قولدان كەلگەننىڭ ءبارى جاسالۋدا

– ع.مۇسىرەپوۆ اۋدانىندا ورنالاسقان شارىق گيدروتورابى ەرىگەن قار سۋىنا تولىپ, كەمە­رىنەن استى. سونىڭ سالدارىنان ماڭايىنداعى ەلدى مەكەن تۇر­عىندارىن كوشىرۋ جۇمىس­تارى باستالدى, – دەدى قارعىن سۋدىڭ اۋا جايىلۋىنان زارداپ شەك­كەن­دەردىڭ جايىن بىلمەك بولىپ حا­بار­لاسقانىمىزدا وبلىس­تىق توتەنشە جاعدايلار دەپارتا­مەنتىنىڭ باس مامانى ەۆگەني جۋراۆلەۆ. جەرگىلىكتى بيلىك ورىندارىنىڭ, ىشكى ىستەر, توتەنشە جاعدايلار بولىمدەرىنىڭ جۇمىلا كۇش سالۋىنىڭ ارقاسىندا سۋ قويماسىنا تاقاۋ ورنالاسقان مادەنيەت اۋى­لىنان – 34, گاۆريلوۆكا اۋىلىنان 78 ادام قاۋىپسىز جەرلەرگە قونىستاندىرىلىپتى. قاردىڭ كۇرت ەرۋى سالدارىنان اققايىڭ اۋدانىنداعى سميرنوۆ كەنتىنىڭ كوشەلەرىن سۋ باسقان. باسقا تۇرعىن ۇيلەرگە دە قاۋىپ تۋىنداعان. استانا قالالىق ءورت ءسوندىرۋ جانە اپاتتىق قۇتقارۋ قىزمەتىنىڭ وكىلدەرى سۋ ايداۋعا ءجىتى كىرىسكەن. شال اقىن اۋدانىنا قاراستى جاڭاجول اۋىلىندا دا كۇردەلى جاعداي قالىپتاسقان. جىلبىسقى قارمەن بىتەلىپ قالعان سۋ ايداۋ ارنالارى تازالانىپ, قاۋىپتى جەرلەر ينەرتتى ماتەريالدارمەن نىعىزدالعان. سۋ شايىپ كەتكەن دوبروجانوۆ ەلدى مەكەنىنىڭ 48 تۇرعىنى باسقا جاققا كوشىرىلىپ, بارلىق جاعداي جاسالعان. سۋ تاسقىنىنان گورودەتسكوە ەلدى مەكەنىن امان ساقتاپ قالۋ ماقساتىمەن 400 مەتر سۋ ارناسى تازالانىپ, بوگەتتەر تۇرعىزىلعان. وبلىس باسشىسى ەرىك سۇلتانوۆ پەن ءىىم تجك توراعاسىنىڭ ورىنباسارى جاسۇلان جۇماشەۆ قىزىل سۋ باسقان ەلدى مەكەندەردى اۋەدەن شولىپ قايتتى. جەر­گى­لىكتى تۇرعىنداردى توپان سۋدان ساقتاۋعا باعىتتالعان قۇت­قارۋ جۇمىستارىمەن تانىستى. شاعالالى وزەنىنىڭ ارناسىنا, ۇلكەن توراڭعۇل, بوزارال, با­لىقتى, سارىكول كولدەرىنە, سەر­گەەۆ سۋ قويماسىنا, تايىنشا, اققايىڭ ەسىل اۋداندارىنا باقى­لاۋ جۇرگىزىلدى. اتقارىلىپ جاتقان كەشەندى شارالارعا قاراماستان قاۋىپ ءالى سەيىلەر ەمەس. كەشەدەن بەرى جاۋعان جاڭبىر جاعدايدى شيەلەنىستىرىپ جىبەرگەن جايى بار. ءومىر ەسقالي, «ەگەمەن قازاقستان». سولتۇستىك قازاقستان وبلىسى.