قوستانايدا ءورت قاۋىپسىزدىگى ايلىعى باستالدى

قوستاناي. 12 ءساۋىر. قوستاناي وبلىسىندا ءورت قاۋىپسىزدىگى ايلىعى 11 ساۋىردەن باستالدى. وتكەن جىلى وبلىس وڭىرىندەگى ورمان القاپتارىندا 40 ءورت وقيعاسى تىركەلگەن. بۇل الدىڭعى جىلعا قاراعاندا ءبىرجارىم ەسەدەي كوپ. بۇل تۋرالى egemen.kz ءتىلشىسى حابارلادى. نەگىزى توبىل-تورعاي وڭىرىندەگى ورماندى القاپتاردىڭ كولەمى كوپ ەمەس, مەملەكەتتىك ورمان قورى 455 534 گەكتار شاماسىندا عانا, ونىڭ ىشىندە تازا ورمان 227 199 گەكتار بولادى. وتكەن جىلى 4795 گەكتار اعاش قىزىل جالىننىڭ قۇربانى بولدى. بۇل 2014 جىلعا قاراعاندا ەداۋىر كوپ, الدىڭعى جىلى 26 ءورت وقيعاسى بولىپ, وندا 1171 گەكتار جەر زالالدانعان ەدى. وبلىس بويىنشا ورمان ورتتەرىنىڭ 70 پايىزى ميحايلوۆ ورمان قورىعىنا تيەسىلى. تابيعات رەسۋرستارى جانە تابيعاتتى پايدالانۋ باسقارماسىنىڭ باسشىسى ءامىرحان ماۋقۇلوۆ وبلىستا جىل سايىن ورتكە قارسى شارالاردىڭ بارلىعى جاسالاتىنىن ايتتى. قوستاناي وبلىستىق تابيعات رەسۋرستارى جانە تابيعاتتى پايدالانۋ باسقارماسىنىڭ باسشىسى ءامىرحان ماۋقۇلوۆ: «اعاشتى جەرلەردىڭ ىرگەسى 884 شاقىرىم  جىرتىلدى, 48073 شاقىرىم ورتكە قارسى مينەرالدانعان جولدار كۇتىلەدى. وبلىس وڭىرىندە 22 ورتكە قارسى ستانسا بار, ولاردىڭ بارلىعى قاجەتتى تەحنيكامەن جاراقتاندىرىلعان. ورماندى القاپتاردىڭ جارتىسىنا جۋىعى تىك ۇشاقپەن باقىلانادى», – دەدى. ورماننىڭ جاۋى ءورت عانا ەمەس. اعاشتاردى اياماي كەسەتىن براكونەرلەر دە اعاشتى القاپتىڭ قۋسىرىلۋىن تەزدەتەدى. وتكەن جىلى ورماندا رۇقساتسىز اعاش كەسكەن 25 ادام ۇستالعان. ولار 82 تەكشە مەتر اعاش كەسكەن. ولاردىڭ ۇستىنەن 14 قىلمىستىق ءىس سوتتا قارالعانىمەن 11 ءىس قايتىپ الىنعان. وسى ورايدا وبلىس اكىمى ارحيمەد مۇحامبەتوۆ رۇقساتسىز اعاش كەسەتىندەردىڭ جازاسىن قاتايتۋدى ۇسىندى. وبلىس اكىمى ارحيمەد مۇحامبەتوۆ: «قازىرگىدەي اعاش ۇرلاپ كەسكەندەردىڭ بەنزواراسىن الىپ قويۋ, ۇساق ايىپپۇلمەن جىبەرۋ جەتكىلىكسىز, وتە جەڭىل جازا دەپ بىلەمىن. دانىگىپ العاندار مۇنىمەن توقتامايدى, ورمانعا بارۋىن قويمايدى. سوندىقتان بۇقارالىق اقپارات قۇرالدارى ارقىلى ولاردىڭ تابيعاتقا مەيىرىمسىز قارايتىندىعىن, ەلدىڭ بايلىعىنا قول سۇققانىن جۇرتشىلىققا كورسەتۋ كەرەك», – دەدى. ءنازيرا جارىمبەتوۆا. دەرەك, فوتو: egemen.kz.