ەلباسى يراننىڭ رۋحاني كوشباسشىسى ءالي حامەنەيمەن كەزدەستى

استانا. 11 ءساۋىر. قازاقستان پرەزيدەنتى نۇرسۇلتان نازارباەۆ يران يسلام رەسپۋبليكاسىنىڭ رۋحاني كوشباسشىسى ءالي حامەنەيمەن كەزدەستى. بۇل تۋرالى akorda.kz-كە سىلتەمە جاساعان egemen.kz ءتىلشىسى حابارلاستى. كەزدەسۋ بارىسىندا ەكى ەل ىنتىماقتاستىعىن ودان ءارى نىعايتۋ جولدارى تالقىلاندى. مەملەكەت باسشىسى قازاقستان مەن يران حالىقتارىن ەجەلدەن قالىپتاسقان الەۋمەتتىك-ەكونوميكالىق جانە رۋحاني قارىم-قاتىناس بايلانىستىراتىنىن ايتتى. تاراپتار حالىقارالىق كۇن تارتىبىندەگى مەيلىنشە وزەكتى ماسەلەلەر جونىندە دە پىكىر الماسىپ, تەرروريزممەن جانە ەكسترەميزممەن كۇرەستىڭ ماڭىزدىلىعىن اتاپ ءوتتى. نۇرسۇلتان نازارباەۆ پەن ءالي حامەنەي قازاقستان-يران قارىم-قاتىناسىنىڭ ساۋدا جانە ينۆەستيتسيا, بىرلەسكەن جاڭا جوبالار جاساۋ سالالارىنداعى دامۋ قارقىنىنا قاناعاتتانۋشىلىق ءبىلدىرىپ, وسىنىڭ ءبارى ەكى ەلدىڭ حالقىنىڭ دوستىعىن نىعايتۋ جولىنداعى بەرىك نەگىز قىزمەتىن اتقاراتىنىن ايتتى. تالعات رايىمبەك. دەرەك, فوتو: akorda.kz.