزۋ شارتتارى. 8. اشىق كونكۋرس وتكىزۋ تۋرالى حابارلاندىرۋ كونكۋرسقا قاتىسۋعا كونكۋرستىق ۇسىنىستاردى قابىلداۋ كۇنىنە دەيىن وتىز كۇنتىزبەلىك كۇننەن كەشىكتىرمەي قازاقستان رەسپۋبليكاسىنىڭ بۇكىل اۋماعىنا تاراتىلاتىن مەرزىمدى باسپا باسىلىمىندا مەملەكەتتىك جانە ورىس تىلدەرىندە جاريالانادى. حابارلاندىرۋلار ءبىر مەزگىلدە كونكۋرستى ۇيىمداستىرۋشىنىڭ ينتەرنەت-رەسۋرسىندا ورنالاستىرىلادى. 9. كونكۋرستىق كوميسسيا جوبالارى بار كونۆەرتتەردى جوبالاردىڭ اشىق كونكۋرسىن وتكىزۋ تۋرالى حابارلاندىرۋدا كورسەتىلگەن مەرزىمدە جانە ورىندا اشادى. جوبانى ۇسىنعان ۇيىمنىڭ وكىلى جوبالارى بار كونۆەرتتەردى اشقان كەزدە قاتىسادى. 10. جوبالارى بار كونۆەرتتەردى اشقان كەزدە كونكۋرستىق كوميسسيا قاتىسۋشى تۇلعالارعا كونكۋرسقا قاتىسۋشى ۇيىمداردىڭ اتاۋلارى مەن ورنالاسقان جەرلەرىن جانە ۇسىنىلعان جوبالاردىڭ اتاۋلارىن حابارلايدى. 11. كونكۋرستىق كوميسسيا كونكۋرستى وتكىزۋ قورىتىندىلارى بويىنشا وسى قاعيدالارعا قوسىمشادا كورسەتىلگەن كريتەريلەر نەگىزىندە كونكۋرسقا ۇسىنىلعان جوبالاردى قارايدى. كونكۋرستىق جوبالاردى باعالاۋ ءاربىر كريتەري بويىنشا باللداردى قوسۋ جولىمەن جۇرگىزىلەدى. ەكى نەمەسە بىرنەشە جوبالىق ۇسىنىستاردىڭ جيىنتىق باللدارى تەڭ بولعان جاعدايدا, از بولجامدى قۇندى ۇسىنىپ وتىرعان جوباعا ىقىلاس بەرىلەدى. 12. كونكۋرستىق ۇسىنىستاردى باعالاۋدى كونكۋرستىق كوميسسيا كونۆەرت اشىلعان كۇننەن باستاپ ون بەس جۇمىس كۇنى ىشىندە وتكىزەدى. 13. كونكۋرس مىناداي جاعدايلاردا: 1) ەگەر كونكۋرسقا كونكۋرس تالاپتارىنا سايكەس كەلەتىن بىردە-ءبىر جوبا ۇسىنىلماعان بولسا; 2) ەگەر قاراۋ ناتيجەلەرى بويىنشا بارلىق ۇسىنىلعان جوبالار تيىمدىلىگى از دەپ باعالانسا وتكىزىلمەدى دەپ تانىلادى. 14. كونكۋرس وتپەدى دەپ تانىلعان جاعدايدا كونكۋرستى ۇيىمداستىرۋشى كونكۋرستى قايتا وتكىزۋ تۋرالى شەشىم قابىلدايدى. 15. كونكۋرس ناتيجەسىندە كونكۋرس شارتتارىنا سايكەس كەلەتىن جانە جوبا شارتتارى بويىنشا نەعۇرلىم باسىمدى بولىپ تابىلاتىن ءبىر جوبا تاڭدالادى. كونكۋرستىڭ ناتيجەلەرى كونكۋرستى وتكىزۋ تۋرالى حابارلاندىرۋ بولعان باسپا باسىلىمىندا جاريالانادى. 16. كونكۋرستىق كوميسسيانىڭ شەشىمى اشىق داۋىس بەرۋمەن قابىلدانادى جانە ەگەر وعان كونكۋرستىق كوميسسيانىڭ قاتىسىپ وتىرعان مۇشەلەرىنىڭ جالپى سانىنىڭ كوپشىلىگى داۋىس بەرگەندە قابىلداندى دەپ سانالادى. داۋىستار تەڭ بولعان جاعدايدا, كونكۋرستىق كوميسسيانىڭ توراعاسى داۋىس بەرگەن شەشىم قابىلداندى دەپ سانالادى. كونكۋرستىق كوميسسيانىڭ كەز كەلگەن مۇشەسى كونكۋرستىق كوميسسيانىڭ شەشىمىمەن كەلىسپەگەن جاعدايدا, ەرەكشە پىكىر بىلدىرەدى, ونى جازباشا تۇردە بەرەدى جانە كونكۋرس قورىتىندىلارىنىڭ حاتتاماسىنا قوسا تىركەيدى. قورشاعان ورتانى قورعاۋ سالاسىنداعى جوبالاردى اشىق كونكۋرستارىن وتكىزۋ قاعيدالارىنا قوسىمشا قورشاعان ورتانى قورعاۋ سالاسىنداعى جوبالاردىڭ اشىق كونكۋرسىنا ۇسىنىلعان جوبالاردى باعالاۋ كريتەريلەرى 1. جوبانىڭ قورشاعان ورتانى قورعاۋ سالاسىنداعى باسىمدىقتارعا سايكەستىگى: سايكەس كەلمەيدى – 0 بالل; ءىشىنارا سايكەس كەلەدى – 5 بالل; تولىعىمەن سايكەس كەلەدى – 30 بالل; كورسەتكىشتەردەن اسادى – 50 بالل. 2. جوبانىڭ باعىتتىلىعى: جۇرتشىلىقپەن جۇمىس ىستەۋ جانە اقپارات تاراتۋ – 15 بالل; عىلىمي-زەرتتەۋ – 25 بالل; بيولوگيالىق ارتۇرلىلىكتى قورعاۋ – 30 بالل; ەكولوگيالىق تازا تەحنولوگيالارعا ينۆەستيتسيالار – 35 بالل. 3. مەملەكەتتىڭ قارجىلاندىرۋ ۇلەسى: 100 % – 10 بالل; 80-نەن 99 % -عا دەيىن – 15 بالل; 50-دەن 79 %-عا دەيىن – 20 بالل; 30-دان 49 %-عا دەيىن – 25 بالل; 10-نان 29 %-عا دەيىن – 30 بالل; 10 %-دان استام – 35 بالل. 4. جوبا نەگىزدىلىگىنىڭ دارەجەسى: جوبا نەگىزدەلمەگەن – 0 بالل; عىلىمي نەگىزدەمەسى بار – 25 بالل; عىلىمي نەگىزدەمەسى جانە تەحنيكا-ەكونوميكالىق نەگىزدەمەسى بار – 30 بالل; ەگجەي-تەگجەيلى جوبالىق-سمەتالىق قۇجاتتاماسى ازىرلەنگەن – 50 بالل. 5. جوبانىڭ وتەلۋ مەرزىمى: جوبا وتەلمەيدى – 20 بالل; 7 جىلدان استام – 25 بالل; 3-تەن 6 جىلعا دەيىن – 30 بالل; 3 جىلدان كەم – 35 بالل. 6. يننوۆاتسيالاردى تاراتۋ مۇمكىندىگى: يننوۆاتسيالار جوق – 10 بالل; يننوۆاتسيالار تاراتىلمايدى – 15 بالل; يننوۆاتسيالار بولاشاقتا تاراتىلۋى مۇمكىن – 25 بالل. 7. قورشاعان ورتانى قورعاۋ سالاسىندا باسىمدىقتارعا قول جەتكىزۋ: باسىمدىقتارعا قول جەتكىزىلمەيدى – 0 بالل; باسىمدىقتارعا ءىشىنارا قول جەتكىزىلەدى – 10 بالل; باسىمدىقتارعا تولىق قول جەتكىزىلەدى – 30 بالل. 8. جيىنتىق قويىلعان باللدارعا سايكەس جوبالار بىلاي باعالانادى: 1) 50-دەن 120-عا دەيىن – تيىمدىلىگى از; 2) 121-دەن 190-عا دەيىن – ءتيىمدى; 3) 191-دەن 260-قا دەيىن – اسا ءتيىمدى. بۇيرىق قازاقستان رەسپۋبليكاسىنىڭ ادىلەت مينيسترلىگىندە 2015 جىلعى 30 ناۋرىزداعى نورماتيۆتىك قۇقىقتىق كەسىمدەردى مەملەكەتتىك تىركەۋدىڭ تىزىلىمىنە №10579 بولىپ ەنگىزىلدى.