ارگەنتيناداعى جاڭبىردان مىڭداعان تۇرعىن زارداپ شەكتى

استانا. 7 ءساۋىر. ارگەنتينانىڭ بىرنەشە پروۆينتسياسىندا تولاسسىز جاۋعان جاڭبىردان مىڭداعان ادام زارداپ شەكتى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ەنترە-ريوس, كوررەنتەس جانە فورموسا پروۆينتسيالارىنىڭ توتەنشە جاعدايلار جونىندەگى فەدەرالدى باسقارماسىنىڭ مالىمدەۋىنشە, 9 مىڭنان استام ادامنىڭ ءۇيى مەن دۇنيە-مۇلكىنە شىعىن كەلگەن. ولاردىڭ باسىم كوپشىلىگى ەنترە-ريوس پروۆينتسياسى مەن لا-پاس قالاسىنىڭ تۇرعىندارى. اتالعان ايماقتىڭ حالقى باسپانالارىن تاستاپ كەتۋگە ءماجبۇر بولعان. Telam اگەنتتىگىنىڭ حابارلاۋىنشا, ارگەنتينانىڭ ىشكى ىستەر مينيسترلىگى جانە وزگە دە ۆەدومستۆولار جاپا شەككەندەر مەن شىعىن كولەمىن انىقتاۋ ءۇشىن ارنايى مونيتورينگ جۇرگىزۋدى باستادى. ايتا كەتەيىك, 2015 جىلدىڭ سوڭىنا تامان تاسقىن سۋدىڭ سالدارىنان وڭتۇستىك امەريكانىڭ بىرقاتار ەلدەرىنە ايتارلىقتاي شىعىن كەلگەن. مالىمەتتەرگە سايكەس, 150 مىڭنان استام ادامعا ماتەريالدىق كومەك كورسەتىلدى. تروپيكالىق جاڭبىردىڭ اسەرىنەن پاراگۆاي, ارگەنتينا جانە برازيليانىڭ كوپتەگەن ەلدى مەكەندەرىن سۋ شايىپ كەتكەن بولاتىن. ايان ءابدۋالي. دەرەك: ريا «نوۆوستي». فوتو: vseneprostotak.ru.