كەمبريدجدەن كەلىپ ءدارىس وقىدى

كەشە ۇلتتىق اكادەميالىق كىتاپ­حانادا پارسى ادەبيەتىنىڭ كورنەكتى وكىلى, اقىن ءفيردوۋسيدىڭ «شاحناما» داستانىنا ارنالعان سەمينار ءوتتى. سەمينار جۇمىسىنا «شاحناما» كەمبريدج ورتالىعىنىڭ پارسى زەرتتەۋلەرى بويىنشا جە­تەكشىسى (كەمبريدج ۋنيۆەرسيتەتى) فيرۋزا مەل­ۆيلل (ابدۋللاەۆا) جانە اتالعان وقۋ ورنىنىڭ پروفەسسورى, تاريحشى مەلۆيلل چارلز پەتەر قاتىسىپ, «شاحنامە» تاقىرىبىندا ءدارىس وقىدى. جيىن بارىسىندا ۇلتتىق اكادەميالىق كى­تاپحانا مەن كەمبريدج ۋنيۆەرسيتەتىنىڭ ارا­سىنداعى عىلىمي جوبالار, بىرلەسكەن كونفەرەنتسيالار, كىتاپ كورمەلەرى, دوڭگەلەك ۇستەلدەر, دارىستىك كۋرستار, كىتاپ شىعارۋ سالاسىنداعى ءوزارا ىنتىماقتاستىق ماسەلەلەرى تالقىلاندى. فيرۋزا مەلۆيلل (ابدۋللاەۆا) مەن مەلۆيلل چارلز پەتەر ۇلتتىق كىتاپحاناداعى سيرەك باسىلىمدار جانە قولجازبالار توپتاماسىمەن تانىسىپ, قوردا ساقتالعان كىتاپتاردىڭ تاريحىنان ماڭىزدى ماعلۇماتتار الدى. شەتەلدىك پروفەسسورلار ەلىمىزگە قازاقستان رەسپۋبليكاسىنىڭ ۇلىبريتانياداعى ەلشىلىگىنىڭ قولداۋ كورسەتۋى ناتيجەسىندە, سونداي-اق, مادەنيەت جانە سپورت مينيسترلىگىنىڭ, سونىمەن بىرگە, ۇلتتىق اكادەميالىق كىتاپحانانىڭ شاقىرۋىمەن ارنايى كەلگەنىن ەستەرىڭىزگە سالامىز. بۇل باسقوسۋ ۇلتتىق كىتاپحانا باسشىسى ءۇمىت­حان مۇڭالباەۆانىڭ ۇلىبريتانيا كىتاپ­حا­نالارىنا جاساعان جۇمىس ساپارىنىڭ ارقاسىندا جۇزەگە اسقانىن ايتا كەتسەك دەيمىز. ەكىجاقتى ىنتىماقتاسۋ پەرسپەكتيۆالارىن تالقىلاۋ ماق­ساتىندا كەمبريدج ۋنيۆەرسيتەتىنىڭ پروفەسسورلارى الداعى ۋاقىتتا حالىقارالىق ءتۇر­كى اكادەمياسىنا, نازارباەۆ ۋنيۆەرسيتەتكە جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنە دە بارۋدى جوسپارلاپ وتىر. راۋان قايدار, «ەگەمەن قازاقستان».