باتىس قازاقستاندا 330 ملرد. تەڭگەنىڭ 41 جوباسى جۇزەگە اسىرىلۋدا

ورال. 12 ءساۋىر. باتىس قازاقستان وبلىسىندا جالپى سوماسى 330 ملرد. تەڭگەنى قۇرايتىن 41 جوبا جۇزەگە اسىرىلۋدا. بۇگىن «مەملەكەت باسشىسىنىڭ 5 ينستيتۋتتىق رەفورماسىن جۇزەگە اسىرۋ بويىنشا 100 ناقتى قادام» ۇلت جوسپارىن جۇزەگە اسىرۋ ماسەلەلەرىنە ارنالعان بريفينگتە اتالعان ءوڭىردىڭ باسشىسى التاي كولگىنوۆ وسىلاي دەپ ءمالىم ەتتى. بۇل تۋرالى zhaikpress.kz-كە سىلتەمە جاساعان egemen.kz ءتىلشىسى حابارلادى. «بۇگىنگى كۇننىڭ نەگىزگى مىندەتتەرىنىڭ ءبىرى جاڭا ءوندىرىس ورىندارىن قۇرىپ, جۇمىس ىستەپ تۇرعاندارىن كەڭەيتۋ بولىپ وتىر. يندۋستريالاندىرۋ كارتاسى اياسىنداعى وزەكتەندىرىلۋدى ەسكە العاندا وبلىستا سوماسى 330 ملرد. تەڭگەنى قۇرايتىن 41 جوبا جۇزەگە اسىرىلۋدا. سونداي-اق, 2242 جۇمىس ورنى قۇرىلاتىنىن اتاپ وتكەن ءجون», – دەدى وبلىس اكىمى. التاي كولگىنوۆتىڭ كەلتىرگەن دەرەكتەرىنە سايكەس, يندۋستريالاندىرۋدىڭ العاشقى 5 جىلدىعىندا 258 ملرد. تەڭگەگە 31 ينۆەستيتسيالىق جوبا جۇزەگە اسىرىلىپ, 1828 جۇمىس ورنى قۇرىلعان. 2015 جىلدىڭ قورىتىندىسىندا ونەركاسىپتىڭ جالپى كولەمىندەگى يندۋستريالاندىرۋ كارتاسى جوبالارىنىڭ ۇلەسى 30 پايىزدى, ال وڭدەۋ ونەركاسىبىندەگى ۇلەسى 14 پايىزدى قۇراعان. تەمىر قۇسايىن. دەرەك: zhaikpress.kz. فوتو: bko.gov.kz.