جۇيەلى جۇمىستار جۇرگىزىلەدى

كەشە مەملەكەتتىك حاتشى گۇلشارا ابدىقالىقوۆانىڭ تورايىمدىعىمەن 1941-1945 جىلدارداعى ۇلى وتان سوعىسىنداعى جەڭىستىڭ 71 جىل­دىعىن مەرەكەلەۋگە دايىندىق ماسە­لەلەرىنە ارنالعان كەڭەس ءوتتى. جيىن­عا پرەزيدەنت اكىمشىلىگىنىڭ دەنساۋ­لىق ساقتاۋ جانە الەۋمەتتىك دامۋ, قور­عانىس, ءبىلىم جانە عىلىم, مادەنيەت جانە سپورت, ينۆەستيتسيالار جانە دامۋ مينيسترلىكتەرى مەن «قازاقستان رەس­پۋبليكاسىنىڭ ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ وكىلدەرى قاتىستى.  گ.ابدىقالىقوۆا مەملەكەت باس­شىسىنىڭ «ارداگەرلەر – ءبىزدىڭ قازى­نامىز» دەگەن سوزىنە ەرەكشە نازار اۋدارا كەلە, بۇگىنگى كۇنى ەلىمىزدە 3 668 ۇلى وتان سوعىسىنا قاتىسۋشى مەن ۇلى وتان سوعىسىنىڭ مۇگەدەگى, سو­عىسقا قاتىسۋشىلارعا تەڭەستىرىلگەن الەۋمەتتىك كەپىلدىگى بار 22 867 ادام تۇرىپ جاتقاندىعىن جەتكىزدى. مەملەكەتتىك حاتشى ءوز سوزىندە فاشيزم­دى جەڭۋ ىسىنە زور ۇلەس قوسقان جانە تاري­حي ميسسيانى ورىنداعان ۇلى وتان سوعىسىنىڭ ارداگەرلەرىنە, تىل ەڭبەك­كەرلەرىنە, قازاقستاندىقتارعا قۇرمەت كورسەتۋ جالپىمەملەكەتتىك اۋقىمداعى ماقسات ەكەنىن جەتكىزدى. جيىندا, سونداي-اق, بارلىق ورتالىق مەملەكەتتىك جانە جەرگىلىكتى اتقارۋشى ورگانداردىڭ نازارى سوعىسقا قاتىسۋشىلار مەن ولارعا تەڭەستىرىلگەن ادامدارعا جان-جاقتى الەۋمەتتىك-ەكونوميكالىق قولداۋ كورسەتۋدى قامتاماسىز ەتۋگە باعىتتالعاندىعى, جەرگىلىكتى بيۋدجەتتەردە 2016 جىلى جەڭىستىڭ 71 جىلدىعىنا وراي ارداگەرلەرگە ءبىر جولعى ماتەريالدىق كومەك كورسەتۋ ءۇشىن 2,6 ميلليارد تەڭگە قاراستىرىلعانى ايتىلدى. بۇعان قوسا, «قازاقستان رەسپۋبليكاسىنىڭ ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ باستاماسىمەن ارداگەرلەر قوزعالىسىنىڭ ودان ءارى دامۋىنا جانە ۇرپاقتار ساباقتاستىعىن قامتاماسىز ەتۋگە باعىتتالعان بىرقاتار الەۋمەتتىك جوبالار جۇزەگە اسىرىلىپ جاتىر ەكەن. ءسوزىنىڭ سوڭىندا گۇلشارا ناۋشاقىزى بارلىق ءىس-شارالار قازاقستان تاۋەلسىزدىگىنىڭ 25 جىلدىعى اياسىندا ءوتىپ, ەلدەگى قوعامدىق-ساياسي تۇراقتىلىقتى قامتاماسىز ەتۋگە, قوعامدى مەملەكەت باسشىسىنىڭ ساياساتى توڭىرەگىندە ۇيىستىرۋعا, جاس ۇرپاقتىڭ پاتريوتتىق سەزىمىن نىعايتۋعا باعىتتالۋى كەرەكتىگىن اتاپ ءوتتى. سونداي-اق, ول وتىرىس قورىتىندىسى بويىنشا مەملەكەتتىك ورگاندارعا بىرقاتار تاپسىرما جۇكتەدى. جيىن اياسىندا جۋرناليستەرگە بەرگەن سۇحباتىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا مەملەكەت تاراپىنان سوعىس ارداگەرلەرىنە ايرىقشا كوڭىل ءبولىنىپ كەلە جاتقاندىعىن, ماسەلەن, بيىلعى جىلى بارلىق زەينەتكەرگە بەرىلەتىن الەۋمەتتىك تولەمدەردىڭ كوتەرىلگەندىگىن, جالپى, ۇلى وتان سوعىسىنىڭ نەگىزگى قاتىسۋشىلارى مەن اردارگەرلەرىنىڭ مەملەكەتتىك بيۋدجەتتەن الىپ وتىرعان زەينەتاقىلارى وسكەندىگىن جەتكىزدى. «ءبىز اي سايىن ول قاراجاتتى ۋاقىتىندا بەرىپ وتىرمىز. ەكىنشى ۇلكەن كومەك – مەديتسينالىق كومەك. قازىر 3 ايدىڭ كولەمىندە ءبىز ۇلى وتان سوعىسىنا قاتىسۋشىلاردى جانە وعان تەڭەستىرىلگەن ازاماتتاردى مەديتسينالىق تەكسەرۋدەن وتكىزىپ, ديسپانسەرلىك كومەك كورسەتۋدى باستادىق. سونىمەن بىرگە, 15 مىڭعا جۋىق ۇلى وتان سوعىسىنا قاتىسۋشى مەن ولارعا تەڭەستىرىلگەن ازاماتتارعا 52 ملن. تەڭگەنىڭ كولەمىندە تەگىن ءدارى-دارمەك جەتكىزىپ بەردىك. 700-گە جۋىق سوعىسقا قاتىسۋشى مەن مۇگەدەكتى شيپاجايعا ەمدەلۋگە جىبەردىك. 200-گە تارتا ازاماتقا ءتىس پروتەزدەۋ, ەمدەۋ شارالارىن جۇرگىزىپ جاتىرمىز. جەڭىستىڭ 71 جىلدىعىنا وراي, سوعىس ارداگەرلەرى مەن مۇگەدەكتەرىنە 2,6 ملرد. تەڭگە كولەمىندە تاعى دا قوسىمشا قاراجات جۇمساعالى وتىرمىز. بۇلاردىڭ بارلىعى ولاردىڭ الەۋمەتتىك, ماتەريالدىق جاعدايىن دۇرىستاۋ ءۇشىن جاسالىپ جاتىر», – دەدى ت.دۇيسەنوۆا. ال «قازاقستان رەسپۋبليكاسىنىڭ ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ توراعاسى ومىرزاق وزعانباي وتكەن جىلى جەڭىستىڭ 70 جىلدىعىندا ۇلكەن شارالار اتقارىلعانىنا, بيىل دا مۇنداي شارالار جالعاسا بەرەتىنىنە توقتالدى. «ارينە, قازىرگى تاڭدا سوعىس ارداگەرلەرىنىڭ قاتارى ازايىپ بارادى. ءبىز سول جانداردىڭ جانە تىل ەڭبەككەرلەرىنىڭ الدىندا ءالى دە قارىزدارمىز. جالپى, تمد ەلدەرىن ءوز مەملەكەتىمىزبەن سالىستىرا قارايتىن بولساق, قازاقستاندا ءبىر مەزگىل بەرىلەتىن كومەك, زەينەتاقى, الەۋمەتتىك تولەماقىنىڭ مولشەرى اناعۇرلىم كوپ. بۇل جاعىنان العاندا, ەلىمىز ارداگەرلەرىنىڭ جاعدايى جاقسى. ءبىز ولاردان كوشىلگەرى تۇرمىز. ماسەلەن, ءبىر عانا الماتى وبلىسىنداعى 73 ارداگەرگە باسپانا بەرىلدى. ماڭعىستاۋ وبلىسىنداعى 60 ارداگەر دە ۇيمەن قامتاماسىز ەتىلدى. بۇعان قوسا, سوعىس ارداگەرلەرى مەن مۇگەدەكتەردىڭ ۇيلەرىنە جوندەۋ جۇمىستارىن جۇرگىزۋ دە مەملەكەتتىڭ نازارىندا تۇر. بۇل رەتتە, وڭتۇستىك قازاقستان وبلىسى 300-دەي ارداگەردىڭ تۇرىپ جاتقان باسپاناسىنا جوندەۋ جۇمىستارىن جۇرگىزىپ بەردى. بيىلعى جىلى دا مۇنداي يگى شارالار توقتاپ قالمايدى. سەبەبى, ەل ءۇشىن قار توسەنىپ, مۇز جاستانعان قارتتارىمىزدىڭ الدىنداعى پەرزەنتتىك قارىزىمىز بەن پارىزىمىزدى ەشقاشان سانامىزدان شىعارىپ الماۋىمىز كەرەك», – دەدى ءو.وزعانباي. ءلايلا ەدىلقىزى, «ەگەمەن قازاقستان».