قوستاناي. 11 ءساۋىر. قوستانايدا قازاق كسر ەڭبەك سىڭىرگەن كىتاپحاناشىسى, تاريح عىلىمدارىنىڭ كانديداتى ءنازيرا داۋلەتوۆانىڭ 90 جىلدىعىنا ارنالعان ءىى «داۋلەتوۆا وقۋلارى» ءوتتى. بۇل تۋرالى egemen.kz ءتىلشىسى حابارلادى.
شاراعا وبلىستاعى اۋداندار مەن قالالار كىتاپحانالارى باسشىلارى, مادەنيەت سااسىنىڭ قىزمەتكەرلەرىمەن قاتار ءنازيرا داۋلەتوۆانىڭ بالالارى مەن نەمەرەلەرى, ۇلتتىق اكادەميالىق كىتاپحانانىڭ (الماتى ق.) باس ماماندارى قاتىستى. كىتاپحانا مەن كىتاپحاناشى ماماندىعىنىڭ قوعامداعى ءرولى مەن بەدەلىن كوتەرۋ جانە ءنازيرا قوجاحمەتقىزى داۋلەتوۆانىڭ عىلىمي مۇرالارىن ناسيحاتتاۋ ءۇشىن 2014 جىلى داۋلەتوۆا وقۋلارىن وتكىزۋ تۋرالى شەشىم قابىلدانعان بولاتىن. ول قوستانايدا ەكىنشى رەت ءوتىپ وتىر.
«داۋلەتوۆا وقۋلارى» كونفەرەنتسياسىندا وبلىستىق مادەنيەت باسقارماسىنىڭ باسشىسى لاريسا سەروۋس, ن.داۋلەتتوۆانىڭ قىزى عاليا جاقياقىزى, رەسپۋبليكالىق ۇلتتىق اكادەميالىق كىتاپحاناسى اقپاراتتىق-مادەني باعدارلامالار قىزمەتىنىڭ مەنەدجەرى مۇقيبەك اۋىت قۇتتىقتاۋ ءسوز سويلەدى. رەسپۋبليكالىق ۇلتتىق اكادەميالىق كىتاپحاناسىنىڭ انىقتامالىق-اقپاراتتىق قىزمەت كورسەتۋ قىزمەتىنىڭ جەتەكشىسى انار راحيموۆا ءنازيرا داۋلەتوۆانىڭ ەڭبەگىنە شولۋ جاساي وتىرىپ, ەلىمىزدە كىتاپحانا ءىسىن زاماناۋي دەڭگەيگە كوتەرۋدە كوپ جۇمىستار اتقارعان تۇلعانىڭ باسشى رەتىندەگى ەتيكاسى مەن تالاپ قويعىشتىعى بۇگىنگى مادەنيەت سالاسى قىزمەتكەرلەرىنە ۇلگى ەكەنىن ايتتى. ول اكادەميالىق ۇلتتىق كىتاپحانا قورىنان وبلىستىق امبەباپ كىتاپحاناعا سيرەك كىتاپتار سىيلادى. ودان كەيىن ل.تولستوي اتىنداعى قوستاناي وبلىستىق امبەباپ كىتپاحاناسىنىڭ ديرەكتورى داريعا دۇيسەباەۆا وبلىس وڭىرىندەگى كىتاپحانالاردىڭ داۋلەتوۆا ءداستۇرىن جالعاستىرىپ وتىرعان بۇگىنگى جۇمىسىن بايانداپ بەردى. ودان كەيىن التىنسارين مەموريالدىق مۇراجايىنىڭ قىزمەتكەرى شەكتىباەۆا نازگۇل, ل.تولستوي اتىنداعى وبلىستىق امبەباپ كىتاپحاناسىنىڭ عىلىمي قىزمەتكەرى ۇرقيا رىسجانوۆا, تاعى باسقالار ءسوز الىپ, حالقىمىزدىڭ قوستاناي وڭىرىنەن شىققان رۋحاني تۇلعالارىنىڭ كىتاپحانالاردا ناسيحاتتالۋىنا, وزگە دە ماڭىزدى ماسەلەلەرگە توقتالدى. كونفەرەنتسيا سوڭىندا ن.داۋلەتوۆا اتىنداعى «جىل كىتاپحاناشىسى» بايقاۋىنىڭ جەڭىمپازدارى ماراپاتتالدى. كونفەرەنتسياعا قاتىسۋشىلار كىتاپتار كورمەسىن دە تاماشالادى.
داۋلەتوۆا وقۋلارى الداعى جىلدارى دا جالعاسىن تاباتىن بولادى. كەلەسى جىلى ەستافەتانى سولتۇستىك قازاقستان وبلىسى الادى.
ءنازيرا جارىمبەتوۆا.
دەرەك, فوتو: egemen.kz.
