استانا. 12 ءساۋىر. 23 ءساۋىر كۇنى بوكسشىلار گەننادي گولوۆكين مەن دومينيك ۋەيد شارشى الاڭدا كەزدەسەدى. بۇل تۋرالى egemen.kz ءتىلشىسى حابارلادى.
بۇل جەكپە-جەكتى «قازاقستان» تەلەارناسى 24 ءساۋىر كۇنى استانا ۋاقىتىمەن ساعات 07.20-تان باستاپ تىكەلەي ەفيردە كورسەتەدى. سونداي-اق, كەزدەسۋ kaztrk.kz سايتىندا تىكەلەي ەفيردە كورسەتىلەدى. كەزدەسۋ اقش-تىڭ لوس-اندجەلەس قالاسىنداعى «فورۋم» ارەناسىندا وتەدى.
گەننادي گولوۆكين – WBA (Super), IBO, WBC (Interim) جانە IBF تۇجىرىمدارى بويىنشا ورتا سالماقتاعى الەم چەمپيونى. ول اۋەسقوي بوكستا 350 كەزدەسۋ وتكىزىپ, 345 جەكپە-جەگىندە جەڭىسكە جەتكەن. 2000 جىلعى جاستار جانە 2003 جىلعى ەرەسەكتەر اراسىنداعى الەم چەمپيونى, 2002 جىلعى ازيا ويىندارى مەن 2004 جىلعى ازيا چەمپيونى. سونداي-اق, 2004 جىلعى افينا وليمپياداسىنىڭ كۇمىس جۇلدەگەرى. گولوۆكين كاسىپقوي بوكستا 34 كەزدەسۋ وتكىزىپ, سونىڭ بارىندە جەڭىسكە جەتكەن. 31 جەكپە-جەگىن نوكاۋتپەن اياقتاعان. امەريكالىق بوكسشى دومينيك ۋەيدكە 18 رەت رينگكە كوتەرىلىپ, سونىڭ بارلىعىندا جەڭسە, 12 كەزدەسۋدى مەرزىمىنەن بۇرىن ۇتقان. ول سوڭعى كەزدەسۋىن بىلتىر 26 ماۋسىمدا اۆستراليالىق بوكسشى سەم سوليمانعا قارسى وتكىزىپ, جەڭىسكە جەتتى.
گەنناديدىڭ وسىعان دەيىن اۆستراليالىق دەنيەل گيل, مەكسيكالىق ماركو انتونيو رۋبيو, امەريكالىق ۆيللي مونرو II مەن ستيۆەن كەرتيس جانە كانادالىق داۆيد لەمە سەكىلدى بوكسشىلارمەن جۇدىرىقتاسىپ, جەڭگەنىن بىلەمىز.
گەننادي گولوۆكين سوڭعى جەكپە-جەگىن 2015 جىلدىڭ 18 قازانى كۇنى كانادالىق داۆيد لەمەگە قارسى وتكىزىپ, 8-راۋندتا نوكاۋتپەن ۇتقان. بۇل كەزدەسۋدى دە «قازاقستان» ۇلتتىق تەلەارناسى تىكەلەي ەفيردە كورسەتتى.
گولوۆكين مەن لەمە جەكپە-جەگىنە HBO تەلەارناسى اقىلى تۇردە Pay-Per-View جۇيەسىمەن كورسەتىپ, 150 مىڭنان استام ابونەمەنت ساتىلدى. بۇل اقش-تا جەكپە-جەك وتكىزگەن شەتەل ازاماتى ءۇشىن جاقسى كورسەتكىش سانالادى.
ال وتانداستارى ءۇشىن گولوۆكين-لەمە كەزدەسۋىن 3,5 ميلليون قازاقستاندىق جانكۇيەرلەر دەمالىس كۇنى ەكەنىنە قاراماستان «قازاقستان» ۇلتتىق تەلەارناسىنان تاماشالاعان. سونداي-اق, وسى كەزدەسۋدى 1 ملن. كورەرمەن تەلەارنانىڭ رەسمي www.kaztrk.kz سايتىنان كورگەن. ال, جەكپە-جەكتىڭ قايتالاۋىن 1,5 ميلليوننان اسا جانكۇيەر قاراعان.
24 ساۋىردە «قازاقستان» تەلەارناسى ساعات 15.00 جانە 19.00- دە گولوۆكيننىڭ ۋەيدكە جەكپە-جەگىن قايتالاپ كورسەتەدى. ال «Kazsport» تەلەارناسى مەن kazsporttv.kz سايتى 24 ساۋىردە 23.15-تە, 25 ساۋىردە ساعات 09.00-دە, 22.00-دە جانە 1 مامىردا ساعات 23.00-دە جەكپە-جەكتى قايتالاپ كورسەتەدى.
داستان كەنجالين.
دەرەك, فوتو: «قازاقستان» رترك» اق.
