ءوزارا ىنتىماقتاستىققا ءورىس كەڭ

جاقىندا ەكسپو-2017 حالىقارالىق مامانداندىرىلعان كورمەسىنىڭ كوميسسارى ءراپىل جوشىباەۆ باستاعان قازاقستاندىق دەلەگاتسيانىڭ سينگاپۋر رەسپۋبليكاسىنا ساپارى ءوتتى. ساپار كەزىندە ر.جوشىباەۆ سين­گاپۋر رەسپۋبليكاسىنىڭ جوعارعى مەملەكەتتىك سىرتقى ىستەر ءمينيسترى مۇحاماد ماليكي وسمانمەن, تۋريستىك اگەنتتەر ۇلتتىق اسسوتسياتسياسىنىڭ پرەزيدەنتى دەۆيندەر وريمەن, ساۋدا جانە يندۋستريا مينيسترلىگى باسشىلارىمەن, سينگاپۋردىڭ ەكسپو-2017-گە قاتىسۋىنا جاۋاپتى تۇلعالارمەن جانە مەملەكەتتىڭ ىسكەرلىك توپتارىمەن كەزدەستى. سينگاپۋردىڭ سىرتقى ساياسات ۆەدومستۆوسىندا ەكى ەل ىنتىماق­تاستىعىنىڭ احۋالى مەن پەرسپەكتيۆالارى تالقىلاندى جانە سينگاپۋرلىق تاراپتىڭ ەكسپو-2017-گە قاتىسۋى تۋرالى پىكىرلەرمەن الماسۋى ءوتتى. كوميسسار سۇحباتتاسۋشىعا قا­زاق­ستاننىڭ كورمەگە دايىندىق شەڭ­بەرىندەگى اتقارىلىپ جاتقان جۇمىسى تۋرالى حابارلادى. م.وسمان ءوزى تارا­پىنان سينگاپۋر مەملەكەتىنىڭ حالىق­ارالىق كورمەگە قاتىسۋ قى­زى­عۋشىلىعى تۋرالى جانە كورمە­نىڭ الەمدىك قوعامداستىققا ماڭىز­دى­لىعىن اتادى. سينگاپۋردىڭ حالىقارالىق كور­مەلەرگە قاتىسۋى ءۇشىن جاۋاپتى ساۋدا جانە يندۋستريا مينيسترلىگىندە ەكسپو-2017 كورمەسى تۋرالى تۇساۋ­كەسەر وتكىزىلدى. كەزدەسۋدە مەملەكەتتىك بيۋدجەتتەن دامۋىنا 2007 جىلدان بەرى «جاسىل» ەنەرگەتيكا سەكتورىنىڭ 3,4 ملرد. دوللار بولىنەتىندىگى ەسكەرىلدى. بۇگىن بۇل سالا 18 مىڭ جۇمىس ورنىن قامتاماسىز ەتەدى. تاراپتار سينگاپۋردىڭ «جاسىل» ەنەرگەتيكا سالاسىنداعى جەتىستىكتەرىن كورسەتۋگە ەكسپو-2017 كورمەسى جاقسى الاڭ بولاتىنىنا سەنىم ءبىلدىردى. تۋريزم سالاسىندا بىرلەسكەن جو­بالاردىڭ جۇزەگە اسىرىلۋى, سين­گاپۋرلىق تۋريستىك كومپانيالاردى ىن­تى­ماقتاستىققا تارتۋ جانە ەكى ەل استا­ناسى اراسىندا اۋە قاتىناسىن اشۋ مۇمكىندىگى سينگاپۋردىڭ تۋريس­تىك اگەنتتەر ۇلتتىق اسسوتسياتسياسىندا (تاۇا) تالقىلاندى. كەزدەسۋلەر ناتيجەسىندە «استانا ەكسپو-2017» ۇلتتىق كومپانياسى مەن تاۇا اراسىندا تۋريزم بويىنشا ىنتىماقتاستىق مەموراندۋمىنا قول قويىلدى. قۇجات بويىنشا ەكسپو-2017 كورمەسىن سينگاپۋردا جانە قازاقستاندى سينگاپۋردىڭ ەڭ تارتىمدى تۋريستىك باعىتتارى رەتىندە ىلگەرىلەتۋ كۇتىلۋدە.   «ەگەمەن-اقپارات».