ىقپالداستىقتى تەرەڭدەتۋ تۇرعىسىنداعى شارالار

قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆ بەينەكونفەرەنتسيا تۇرىندە وتكەن ەۋرازيالىق ەكو­نوميكالىق كوميسسيا كەڭەسىنىڭ (ەەك) وتىرىسىنا قاتىستى, دەپ حابارلادى پرەمەر-ءمينيستردىڭ ءباسپاسوز قىزمەتى. كەڭەس مۇشەلەرى ەۋرازيالىق ەكونو­ميكالىق وداققا (ەاەو) قاتىسۋشى ەل­دەر­دىڭ ەكو­نوميكالىق ينتەگراتسياسىن تە­رەڭ­دەتۋگە باعىتتالعان بىرقاتار قۇجات­تاردى تالقىلادى. وتىرىستا ەاەو تۋرالى شارتقا سايكەس اكتىلەر مەن حالىقارالىق كەلىسىمشارتتاردى ازىرلەۋدىڭ جۇمىس جوسپارىنىڭ ورىندالۋ بارىسى قارالدى. جوسپارداعى ءىس-شارالاردى ورىنداۋ «ءتورت ەركىندىك» – تاۋارلاردىڭ, قىزمەتتەردىڭ, كاپيتال مەن جۇمىس كۇشىنىڭ ەركىن قوزعالىسى قاعيداتىن جۇزەگە اسىرۋعا جاعداي جاسايدى. كەڭەس مۇشەلەرى بۇتىندەي العاندا, دامۋشى جانە ازىراق دامىعان ەلدەرمەن ساۋدا-ساتتىق ءۇشىن جاعدايلاردى كەڭەيتۋگە مۇمكىندىك بەرەتىن ەاەو-نىڭ تاريفتىك پرەفەرەنتسيالارىنىڭ بىرەگەي جۇيەسىن قولدانۋدىڭ شارتتارى مەن ءتارتىبى تۋرالى ەرەجەنى قۋاتتادى. ەەك كەڭەسى وتىرىسىنىڭ شەڭبەرىندە ەاەو-نىڭ ينتەگراتسيالانعان اقپاراتتىق جۇيەسى نەگىزىندە كەدەن قىزمەتتەرى مەن باسقا دا قۇزىرلى ورگانداردىڭ اقپاراتتىق جۇيەلەرىنىڭ سايكەستىلىك جوسپار-كەستەسى تالقىلاندى. ءتيىستى ءىس-شارالاردى جۇرگىزۋ تاۋارلارعا ولاردى كەدەن اۋماعىنا ەنگىزۋ ساتىنەن باستاپ تۇتىنۋشىلارعا ساتقانعا دەيىن قاداعالاۋدى قامتاماسىز ەتەدى. ءۇشىنشى ەلدەرمەن ءوزارا ساۋداداعى تەحنيكالىق توسقاۋىلداردى جويۋ ءۇشىن ەەك كەڭەسىنىڭ وتىرىسىندا ءتيىستى حالىقارالىق كەلىسىمشارتتى دايىنداۋدى جەدەلدەتۋ تاپسىرىلدى.