ارحيۆتانۋ وليمپياداسى

قازاقستان رەسپۋبليكاسى پرەزيدەنتى ارحيۆىندە تاۋەلسىزدىكتىڭ 25 جىلدىعىنا وراي ستۋدەنتتەر اراسىندا العاش رەت ارحيۆتانۋ ماماندىعى بويىنشا وليمپيادا ءوتتى. «ۇلت جوسپارى – بەس ينستيتۋتتىق رەفورمانى جۇزەگە اسىرۋ جونىندەگى 100 ناقتى قادام» باعدارلاماسىن ىسكە اسىرۋ شەڭبەرىندە ستۋدەنتتەردىڭ شىعارماشىلىق بەلسەندىلىگىن ارتتىرۋ جانە ولارعا بولاشاقتا ارحيۆ ماماندىعى بويىنشا جۇمىس جاساۋعا ىقپال ەتۋ ماقساتىندا دايىندالعان ءىس-شارا ءال-فارابي اتىنداعى قازاق ۇلتتىق ۋنيۆەرسيتەتىمەن بىرلەسە وتكىزىلدى. «يندۋستريالاندىرۋ ءجا­نە ەكونو­ميكالىق ءوسىم» ينستيتۋتتىق رەفورماسىن ىسكە اسىرۋدىڭ ما­ڭىز­دى ءبىر بولىگى – دايارلاناتىن كادر­لاردىڭ باسەكەلەستىك قابىلەتىن ارتتىرۋ بولىپ تابىلادى. بۇل 79-قادامدا كورسەتىلگەن. بۇگىندە وسى ماق­ساتتا پرەزيدەنت ارحي­ۆىن­دە اۋقىمدى جۇمىستار ءجۇر­گىزى­لۋدە. ماسەلەن, ارحيۆتە تۇراقتى ءتۇر­دە بىرقاتار جوعارى وقۋ ورىن­دا­رىنىڭ تاريح فاكۋلتەتىنىڭ ستۋ­دەنتتەرىنە وندىرىستىك تاجىريبە ۇيىمداستىرىلادى, وقۋ زالىندا ستۋدەنتتەر ديپلومدىق جانە كۋرستىق جۇمىستارىن جازۋ ءۇشىن ارحيۆ قۇجاتتارى بويىن­شا زەرتتەۋلەر جۇرگىزەدى, ءارحيۆتىڭ ءارتۇرلى ءىس-شارالارىنا قاتىسادى, سونىڭ ىشىندە تاريحي-قۇجاتتىق كورمەلەر, دوڭگەلەك ۇستەلدەر, بەلگىلى زەرتتەۋشى تاريحشىلارمەن كەزدەسۋلەر ءوتىپ تۇرادى. سوندىقتان دا, اتالمىش وليمپيادا – ستۋدەنتتەردىڭ عىلىمعا ىنتاسىن ارتتىرىپ, ۇلتتىق ارحيۆ قورىنىڭ قۇجاتتارىن ايگىلەۋگە, ارحيۆ ءىسى مەن قۇجاتتانۋدى ناسيحاتتاۋعا, ارحيۆ ماماندىعىنىڭ مارتەبەسىن كوتەرۋگە ءوز ۇلەسىن قوسپاق. وليمپيادا ەكى تۋر بويىنشا ءوتتى. ءبىرىنشىسى 10 سۇراقتان تۇراتىن تەست تاپسىرمالارى. ەكىنشى تۋر – ءۇي تاپسىرماسى. ستۋدەنتتەر الدىن الا بەرىلگەن تاقىرىپتار بويىنشا بايانداما جاسادى. قازىلار القاسىنىڭ مۇشەلەرى پرەزيدەنت ءارحيۆىنىڭ باسشىلىعى جانە ءال-فارابي اتىنداعى قازۇۋ-ءدىڭ وقىتۋشىلارى بولدى. وليمپياداعا ءال-فارابي اتىن­داعى قازاق ۇلتتىق ۋنيۆەرسيتەتى, تاريح فاكۋلتەتىنىڭ «مۇراعاتتانۋ, قۇ­جاتتاردى جۇرگىزۋ جانە قۇجاتتامامەن قامتاماسىز ەتۋ» ماماندىعىنان ىرىك­تەلىپ 15 ستۋدەنت قاتىستى. 3 ستۋدەنت جۇلدەلى ورىندارعا يە بولدى. 1-ءشى ورىندى 2 كۋرس ماگيسترانتى گۇلجان قالمىرزاەۆا جەڭىپ السا, 2-ءشى ورىندى 3 كۋرس ستۋدەنتى بالعىن جاقسىلىق, 3-ءشى ورىندى 3 كۋرس ستۋدەنتى جانگەلدى سۇلتانحان يەلەندى. قالعان ستۋدەنتتەر ءارتۇرلى نوميناتسيالارمەن ماراپاتتالدى. جۇلدەلى ءۇش ورىنعا بەلگىلى تاريحشى, مەملەكەت جانە قوعام قايراتكەرى مارات جاقسىباي ۇلى حاساناەۆتىڭ اتىنان اقشالاي شاكىرتاقى تاعايىندالدى. گۇلزەينەپ سادىرقىزى, «ەگەمەن قازاقستان».