چەرنوبىل ەرلەرىنە

ەڭسەلى ەسكەرتكىش ورناتىلادى قاراعاندىدا وتكەن قالا قۇرىلىسى جونىندەگى كەڭەستىڭ وتىرىسىندا چەرنوبىل اتوم ەلەكتر ستانساسىندا بولعان الاپات اپاتتىڭ 30 جىلدىعىنا وراي, جارىلىس زارداپتارىن جويۋعا قاتىسقان ەرلەردىڭ قۇرمەتىنە وبلىس ورتالىعىندا قويىلاتىن ساۋلەتتىك-مۇسىندىك قۇرىلىمنىڭ جوباسى تالقىلاندى. وتكەن اقپان ايىندا «چەرنوبىل ارداگەرلەرىنىڭ وبلىستىق وداعى» قوعامدىق بىرلەستىگىنىڭ مۇشەلەرى وبلىس اكىمىنىڭ جەكە قابىلداۋىندا بولىپ, چەرنوبىل قاھار­مان­دارىنا ەسكەرتكىش ورناتۋ تۋرالى ءوتىنىش بىلدىرگەن بولاتىن. بۇل ءوتىنىشتى اياقسىز قالدىرماعان ءوڭىر باسشىسى قوعامدىق بىرلەستىك مۇشەلەرىمەن ارنايى كەزدەسىپ, وتىرىس ۇيىمداستىردى. باسقوسۋ بارىسىندا كۇن تارتىبىندەگى ماسەلەگە بايلانىستى اپات زارداپتارىن جويۋعا قاتىسۋشى, وتستاۆكاداعى گەنەرال-مايور يانيس دۋدا حابارلاما جاسادى. ودان كەيىن ساۋلەتتىك-مۇسىندىك قۇرىلىمدار جوبالارىن ازىرلەۋشىلەردىڭ اقپاراتتارى تىڭدالىپ, ۆلاديمير تروتسەنكو جانە يگور باگراموۆ ازىرلەگەن ەسكەرتكىش جوباسىنىڭ ەكى نۇسقاسى تالقىعا ءتۇستى. وتىرىس بارىسىندا كەڭەس مۇشەلەرى يگور باگراموۆ جاساعان ەسكەرتكىش جوباسىن بەكىتۋ تۋرالى ءبىراۋىزدان شەشىم قابىلدادى. كەڭەس قورىتىندىسىندا وبلىس باسشىسى نۇرمۇ­حامبەت ابدىبەكوۆ قاراعاندى قالاسىنىڭ اكىمى نۇرلان اۋباكىروۆكە اتالعان ەسكەرتكىش قۇرىلىسىنىڭ جۇمىس بارىسىن باقىلاۋعا الۋدى جانە ونى اپاتتىڭ ورىن العا­نىنا 30 جىل تولاتىن بيىلعى اتاۋلى جىلى تياناق­تاپ, مەموريالدىڭ اشىلۋ ءراسىمىن قازاقستان رەسپۋبلي­كاسىنىڭ كونستيتۋتسيا كۇنى قارساڭىنا جوسپارلاۋدى تاپسىردى. قايرات ءابىلدينوۆ, «ەگەمەن قازاقستان». قاراعاندى.