جارىستار جاڭعىرىعى

ۆەلوسپورت. Astana كومانداسىنىڭ ۆەلوسپورتشىسى ديەگو روسا قولىنا ۆەلوسيپەد ۇستاپ مارەگە جاياۋ كەلدى. ول «باسك ەلىنىڭ تۋرى» جارىسىنىڭ بەسىنشى كەزەڭىن جەڭىپ الدى. مارەگە ساناۋلى سەكۋندتار قالعاندا ديەگو روسا ۆەلوسيپەدتەن ءتۇسىپ, ونى قولىنا الىپ, مارە سىزىعىن باسىپ ءوتتى. سول جەردە ۆەلوسيپەدتى باسىنان اسىرىپ, سىلكىلەگەن سپورتشىعا جانكۇيەرلەر قوشەمەت كورسەتتى. تۋردىڭ بەسىنشى كەزەڭىندە مارەگە ەكىنشى بولىپ 3 مينۋتتان كەيىن كولۋمبيالىق سەرحيو ەناو جەتتى. فۋتبول. سەنبى كۇنى قازاقستان پرەمەر-ليگاسىنىڭ 4 تۋرى ءوتتى. وسى تۋردا «قايرات» جاڭا باس جات­تىق­تىرۋشى گرۋزيالىق مامان كاحابەر تسحادادزەنىڭ جەتەك­شىلىگىمەن ءبىرىنشى جەڭىسىنە جەتتى. الماتى كومانداسى سىرت الاڭدا «اتىراۋدى» 1:0 ەسەبىمەن ۇتتى. ال,  قازاقستان سۋپەركۋبوگى ءۇشىن ماتچتا «قايراتتان» جەڭىلگەن «استانا» ءالى جەڭىلمەي كەلەدى. كوماندا ءتورت ويىننىڭ بارىندە قارسىلاستارىن جەڭدى. سوڭعى تۋردا استانالىقتار ءوز الاڭىندا «تارازدان» 2:1 ەسەبىمەن باسىم ءتۇستى. چەمپيوناتتا تاعى جەڭىلمەي كەلە جاتقان كوماندانىڭ ءبىرى – پاۆلوداردىڭ «ەرتىس» كلۋبى دا جەڭىسكە جەتتى. ولار قاراعاندىدا «شاحتەردى» 2:0 ەسەبىمەن ۇتتى. قازىر تۋرنير كەستەسىندە «استانا» مەن «ەرتىس» 12 ۇپايدان الىپ, توپ باستاپ كەلەدى. 4 تۋردا باسقا ماتچتار مىناداي ەسەپپەن اياقتالدى:  «ورداباسى» (شىمكەنت) – «توبىل» (قوستاناي) 2:2, «اقجايىق» (ورال) – «وقجەت­پەس» (كوك­شەتاۋ) 0:2, «اتىراۋ» (اتىراۋ) – «قاي­رات» (ال­ما­­تى) 0:1, «اقتوبە» (اقتوبە) – «جەتىسۋ» (تالدىقورعان) 3:2. حوككەي. قازاقستاننىڭ ايەلدەر قۇراما كومانداسى يتاليانىڭ ازياگو قالاسىندا وتكەن الەم چەم­پيوناتىنىڭ ءبىرىنشى ديۆيزيونىندا ءۇشىنشى ورىن الدى. قازاقستان «ۆ» توبىندا يتاليا, ۆەنگريا, لاتۆيا, قىتاي, نيدەرلاند قۇرامالارىمەن كەزدەستى. وتانداس­تارىمىز سوڭعى ماتچتا الاڭ يەلەرىمەن  ويناپ, 1:1 ەسەبى­مەن تەڭ ءتۇستى.  وسى توپتا ءبىرىنشى ورىندى ۆەنگريا حوككەي­شىلەرى جەڭىپ الدى. قازاقستان قىتاي مەن نيدەر­لاندتى جەڭىپ, ۇشەۋىندە ۇتىلىپ قالدى. «ۆ» توبىندا ءبىرىنشى ورىن العان ۆەنگريا «ا» توبىنا شىقتى. ال, «ا» توبىنىڭ جەڭىمپازى گەرمانيا كەلەسى جىلى توپ-ديۆيزيوندا وينايتىن بولادى. باسكەتبول. «استانا» كومانداسى ۆتب بىرىڭعاي ليگاسىندا جەتىنشى جەڭىسىنە جەتتى. كوماندا سىرت الاڭدا گرۋزيانىڭ «ۆيتۋ» كلۋبىمەن كەزدەسىپ, 62:53 (15:22, 16:8, 23:9, 8:14) ەسەبىمەن ۇتتى. بۇعان دەيىن «استانا» قاتارىنان 12 رەت جەڭىلگەن بولاتىن. قازىر قازاقستان كومانداسى تۋرنير كەستەسىندە 16 كلۋبتىڭ اراسىندا 15-ورىندا كەلە جاتىر. سوڭعى ورىندا «استانادان» ۇتىلعان ءتبيليسيدىڭ «ۆيتا» كومانداسى تۇر. «ەگەمەن-اقپارات».