ەسىرتكى ساۋداسىمەن اينالىسقان ءىرى قىلمىستىق توپ ۇستالدى

قوستاناي. 12 ءساۋىر. قوستانايدا پوليتسەيلەر اۋعان گەروينىن قازاقستان مەن تاعى باسقا دا ەلدەرگە تاسىمالدايتىن حالىقارالىق ەسىرتكى جولىن كەستى. بۇل تۋرالى alau.kz-كە سىلتەمە جاساعان egemen.kz ءتىلشىسى حابارلادى. ەسىرتكى بيزنەسىمەن كۇرەس قىزمەتكەرلەرى قوستانايدا, ليساكوۆتا, رۋدنىيدا, قاراعاندىدا كەڭ اۋقىمدى وپرەاتسيالار وتكىزدى. وپەراتسيا ناتيجەسىندە حالىقارالىق ەسىرتكى قىلمىسى توبىنىڭ قىرعىزستان مەن قازاقستان ازاماتتارىنان تۇراتىن 15 مۇشەسى ءبىر مەزگىلدە قولعا ءتۇستى. پوليتسەيلەر سوزىنە قاراعاندا, قىلمىسكەرلەر ەكى جىل بويى قازاقستاننىڭ سولتۇستىك وبلىستارىن ەسىرتكىمەن قامتاماسىز ەتكەن. ىشكى ىستەر مينيسترلىگىنىڭ ماماندارىنىڭ ايتۋىنشا, قىرعىزستاننان گەرويننىڭ ءىرى كولەمىن 36 جاستاعى وش تۇرعىنى تاسىپ تۇرعان. ول قىلمىستىق ورتادا پەرۆايا لاستوچكا دەگەن لاقاپ اتپەن بەلگىلى ەسىرتكى بارونىنىڭ كۇيەۋ بالاسى بولادى. بارون ورتا ازيا ايماعىندا ءبىرىنشى رەت اسا قاۋىپتى ەسىرتكى ءتۇرىن تاراتۋدىڭ جانە كونتراباندانىڭ جەلىسىن قۇرعان. پوليتسەيلەر ونى قوستاناي قالاسىنىڭ ورتالىعىنان ءبىر كيلوگرامم گەروينىمەن ۇستاعان. بۇل وبلىس ورتالىعىنداعى ءال-فارابي مەن چەحوۆ كوشەلەرى قيىلىسىندا جۇزەگە اسقان. ءنازيرا جارىمبەتوۆا. دەرەك, فوتو: alau.kz.