مەككە مەرەكەسى

ۇلتتىق مۋزەيدە «ماسكەۋ اقشا سارايىنىڭ كۇمىس ماركالارىنداعى مەككە» اتتى كورمە ءوتتى. «ماسكەۋ اقشا سارايى ۇسىنىپ وتىرعان كورمە ەكسكليۋزيۆتى كورمە بولىپ سانالادى. قاسيەتتى مەككەگە عانا ەمەس, جالپى يسلام ءدىنى مادەنيەتىنە جاسالعان ۇلكەن قۇرمەتتىڭ بەلگىسى رەتىندەگى توپ­تامانى جاساۋ ءۇشىن 3 جىل ۋا­قىت قاجەت بولعان. ونداعى مار­كالاردىڭ تۋرا قىرىق سانىنا سايكەستەندىرىلۋى كەزدەيسوق ەمەس. ارداقتى پايعامبارىمىزعا 40 جاسىندا اللادان ۋاحي كەلگەن. سونىمەن قاتار, 40 سانى وزگە دىندەردە دە قاسيەتتى بولىپ سانالادى. ەرەجەپ ايى باستالعاندا وسى كورمەنىڭ ۇلتتىق مۋزەيدە ءوتىپ جاتقانىنا قۋانىشتىمىز, – دەدى كورمەنىڭ اشىلۋ سالتاناتىندا توپتاماداعى ماركالار ەرەكشەلىگىنە توقتالعان ۇلتتىق مۋزەيدىڭ ديرەكتورى دارحان مىڭباي. مادەنيەت جانە سپورت مي­نيس­ترلىگىنىڭ جاۋاپتى حاتشىسى قۋاتجان ۋاليەۆ كۇمىس مار­كالار شەكتەۋلى تيراجبەن شىعارىلعانىن, سوندىقتان دا از ۋاقىت ىشىندە انتيكۆارياتقا اينالعانىن العا تارتا كەلىپ, قۇندى جادىگەرلەر كورمەسى العاش رەت 2013 جىلى تاتارستاندا وتكەنىن جانە بۇل كوركەمدىگى جاعىنان الەمدە بالاماسى جوق بۇيىمداردىڭ ۇسى­نىلىمى ەكەنىن ايتتى. ال, «ۆت» كومپانياسىنىڭ ديرەكتورى ۆلاديمير پرۋساكوۆ وسىناۋ ماڭىزدى جوبانى ۇلتتىق مۋزەيدە وتكىزۋگە مۇرىندىق بولعان ۇيىمداستىرۋشىلارعا العىس ءبىلدىردى. سونىمەن قاتار, ماركالار توپتاماسىن جاساۋ يدەياسى جايىندا اڭگىمەلەپ بەردى. ايتا كەتۋ كەرەك, «كۇمىسپەن كۇپتەلگەن مەككە» اتتى ماركالار توپتاماسىن جاساۋ يدەياسى 2006 جىلى «التىن جانە كۇمىس قۇراندار» جوباسىن جالعاستىرۋ ءارى ونى دامىتۋ نيەتىندە تۋسا, 2013 جىلدان بەرى ءتۇرلى دۇنيەجۇزىلىك, حالىقارالىق كورمەلەرگە قاتىسىپ كەلە جاتقانى ءوز الدىنا بولەك تاريح. سايىپ كەلگەندە, بۇلار عاسىرلار ارتەفاكتى بولىپ تابىلادى. بۇل جۇمىسقا عالىمداردان باستاپ, ساراپشىلار, تەحنولوگتار, ينجەنەرلەر, ديزاينەرلەر, مۇسىنشىلەر مەن سۋرەتشىلەر تارتىلعان. قارشىعا كۇلەن.