قازاقستان مەن يران 1 ملرد. دوللار سوماسىنا 50 كەلىسىم جاساستى

استانا. 11 ءساۋىر. تەگەران قالاسىندا قازاقستان مەن يران ىسكەرلىك كەڭەسى ءوتتى. بۇل تۋرالى egemen.kz ءتىلشىسى حابارلادى. ونىڭ قورىتىندىسى بويىنشا ەكى ەل اراسىندا شامامەن 1 ملرد. اقش دوللارى سوماسىنا 50 كەلىسىمگە قول قويىلدى. ىسكەرلىك كەڭەستىڭ وتىرىسى پرەزيدەنت نۇرسۇلتان نازارباەۆتىڭ يران يسلام رەسپۋبليكاسىنا ساپارى اياسىندا بولىپ ءوتتى. وعان قازاقستان مەن يراننان 200-دەن استام كومپانيا قاتىستى. وتىرىستىڭ قورىتىندىسى بويىنشا ەكى ەلدىڭ بيزنەسمەندەرى شامامەن $1 ملرد. سوماسىنا ىنتىماقتاستىق تۋرالى 50 كەلىسىمگە قول قويدى. سونىڭ ىشىندە $304 ملن. سوماسىنا 9 قۇجاتقا «بايتەرەك» حولدينگىنىڭ توبى مەن ونىڭ ارىپتەستەرى قول قويدى. قازاقستاندىق-يراندىق ىسكەرلىك كەڭەستىڭ تەڭ توراعاسى «بايتەرەك» حولدينگىنىڭ باسقارما توراعاسى قۋاندىق بيشىمباەۆتىڭ ايتۋىنشا, قازاقستان مەن يران اراسىنداعى ەكىجاقتى قاتىناستىڭ بەلسەندى دامۋىنا ەكى ەلدىڭ مەملەكەت باسشىلارى ۇلكەن ءرول اتقاردى. داستان كەنجالين. دەرەك: egemen.kz فوتو:baiterek.gov.kz   baiterek.gov.kz