سارباز ءومىرىن ساقتاپ قالعان

پولكوۆنيكتىڭ ەرلىگى ەرەكشە باعاعا لايىق بەيبىت كۇننىڭ وزىندە قارۋ اتىلىپ, بومبا جارىلادى. بەيبىت كۇننىڭ وزىندە كوزسىز ەرلىكتەر جاسالىپ جاتادى. قاراعاندى وبلىسىنداعى اسكەري بولىمشەلەردىڭ بىرىندە بولعان وقيعا وسىعان كوزدى تاعى ءبىر مارتە جەتكىزدى. وقىس وقيعا وڭىردەگى قاراباس كەنتىندە ورىن تەپكەن №6505 اسكەري بولىمشەسىنىڭ وقۋ ورتالىعىندا بولدى. قاتارداعى جاۋىنگەر ابزال سۇلتانقۇلوۆ اسكەري جاتتىعۋ بارىسىندا رگد-5 گراناتاسىن نىساناعا قاراي لاقتىرۋى ءتيىس بولاتىن. الايدا, قاتەرلى قارۋدى قولىنا العاش ۇستاعان سارباز ساسقالاقتاپ قالىپ, لاقتىرعان گراناتاسى وكوپتىڭ جيەگىنە ءتيىپ, ودان دومالاپ بارىپ اياعىنىڭ استىنا تۇسكەن. سول كەزدە ساربازدىڭ جانىندا تۇرعان پولكوۆنيك قايرات ۇمبەتوۆ شالت قيمىلمەن جاۋىنگەردى يتەرىپ جىبەرىپ, ونى دەنەسىمەن جابا ۇستىنە قۇلاعان. سول ساتتە گراناتا دا قارا جەردى سولق ەتكىزىپ جارىلعان. جارىلىستىڭ سالدارىنان قايرات ۇمبەتوۆ يىعىنان جانە وڭ جاق اياعىنىڭ تىزەدەن تومەن جەرىنەن جاراقات الدى. ال, سارباز ابزال سۇلتان­قۇلوۆتىڭ جامباس تۇسىنا جارىقشاق تيگەن. بۇگىنگى كۇندە ەكەۋى دە دارىگەرلەردەن ءتيىستى كومەكتى الدى. مەديتسينا ماماندارىنىڭ ايتۋىنشا, قۇداي ساقتاپ, ەكەۋىنىڭ دە جاراقاتى جەڭىل بولعان. وسى ەرلىگى ءۇشىن پولكوۆنيك مەملەكەتتىك ناگراداعا ۇسىنىلدى. قايرات ۇمبەتوۆتىڭ اسكەري قىز­­مەت­تە جۇرگەنىنە – 21 جىل. ءبىر جىلدان بەرى №6505 اسكەري بولىمشەسىندە شتاب باسشىسى بولىپ قىز­مەت ەتەدى. وتباسىندا زايىبى ەكەۋى ءبىر ۇلدى ءتار­بيەلەپ جاتقان ۇلگىلى اكە. «مەن ءوزىمدى باتىرمىن دەپ سانامايمىن. مەنىڭ ىستەگەنىم – كەز كەلگەن وفيتسەردىڭ موينىنداعى كۇندەلىكتى مىندەت», – دەيدى ول. قايرات ءابىلدينوۆ, «ەگەمەن قازاقستان». قاراعاندى.