قازاقستان مەن يران سوتتالعان ادامداردى بەرۋ تۋرالى كەلىسىم جاساستى

استانا. 12 ءساۋىر. قازاقستان پرەزيدەنتى نۇرسۇلتان نازارباەۆتىڭ تەگەرانعا رەسمي ساپارى اياسىندا قازاقستان مەن يران اراسىنداعى سوتتالعان ادامداردى بەرۋ تۋرالى كەلىسىمگە قول قويۋ ءراسىمى وتكىزىلدى. كەلىسىمگە قازاقستان تاراپىنان باس پروكۋرور اسحات داۋىلباەۆ پەن يراننىڭ ادىلەت ءمينيسترى موستافا پۋر-مۋحاممادي رۋحاني قول قويدى. بۇل تۋرالى باس پروكۋراتۋرانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. وسىعان دەيىن قازاقستان يرانمەن ادامداردى ۇستاپ بەرۋ تۋرالى, سونداي-اق, قۇقىقتىق كومەك, ازاماتتىق جانە قىلمىستىق ماسەلەلەر بويىنشا قۇقىقتىق قاتىناستار تۋرالى شارتتار جاساسقان بولاتىن. وسىلايشا, يران يسلام رەسپۋبليكاسى تاياۋ شىعىس ەلدەرى اراسىندا قازاقستان رەسپۋبليكاسىنىڭ ەكى ەل قۇقىق قورعاۋ ورگاندارىنىڭ ءتيىمدى ىنتىماقتاستىعى ءۇشىن بارلىق قاجەتتى حالىقارالىق نورماتيۆتىك-قۇقىقتىق بازا قۇرىلعان العاشقى مەملەكەت بولدى. تاراپتار اتاپ وتكەندەي, اتالعان حالىقارالىق قۇجاتقا قول قويۋ قىلمىسقا قارسى تۇرۋ, زاڭدىلىق پەن قۇقىقتىق ءتارتىپتى قامتاماسىز ەتۋ, سونىمەن قاتار ەكى ەل ازاماتتارىنىڭ نەگىزگى قۇقىقتارى مەن مۇددەلەرىن قورعاۋ سالاسىنداعى قازاقستاندىق-يراندىق ارىپتەستىكتى نىعايتۋ جولىنداعى ماڭىزدى قادام بولىپ تابىلادى. وسى كۇنى اسحات داۋىلباەۆ ادىلەت ءمينيسترى موستافا پۋر-مۋحاممادي رۋحانيمەن, باس پروكۋرور موحامماد دجافار مونتازەريمەن, جوعارعى سوت توراعاسىنىڭ ءبىرىنشى ورىنباسارى, يراننىڭ بۇرىنعى باس پروكۋرورى موحسەني ەدجەيمەن ەكىجاقتى كەزدەسۋلەر وتكىزدى, ولاردىڭ بارىسىندا ءوزارا مۇددەلىلىك تۋعىزاتىن كەڭ اۋقىمدى ماسەلەلەر تالقىلاندى. سۇحباتتاسۋشىلار حالىقارالىق كۇن تارتىبىندەگى نەعۇرلىم وزەكتى ماسەلەلەر تۋرالى پىكىر الماستى. ىنتىماقتاستىقتىڭ باسىم باعىتتارى, ونىڭ ىشىندە ترانسۇلتتىق ۇيىمداسقان قىلمىسپەن, تەرروريزممەن, ەكسترەميزممەن, كيبەرقىلمىسپەن, ەسىرتكى تاسىمالىمەن كۇرەسۋ, سونداي-اق, تاجىريبە جانە اقپارات الماسۋ ماسەلەلەرى قوزعالدى. ۆەدومستۆولاردىڭ باسشىلارى قازىرگى الەم تۇرعىسىنداعى حالىقارالىق جانە ايماقتىق قاۋىپسىزدىكتى قامتاماسىز ەتۋ بويىنشا قازاقستان مەن يراننىڭ پىكىرلەستىگىن باسا ايتىپ, قۇقىقتىق ىنتىماقتاستىقتىڭ بارلىق باعىتتارى بويىنشا قارىم-قاتىناستاردى نىعايتۋعا مۇددەلىلىك ءبىلدىردى. يراننىڭ ادىلەت ءمينيسترى جانە باس پروكۋرورى قازاقستاندىق پروكۋراتۋرانىڭ ەلدىڭ حالىقارالىق-قۇقىقتىق ساياساتىن جۇزەگە اسىرۋداعى ءرولىن جوعارى باعالاپ, ەكىجاقتى ىقپالداستىقتى تەرەڭدەتۋگە قاتىستى نيەتىن راستادى. يراننىڭ باس پروكۋرورىمەن كەزدەسۋدىڭ ناتيجەسىندە تاراپتار قازاقستان رەسپۋبليكاسىنىڭ باس پروكۋراتۋراسى مەن يران يسلام رەسپۋبليكاسىنىڭ باس پروكۋراتۋراسى اراسىنداعى ىنتىماقتاستىق تۋرالى مەموراندۋمعا قول قويدى. قابىلدانعان قۇجات ەكى مەملەكەتتىڭ قىلمىسپەن كۇرەس, ادام قۇقىقتارى مەن بوستاندىقتارىن قورعاۋ, ۇيىمداسقان قىلمىسقا, تەرروريزمگە, ەكسترەميزمگە, سىبايلاس جەمقورلىققا, زاڭسىز قارۋ-جاراق, ەسىرتكى جانە پسيحوتروپتىق زاتتار اينالىمىنا, ەكونوميكا سالاسىنداعى جانە اقپاراتتىق تەحنولوگيالار سالاسىنداعى قىلمىستارعا قارسى تۇرۋدا ءوزارا ىنتىماقتاستىقتى دامىتۋعا, قۇقىقتىق ىقپالداستىقتىڭ بارلىق باستى اسپەكتىلەرى بويىنشا ەكىجاقتى ارىپتەستىكتى كەڭەيتۋگە مۇمكىندىك بەرەدى. تالعات رايىمبەك. دەرەك, فوتو: باس پروكۋراتۋرانىڭ ءباسپاسوز قىزمەتى.