بۇۇ دامۋ باعدارلاماسىنىڭ باسشىسى حەلەن كلارك وسى ۇيىمنىڭ باس حاتشىسى قىزمەتىنە كانديداتتاردىڭ قاتارىنا قوسىلدى. بۇل جونىندە «ۆۆس» اقپارات اگەنتتىگى حابارلادى.
حەلەن كلارك – بۇۇ قىزمەتكەرلەرى اراسىندا لاۋازىمى جاعىنان ەڭ جوعارى تۇرعان ايەل بولىپ سانالادى. ەگەر ول سايلاۋدا جەڭىسكە جەتىپ, باس حاتشىلىققا سايلانعان جاعدايدا, ول بۇۇ تاريحىندا باس حاتشى لاۋازىمىنداعى تۇڭعىش ايەل اتانادى. ح.كلارك «اسسوشيەيتەد پرەسس» اقپارات اگەنتتىگىنە بەرگەن سۇحباتىندا: «ۇيىم باسشىلىعىنا ءوز كانديداتۋرامدى ۇسىنىپ وتىرمىن. بۇۇ-دا جانە ءوز ەلىمدەگى باسشىلىق قىزمەتىمدە 30 جىلدان استام تاجىريبەم بار», – دەدى ول ءوزىنىڭ قابىلداعان شەشىمىنە بايلانىستى. بۇۇ-عا قىزمەتكە كەلگەنگە دەيىن ول جاڭا زەلانديادا 9 جىل پرەمەر-مينيستر بولدى. بۇۇ باس حاتشىسى پان گي مۋننىڭ قىزمەتتىك مەرزىمى 2016 جىلدىڭ 31 جەلتوقسانىندا اياقتالادى. باس حاتشىلىققا كانديداتتاردىڭ سانى قازىرگە سەگىز ادامعا جەتتى.
تاعى ءبىر قىتايلىق شەنەۋنىك ايىپتالدى
قحر ورتالىق اسكەري كەڭەسى توراعاسىنىڭ بۇرىنعى ورىنباسارى گو بوسيۋن 80 ميلليون يۋان (12,3 ميلليون دوللار) كولەمىندە پارا الدى دەپ ايىپتالدى. بۇل اقپاراتتى جەرگىلىكتى باق قىتاي حالىق-ازاتتىق ارمياسىنان الىنعان دەرەككوزگە سىلتەمە جاساۋ ارقىلى تاراتتى.
باسىلىمداعى اقپاراتقا قاراعاندا, بۇل ءبوسيۋننىڭ اسكەري قىزمەت جولىندا العان پاراسىنىڭ ءبىر بولىگى عانا بولسا كەرەك. ويتكەنى, ول وزىنە باعىنىشتى اسكەري قىزمەتشىلەردىڭ قىزمەتىن ءوسىرۋ ءۇشىن ولاردان پارا الۋدى ادەتكە اينالدىرعان. جەمقورلىققا سالىنعانى ءۇشىن ايىپتالىپ وتىرعان گو بوسيۋن قحر قۇرىلعان 1949 جىلدان بەرگى ارالىقتا ەلدىڭ اسكەري كۇشتەرىندە ەڭ جوعارى لاۋازىمداعى جەتەكشىلەردىڭ ءبىرى بولىپ كەلدى. كەيبىر دەرەكتەر بويىنشا, وعان قاتىستى اسكەري سوت ءىسى جابىق رەجىمدە ءوتۋى مۇمكىن. وعان قاتىستى تەرگەۋ-تەكسەرۋ امالدارى وتكەن جىلدىڭ ساۋىرىندە باستالىپتى. سونداي-اق, ول شىلدە ايىندا قىتاي كوممۋنيستىك پارتياسى قاتارىنان شىعارىلعان.
قىسقا قايىرىپ ايتقاندا:
* «Amnesty international» قۇقىق قورعاۋ ۇيىمى الەمدە ءولىم جازاسىنىڭ سانى كۇرت ءوسىپ, 1989 جىلدان بەرگى كەزەڭدە ەڭ جوعارى كورسەتكىشكە جەتكەنىن حابارلادى. مىسالى, وتكەن جىلى الەم بويىنشا 1634 ادام ءولىم جازاسىنا كەسىلگەن. بۇل 2014 جىلعىدان 50 پايىز كوپ.
* وار پرەزيدەنتى دجەيكوب زۋما ءوز ءۇيىن جوندەۋگە جۇمساعان 20 ميلليون دوللاردان استام اقشانى قايتاراتىن بولدى. سوت وعان وسىنشاما قارجىنى قايتارۋدى مىندەتتەگەن ەدى. «مەن سوت شەشىمىن قۇرمەتتەيمىن جانە ونى ورىندايمىن», – دەدى ول جاساعان مالىمدەمەسىندە.
* جاڭا ورلەان (اقش) سوتى قورشاعان ورتانىڭ لاستانۋىنا سوقتىرعان ءىرى اپات ءۇشىن ۆر كومپانياسىن 20,8 ميلليارد دوللار تولەۋگە مىندەتتەدى. بۇل تاريحتاعى ەڭ ۇلكەن ايىپپۇل بولىپ سانالادى. ونى تولەۋ 18 جىلعا بولىنگەن.
* ازەربايجاننىڭ قورعانىس مينيسترلىگى ارمەنيا تاراپىنىڭ تاۋلى قاراباقتا ءبىتىم جاريالانعاننان بەرى كەلىسىمدى 115 رەت بۇزعانىن مالىمدەدى. تاراپتار, سونداي-اق, قاقتىعىستان كەلگەن شىعىندارىن جاريا ەتتى. ءوزىن ءوزى جاريالاعان تاۋلى قاراباق بيلىگى 29 ادامنىڭ قازا تاپقانىن, ال ازەربايجان 31 اسكەردىڭ وققا ۇشقانىن حابارلادى.
ءبىر تاۋلىككە جۇمىسىن توقتاتادى
گرەكيا ازاماتتىق اۆياتسيا قىزمەتكەرلەرىنىڭ 24 ساعاتتىق نارازىلىق اكتسياسىنا شىعۋىنا بايلانىستى بۇگىن, ياعني 7 ساۋىردە ەلدىڭ اۋەجايلارى جۇمىس ىستەمەيدى.
«نوۆوستي» اقپارات اگەنتتىگىنىڭ حابارلاۋىنشا, بۇل كۇنى اۋەجايلاردان ۇشاقتار اۋە كەڭىستىگىنە كوتەرىلمەيدى. سەبەبى, ازاماتتىق اۆياتسيا قىزمەتكەرلەرىنىڭ فەدەراتسياسى مەملەكەتتىك سەكتورداعى ADEDY كاسىبي وداقتارىنىڭ الەۋمەتتىك قامتۋ جۇيەسىن جويۋعا قاتىستى نارازىلىعىنا قوسىلعان. سونىمەن قاتار, ازاماتتىق اۆياتسيا قىزمەتكەرلەرى تاعى ءبىر تالاپ قويىپ وتىر. ول – ەلدەگى مەملەكەتتىك اۋەجايلاردى ساتۋعا جول بەرمەۋ. بۇگىندە گرەكيا بيلىگى 14 اۋەجايدى ساتۋعا شىعارعان. نەگىزىندە ولاردى گەرمانيانىڭ كومپانيالارى ساتىپ الۋعا نيەت بىلدىرگەن.
وتستاۆكاعا كەتۋگە ءوتىنىش ءبىلدىردى
يسلانديا ۇكىمەتىنىڭ باسشىسى زيگماند دەۆيد گۋننلاۋگسسون «پاناما قۇجاتتارىندا» جەمقورلىققا قاتىسى بارى تۋرالى مالىمەتتەر جاريا ەتىلگەن سوڭ, وتستاۆكاعا كەتۋگە ءوتىنىش ءبىلدىردى.
قازىرگى كەزدە الەمدىك دەڭگەيدە داۋ تۋدىرعان «پاناما قۇجاتتارى» اتالعان ەسەپتە يسلانديا پرەمەر-ءمينيسترىنىڭ زايىبىنىڭ ەلدەگى بانكتەردە ۇلكەن ۇلەسى بار وففشورلىق كومپانياعا يەلىك ەتەتىنى كەلتىرىلگەن. يسلانديانىڭ بالىق جانە اۋىل شارۋاشىلىعى ءمينيسترى قىزمەتىن اتقاراتىن زيگۋردۋر ينگي يوحانسسون ءوزىنىڭ كانديداتۋراسىن پرەمەرلىككە ۇسىناتىنىن مالىمدەدى. ال پرەمەر-مينيستر ز.گۋننلاۋگسسون يسلانديا پرەزيدەنتىنەن «پاناما قۇجاتتارىنا» بايلانىستى تۋىنداعان نارازىلىق اكتسيالارى مەن وزىنە سەنىمسىزدىك ۆوتۋمىن ءبىلدىرۋ قاۋپى بولۋى ىقتيمالدىعىنا قاتىستى پارلامەنتتى تاراتۋدى سۇراعان.
كۇدىكتى رەتىندە التى يمام ۇستالدى
تاجىكستاندىق بۇقارالىق اقپارات قۇرالدارىنىڭ حابارلاۋىنشا, ەلدە ەكسترەميستىك توپتارعا قاتىسى بار دەگەن كۇدىك بويىنشا التى يمام ۇستالعان. پروكۋراتۋرا كۇدىكتىلەردىڭ قانداي ەكسترەميستىك توپتارعا مۇشە بولعانىن اتامادى.
ەگەر ۇستالعان يمامداردىڭ كىنالى ەكەنى دالەلدەنەتىن بولسا, ولار التى جىلعا دەيىنگى مەرزىمگە باس بوستاندىعىنان ايىرىلۋى جانە ولارعا ۇلكەن كولەمدە ايىپپۇل سالىنۋى مۇمكىن. وتكەن جىلى وسى ەلدە وننان استام ادام «دجاماات انسارۋللا» يسلامشىل ۇيىمىنا كىردى دەگەن ايىپپەن سوتتالعان ەدى. تاجىكستان بيلىگى وسى ۇيىمدى ەل اۋماعىندا تىيىم سالىنعان «وزبەكستان يسلام قوزعالىسى» ۇيىمىمەن بايلانىسى بار دەپ اتايدى. ال «وزبەكستان يسلام قوزعالىسىنىڭ» اۋعانستان مەن پاكىستانداعى «ءال-كايدا» جانە «تاليبان» ەكسترەميستىك ۇيىمدارىمەن بايلانىستا ەكەندىگى دالەلدەنگەن. تاجىكستان قۇقىق قورعاۋ ورگاندارىنىڭ مالىمەتىنە قاراعاندا, بۇگىندە وسى ەلدىڭ ءبىر مىڭعا جۋىق ازاماتى سيريا مەن يراكتاعى «يسلام مەملەكەتىنىڭ» قۇرامىندا ءجۇر.
ەلدىڭ قاۋىپسىزدىگىنە زالال كەلتىرۋى مۇمكىن
«بي-بي-سي» اگەنتتىگىنىڭ تاراتقان اقپاراتتارىنا قاراعاندا, حاكەرلەر توبى جەلىگە تۇركيانىڭ 50 ميلليون ازاماتىنىڭ جەكە مالىمەتى بار دەگەن دەرەكتەر قورىن ورنالاستىرعان.
ونىڭ ىشىندە ەل پرەزيدەنتى مەن ۇكىمەت باسشىسىنىڭ دا جەكە مالىمەتتەرى بار كورىنەدى. ساراپشىلاردىڭ ايتۋىنشا, حاكەرلەردىڭ وسى مالىمدەمەسى راستالاتىن بولسا, بۇل الەمدە ەڭ اۋقىمدى جەكە مالىمەتتەردىڭ جاريا ەتىلۋى بولادى ەكەن. ساراپشىلار جەكە مالىمەتتەردىڭ جاريالانۋى تۇركيا حالقىنىڭ قاۋىپسىزدىگىنە زالال كەلتىرەدى دەپ ەسەپتەيدى. قۇپيا اقپاراتتاردىڭ حاكەرلەردىڭ قولىنا قالاي تۇسكەنى قازىرگە بەلگىسىز. بولجام بويىنشا, مۇنداعى باستى ماقسات – تۇركيا پرەزيدەنتى رەجەپ تايىپ ەردوعان مەن وسى ەلدىڭ ەليتاسىنا قارسى باعىتتالعان «ساياسي ويىن» بولۋى مۇمكىن. «اسسوشيەيتەد پرەسس» اگەنتتىگى تۇركيالىق 10 ازاماتتىڭ سايكەستەندىرۋ نومىرلەرىن تەكسەرگەندە, ونىڭ 8-ءى دۇرىس مالىمەت بولعاندىعىن حابارلادى.
ينتەرنەت ماتەريالدارى نەگىزىندە ازىرلەندى.
