اقىن ولجاس سۇلەيمەنوۆ ۋنيۆەرسيتەتتىڭ «قۇرمەتتى دوكتورى» اتاندى

استانا. 9 ءساۋىر. اقىن, قوعام قايراتكەرى, «مادەنيەت» قورىنىڭ پرەزيدەنتى ولجاس سۇلەيمەنوۆكە تۇركيانىڭ ەرزۋرۋم قالاسىنداعى اتاتۇرىك ۋنيۆەرسيتەتىنىڭ «قۇرمەتتى دوكتورى» اتاعى بەرىلدى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. اقىنعا بۇل اتاق قازاقستان مەن تۇركيانىڭ مادەنيەتارالىق ديالوگىنىڭ دامۋىنا, حالىقتار اراسىنداعى دوستىقتىڭ كۇشەيۋى مەن تۇركولوگيا سالاسىنا سىڭىرگەن ايرىقشا ەڭبەگى ءۇشىن بەرىلدى. سونداي-اق, سالتاناتتى شارا ولجاس سۇلەيمەنوۆتىڭ 80 جىلدىق مەرەيتويىنا ورايلاستىرىلدى. جيىنعا قازاقستاننىڭ تۇركياداعى ەلشىسى جانسەيىت تۇيمەباەۆ, تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ, ەرزۋرۋم گۋبەرناتورى احمەت التىپارماق پەن تۇركيانىڭ قوعام جانە مادەنيەت قايراتكەرلەرى قاتىستى. بۇگىندە تۇركيانىڭ ەڭ ءىرى جوعارى وقۋ ورىندارىنىڭ ءبىرى سانالاتىن اتاتۇرىك ۋنيۆەرسيتەتىندە 72 مىڭعا جۋىق ستۋدەنت 23 فاكۋلتەتتە ءبىلىم الادى. مەرەيتويعا قاتىسقان ستۋدەنتتەر كەشتىڭ قىزىقتى وتكەنىن, اقىننىڭ ولەڭدەرىن ءسۇيىپ وقيتىنىن ايتتى. «ولجاس سۇلەيمەنوۆ قازاقستان مەن ورتا ازيا ەلدەرىندە عانا ەمەس, تۇركيادا دا تانىمال. ءبىز جاستايىمىزدان اقىننىڭ شىعارمالارىن وقىپ, رۋحاني قازىناسىنان سۋسىنداپ وستىك. مىنە, قايراتكەرمەن جۇزدەسۋ باقىتىنا دا يە بولىپ, قۋانىپ جاتىرمىز», – دەدى ۋنيۆەرسيتەت ستۋدەنتى ۆولكان يەشيلاي. سونداي-اق, ولجاس سۇلەيمەنوۆ تۇركيا پرەمەر-ءمينيسترىنىڭ ءبىرىنشى ورىنباسارى تۇعرىل تۇركەشپەن كەزدەستى. باسقوسۋدا قوعام قايراتكەرى ادامزات وركەنيەتىنە تۇركى حالىقتارىنىڭ قوسقان ۇلەسى جايلى وي قوزعاپ, «نەۆادا-سەمەي» قوزعالىسىنىڭ 25 جىلدىعىنا وراي شىعارىلعان, مەرەيتويلىق توسبەلگىنى تابىستادى. ال تۇركسوي حالىقارالىق ۇيىمىندا اقىننىڭ تۇركىتىلدەس حالىقتاردىڭ تىلىنە اۋدارىلعان ولەڭ جيناعى كوپشىلىككە تانىستىرىلدى. شارا سوڭىندا ولجاس سۇلەيمەنوۆ: «جاستارمەن كەزدەسىپ, ەرەكشە شابىت الدىم. ءبارى شەتىنەن ءبىلىمدى, العىر. بىزدەگى قاتارلاستارىمەن سالىستىرىپ, ورتاق ۇقساستىقتارى كوپ ەكەنىن اڭعاردىم. مۇنداعى مەنىڭ دوستارىم, ونىڭ ىشىندە كوپكە بەلگىلى زيالى قاۋىم وكىلدەرى الداعى مەرەيتويىما وراي بىرنەشە جيىن وتكىزىپ, توسىنسىي جاسادى. جيىلعان كوپشىلىك ماعان دەگەن اق تىلەكتەرىن جاۋدىردى», – دەدى. تالعات رايىمبەك. دەرەك: 24.kz. فوتو: Kazakh.ru.