وتپەن ويناعان تۇبىندە وپىق جەيدى

قازاقستان پرەزيدەنتىنىڭ ۆاشينگتوندا وتكەن سامميتتە جاساعان مالىمدەمەسى حالىقتىڭ قىزۋ قولداۋىنا يە بولۋدا. ەلباسىنىڭ ساياساتىن ۇنەمى قولداپ, باستامالارىنا ۇلەس قوسىپ جۇرگەن بەلگىلى كاسىپكەر, زاڭ عىلىمدارىنىڭ دوكتورى قايرات بالابيەۆكە جولىعىپ, پىكىرىن بىلگەن ەدىك. – داعدارىستىڭ العاشقى تول­قىنى سوققاندا ەلباسىنىڭ كاسىپكەرلەرگە جاساعان ءوتىنى­شىن ءبىرىنشى بولىپ قولداپ, الەۋ­مەت­تىك جاعىنان از قورعالعان وتبا­سى­لارعا كومەك قولىن سوزعان ەدىڭىز. بۇكىل الەم حالقىن تول­عان­دىر­عان سۇراقتار بو­يىن­شا وتكەن سامميتتە ايتىلعان ماسە­لە­لەرگە باي­لانىس­تى نە ايتاسىز؟ – قازاقستان – الەمدە ءبىرىنشى بو­­لىپ يادرولىق قارۋدان باس تارت­قان مەملەكەت. وسىدان اتتاي 25 جىل بۇرىن مەملەكەت باسشىسى نۇرسۇلتان نازارباەۆتىڭ باستاماسى­مەن سەمەي يادرولىق سىناق ايماعى ءبىر­جولا جابىلدى. ايتقانعا عانا وڭاي. قازاق حالقىن بۇراتانا ەل ساناپ, ولارمەن ەسەپتەسپەي قولىنان كە­لىپ تۇرعان سوڭ قونىشىنان باسقان كە­ڭەس وكىمەتىنىڭ قياناتىنىڭ زاردابىن قا­­را­پايىم حالىق ءالى دە تارتىپ كەلەدى. سەمەي پوليگونى­نىڭ زاردابى ەكى قولى جوق, باشپايىنىڭ ساۋساقتارىمەن سۋرەت سالىپ, يادرولىق قاسىرەتتى دۇنيەجۇزىنە اشكەرەلەگەن كارىپ­بەك كۇيىكوۆ سىندى ازا­مات­تاردىڭ كارىپ-تاع­دىرىمەن بىتكەن جوق. سەمەيدەگى سىناق پوليگونىنىڭ زاردابى, سوندا تۇراتىن حا­لىقتىڭ سۇيەگىنە سىڭگەن كەسەل وقتىن-وقتىن قايتالانىپ, تالاي وتباسىعا اششى ۋىن ىشكىزىپ كەلەدى. ونىڭ سىرتىندا كاپۋستين-يار, ازعىر سياقتى پوليگونداردا سول ماڭايدا تۇراتىن اۋىل تۇرعىندارىنىڭ دەنساۋلىعىنا ءوز زاردابىن تيگىزدى. وسىنىڭ ءبارىن وي ەلەگىنەن وتكىز­گەن نۇرسۇلتان ءابىش ۇلى ءبىرىنشى بولىپ يادرولىق قارۋدان باس تارتىپ, وزگەلەردى دە قا­تارىندا بولۋعا  شاقىر­دى. ارينە, قولىندا اپات قارۋى بار يادرولىق دەرجاۆا ەلدەرى مۇنداي كەلىسىمگە كونە سالادى دەۋ قيىن. بىراق, وتپەن ويناعان ءتۇبىن­دە وپىق جەيدى. – سولتۇستىك كورەيا مەم­لەكەتى يادرولىق قارۋ­دى سىناقتان ءوت­كىزىپ, كورشى­لەرىنىڭ عانا ەمەس, دۇنيە­جۇزىنىڭ يمانىن قاسىم ەتكەندىگى بەلگىلى. «تەنتەك شوقپار جينايدى» دەگەندەي, يادرولىق قارۋ جاساۋعا اۋەستەنۋدىڭ تۇبىندە قايىرى قالاي بولادى؟ – جەر شارى ونسىز دا قاۋىپتىڭ ۇستىندە وتىر. ءبىرىن ءبىرى مويىن­دا­عىسى كەلمەيتىن, بەيبىتشىلىكتى ساق­تاۋ­دان گورى اتىس قارۋىنا جۇگىنۋگە بەيىل زورلىقشىل مەملەكەتتەردىڭ, اپەرباقان اسكەر باسشىلارىنىڭ كەسىرىنەن ميلليونداعان بەيبىت جۇرت زارداپ شەگىپ جاتىر. وسىنداي جاعدايدا قازاقستان رەسپۋبليكاسى مەن امەريكا قۇراما شتاتتارىنىڭ يادرولىق قارۋدى تاراتپاۋ جانە يادرولىق قاۋىپسىزدىك سالاسىنداعى ىنتىماقتاستىق تۋرالى بىرلەسكەن مالىمدەمەسى بەيبىت ءومىر ءسۇرۋدى قالايتىن بارشا ازاماتتىڭ زور سۇيىسپەنشىلىگىنە يە بولدى. وسىندايدا كەۋدەڭدى ماقتانىش تا كەرنەيدى. كۇنى كەشە وزگە مەملەكەتكە بودان بولىپ, ەسىك كوزىندە كوزى جاۋتەڭدەپ وتىرعان قازاقستان ءوز الدىنا تاۋەلسىزدىگىن الۋمەن قاتار, دۇنيەجۇزىنىڭ ەڭ جاندى نۇك­تەسى قىرعي-قاباق سوعىستاردى بول­د­ىرماۋ, الدىن الۋ جونىندەگى كەلىسىمدەردە جەتەكشى ورىنعا شىق­تى. بۇل, ارينە, ەلباسىمىزدىڭ سىندارلى ساياساتىنىڭ جەمىسى. بىرلەسكەن مالىمدەمەدە امە­ري­كا قۇراما شتاتتارى قازاق­ستان رەسپۋبليكاسىنىڭ يادرولىق قاۋىپ­سىز­دىكتى نىعايتۋ, سونداي-اق, ۆاشينگتون, سەۋل جانە گااگا سام­ميت­­تەرى­نىڭ يادرولىق قاۋىپ­سىز­دىككە قار­سى شەشىمدەرىن ىسكە اسىرۋ ءجونىن­دەگى كۇش-جىگەرىن قۇپتايدى دەلىنگەن. الەمدەگى تەپە-تەڭدىكتى ساق­تاۋعا ۇيىتقى بولىپ, ۇلكەن اعانىڭ ورىن­­تاعىنا وتىرعان امەريكانىڭ قازاق­ستان پرەزيدەنتىنىڭ باستاماسىن قولداپ-قۋاتتاۋى تالاي كەدەر­گىلەردىڭ بەتىن قايتارادى, بەيبىت­شىلىكتى ورنىقتىرۋعا بارىنشا ىقپال ەتەدى. ۆاشينگتوندا وتكەن سامميتتە ەل­باسىمىزدىڭ ءححى عاسىردا الەمگە تىنىشتىق كەرەك, ءبىز بالالارىمىز بەن نەمەرەلەرىمىزدىڭ بولاشاعى تۋرالى ويلاۋعا ءتيىسپىز, دەپ تالاس-تارتىستاردىڭ سوعىس ارقىلى شەشىلمەيتىندىگىن تالداپ بەرۋىن الەم حالقى ماقۇلدادى. قانقۇيلى بىرەۋلەرگە بولماسا, ەلگە تىنىشتىق, بەيبىت ءومىر كەرەك. قازاقستان پرەزيدەنتى ادامزات ءۇشىن وتە قۇندى وسىنداي ماقساتقا قىزمەت ەتىپ كەلەدى. بۇل – ادامزات بالاسى ءۇشىن وتە ىزگىلىكتى قادام.  اڭگىمەلەسكەن باقتيار تايجان, «ەگەمەن قازاقستان». وڭتۇستىك قازاقستان وبلىسى.