قوندىرعىلاردى ءوزى ويلاپ تاپتى

كاسىپكەرلىك, يندۋستريالىق-يننو­ۆاتسيالىق دامۋ جانە تۋريزم باس­قارماسىندا جاڭاشا ىزدەنىسى, تىڭ يدەيا­سى بار ازاماتتارعا جۇمىسىن اياعىنا جەتكىزۋ ءۇشىن قايتارىمسىز گرانت بولىنەدى. سارىاعاشتىق ۇستا نۇرجان قارسىباەۆ – اعاش, تەمىردەن ءتۇيىن تۇيە­تىندىگىنەن ءبىر بولەك, اۋىر جۇمىستى وڭايلاتاتىن قوندىرعىلاردىڭ تەحنولوگياسىن ويلاپ تاپقان ونەرتاپقىش. قايتارىمسىز قارجى نۇرەكەنىڭ ءوزى ويىپ, ءوزى جونىپ شىعاراتىن قون­دىرعىلارىن وندىرىستە قولدانۋىنا مۇمكىندىك بەردى. ەندى ول باياعىداعى شەبەرلەردەي تاڭەرتەڭنەن كەشكە دەيىن اعاشتى جوڭقالاپ شاۋىپ, كەسكىمەن بەدەرلەپ ويىپ وتىرمايدى. تەمىر قىر­قاتىن ستانوكتى استاۋ وياتىن قون­­دىرعىعا اينالدىرعان شەبەردىڭ قولىن­داعى اعاش ءاپ-ساتتە ءتۇرلى بۇيىم­دارعا اينالىپ شىعا كەلەدى. نۇرجان قارسىباەۆ شىمكەنتتەگى ءابىلحان قاستەەۆ اتىنداعى ونەر كول­لەدجىن­دە ءبىلىم العان. شاعىن شەبەرحاناسىندا دومبىرا, قوبىزدان بولەك, ەر دە شابىلادى, تورسىق, كەسە دە جاسالادى. ونەرتاپقىش قارسىباەۆتىڭ ءبىر الاڭدايتىنى, روبوت سياقتى بەرىلگەن تاپسىرمانى مۇلتىكسىز ورىندايتىن قوندىرعىلار تۇبىندە ۇلتتىق ونەردى ۇمىتتىرىپ جىبەرە مە دەيدى. سوندىقتان, شاكىرتتەرىنە كەي­بىر بۇيىمداردى ءوزى قولىمەن جاساپ كورسەتەدى. بىلگەنىن ۇيرەتەدى. ادەتتە, ۇلتتىق ناقىشتاعى قازاق كادە­سىيلارىنىڭ دەنى قىتايدا جاسالاتىن. قارسىباەۆتىڭ قوندىرعىلارى قازاقستان نارىعىن ءوزى قىزدىراتىن بولادى. جۇمىس كوپ. سۇرانىس ۇلكەن. شەبەر­لەر قاتارى كوبەيىپ كەلەدى. باقتيار تايجان, «ەگەمەن قازاقستان». وڭتۇستىك قازاقستان وبلىسى.