پوليتسەيدىڭ ەرلىگى

ءبىر وتباسىن امان الىپ قالدى قوستاناي وبلىسى, تاران اۋدانى, ۆيكتوروۆ سەلوسىندا گولوۆكولار وتباسىن جەرگىلىكتى ۋچاسكەلىك ينسپەكتور ەرلان تاڭجارىقوۆ ۇلكەن قايعىدان امان الىپ قالدى. اپالى-ءسىڭلىلى گولوۆكولار قىزىمەن جانە قارت اناسىمەن بىرگە تۇراتىن. ۇيدە ەر-ازاماتتىڭ جوقتىعىن پايدالانعان ءبىر بۇزاقى ءتۇن ورتاسىندا ۇيگە تاسىرلاپ كىرىپ كەلەدى. ول كەلە ايەلدەردەن اقشا مەن اشەكەي بۇيىمدارىن قولىنا سالۋدى تالاپ ەتكەن. ەكى سوزگە كەلمەي بۇزاقى ەكى ايەلدىڭ قولىن بايلاپ تاستاپ, پىشاقپەن قورقىتتى. قاريانى توسەكتىڭ ۇستىنە جاتقىزىپ قويدى. وسى كەزدە كورشى بولمەدەگى توسەكتىڭ استىنا تىعىلىپ ۇلگەرگەن 16 جاسار يۋليا ۋچاسكەلىك پوليتسەيگە تەلەفون شالىپ, ۇيىنە تەز جەتۋىن سىبىرلاپ ايتتى. بۇل كەزدە تۇنگى ساعات 4.00 شاماسى ەدى, جۇرت قالىڭ ۇيقىدا جاتقان. پوليتسەي تەز ارادا جەتىپ, ۇيگە كىرگەندە, بايلاۋلى ەكى ايەلدىڭ جانىندا پىشاق ۇستاپ تۇرعان جىگىتتى كوردى. پوليتسەي كاسىبي بىلىكتىلىگىن قولدانىپ, سامبو كۇرەسىنىڭ ادىسىمەن ساسقالاقتاعان بۇزاقىنىڭ قولىنان پىشاعىن ۇشىرىپ جىبەردى, سوسىن ءوزىن ۇستادى. وسى كەزدە كورشى بولمەدە تىعىلىپ جاتقان قىز شىقتى. پوليتسەي بۇرىن ۇيلەردى ارالاپ, قاجەت بولعاندا تەلەفون شالۋ كەرەكتىگىن ايتىپ, ۆيزيتكالىق كارتوچكاسىن تاستاپ كەتكەن بولاتىن. كۇدىكتى وسى اۋىلدىڭ بۇرىن سوتتالعان 21 جاستاعى تۇرعىنى بولىپ شىقتى. قازىر ول ۋاقىتشا وقشاۋلاعىشتا وتىر. ءنازيرا جارىمبەتوۆا, «ەگەمەن قازاقستان». قوستاناي وبلىسى, تاران اۋدانى.