قازاقستان سپورتشىسى الەم رەكوردىن قاتارىنان ءۇش رەت جاڭارتتى

استانا. 12 ءساۋىر. گوللانديانىڭ ەيندحوۆەن قالاسىندا وتكەن ءداستۇرلى «Swim Cup EINDHOVEN» جارىسىندا ءجۇزۋ سپورتىنان قازاقستاندىق پاراليمپيالىق سپورتشى ءزۇلفيا عابيدۋللينا الەم رەكوردىن قاتارىنان ءۇش رەت جاڭارتتى. بۇل تۋرالى egemen.kz ءتىلشىسى حابارلادى. وسى جەتىستىگىمەن ونى مادەنيەت جانە سپورت ءمينيسترى ارىستانبەك مۇحامەدي ۇلى قۇتتىقتادى. مينيستر پاراليمپيالىق سپورتشىنى الەم رەكوردىن قاتارىنان ءۇش رەت جاڭارتۋىمەن شىن جۇرەكتەن قۇتتىقتاي وتىرىپ, ونىڭ جوعارى كورسەتكىشتەرى ناعىز ەرلىك ەكەندىگىن اتاپ ءوتتى. «بۇل جەتىستىگىڭىز بەيبىت ەلىمىزدىڭ ازاماتى رەتىندە جاساعان ەرەن ەرلىگىڭىز دەپ بىلەمىن. ءسىزدىڭ ەنشىڭىزدە وسىمەن 6 الەم رەكوردى بار. قازىرگى تاڭدا 50, 100 جانە 200 مەترگە ەركىن ادىسپەن جۇزۋدە الەمدىك رەيتينگتە ءسىزدىڭ كوش باستاپ تۇرۋىڭىز – ءبىز ءۇشىن زور ماقتانىش. تاعدىردىڭ تەزىنە قايسار مىنەز تانىتىپ, كوپكە ۇلگى بولارلىقتاي ەرلىك جاساپ كەلەسىز. ريو-دە-جانەيرو قالاسىندا وتەتىن الداعى XV پاراليمپيا ويىندارىندا سىزگە ساتتىلىك تىلەگىم كەلەدى! بۇل جەڭىستەرىڭىز جاڭا جەتىستىكتەرگە ۇلاسا بەرسىن!», دەپ جازدى مينيستر قۇتتىقتاۋىندا. ءزۇلفيا عابيدۋللينا الدىمەن 50 مەتر قاشىقتىقتى جارتىلاي فينالدا 44.99 سەكۋند ۋاقىتتا ءجۇزىپ, ءبىرىنشى رەكوردىن ورناتتى. اراعا كوپ ۋاقىت سالماي, فينالدا ەركىن ءجۇزۋ ادىسىمەن وسى قاشىقتىقتا جاڭا الەم رەكوردىن جاسادى. ول 44.17 سەكۋند ۋاقىتتا ءجۇزىپ, ءبىرىنشى ورىندى جەڭىپ الدى. كەيىن 100 مەتر قاشىقتىقتى 01:34.86 ۋاقىتتا ءجۇزىپ, الەم رەكوردىن تاعى ءبىر مارتە جاڭارتتى. سونداي-اق, ءزۇلفيا عابيدۋللينا ەركىن ادىسپەن ءجۇزۋ بويىنشا 200 مەتر قاشىقتىقتا دا الدىنا جان سالماي تاعى دا مارەگە ءبىرىنشى بولىپ جەتتى. ءزۇلفيا عابيدۋللينا وسىعان دەيىن ريو-دە-جانەيرودا وتەتىن XV پاراليمپيا ويىندارىنا ليتسەنزيا العان بولاتىن. قازىرگى كەزدە ءزۇلفيا عابيدۋللينا وسى 3 قاشىقتىقتاردا (50, 100, 200 مەتر) الەمدىك رەيتينگتە كوش باستاپ تۇر. داستان كەنجالين. دەرەك, فوتو: مادەنيەت جانە سپورت مينيسترلىگى.