بۇۇ-دا ناسيحاتتالدى

اقش-تىڭ نيۋ-يورك قالا­سىندا بۇۇ قارۋسىزدانۋ جونىندەگى كو­ميسسياسىنىڭ (قك) جىل سايىنعى مازمۇندىق سەسسياسى وتۋدە. 2015-2017 جىلدارعا ارنالعان كەزەڭدە قازاق­ستان قك-ءنىڭ يادرولىق قارۋسىزدانۋ جانە تاراتپاۋ ماسەلەلەرى جونىندەگى جۇمىس توبىنا توراعالىق ەتۋدە. سەسسيانىڭ اشىلۋىندا ءسوز سويلەگەن قازاقستان رەسپۋبليكاسىنىڭ بۇۇ جا­نىنداعى تۇراقتى وكىلى قايرات ءاب­دىراح­مانوۆ بۇۇ-عا مۇشە مەملەكەتتەر دەلەگاتسيالارىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ماڭىزدى باستامالارى تۋرالى جانە يادرولىق قارۋسىزدانۋ مەن تاراتپاۋ سالالارىنداعى قازاقستاننىڭ ۇستانىمى جايلى حاباردار ەتتى. دەلەگاتتار قازاقستان رەسپۋبليكاسى پرەزيدەنتىنىڭ اۆتورلىعىمەن شىققان «الەم. ءححى عاسىر» مانيفەسى اتتى مۇلدەم جاڭا باعدارلامالىق قۇجاتپەن تانىستىرىلدى. بۇل ايتۋلى اكتىدە ادامزات ءۇشىن تاعدىرشەشتى سوعىس جانە بەيبىتشىلىك ماسەلەلەرى بويىنشا قازاقستاننىڭ ۇستانىمى تۋرالى, سونداي-اق, حالىقارالىق قوعامداستىقتىڭ يادرولىق قارۋدىڭ تولىق تىيىمىنا قاراي ىلگەرىلەۋدەن باس تارتقان جاعدايدا يادرولىق اپوكاليپسيستىڭ قاۋپى حاقىندا باياندالعان. كوميسسيا باسشىلىعىمەن قول جەتكىزىلگەن كەلىسىم ناتيجەسىندە مانيفەست بارلىق مۇشە مەملەكەتتەرگە قولجەتىمدى تۇردە بۇۇ حاتشىلىعىنىڭ ەلەكتروندىق جۇيەسىندە رەسمي قۇجات رەتىندە ورنالاستىرىلدى. قازاقستان دەلەگاتسياسىنىڭ بايانداماسىندا, سونىمەن بىرگە, يادرولىق قاۋىپسىزدىك جونىندەگى سامميتتەرىنىڭ ءرولى باعالاندى جانە تاياۋدا ۆاشينگتوندا وتكەن يادرولىق قاۋىپسىزدىك جونىندەگى IV سامميتكە ەلىمىز باسشىلىعىنىڭ قاتىسۋى ناتيجەلەرى جاريا­لاندى, ونىڭ ىشىندە يادرولىق قارۋدى تاراتپاۋ رەجىمىن جانە يادرولىق قاۋىپ­سىزدىكتى نىعايتۋعا باعىتتالعان بىرقاتار ەلدەر جانە توپتارمەن جاساسقان بىرلەسكەن مالىمدەمەلەر تۋرالى اقپاراتتار بار. 2015 جىلعى 7 جەلتوقساندا بۇۇ باس اسسامبلەياسىنىڭ 70-ءشى سەسسياسى اياسىندا يادرولىق قارۋدان ازات الەم قۇرۋ تۋرالى جالپىعا بىردەي دەكلاراتسيا قابىلداۋ تۋرالى; قازاقستاندا اتوم ەنەرگياسى جونىندەگى حالىقارالىق اگەنتتىكتىڭ (اەحا) تومەن بايىتىلعان ۋران بانكىن قۇرۋ تۋرالى قر مەن اەحا اراسىنداعى كەلىسىمگە قول قويۋ جايىندا; بىرىككەن ۇلتتار ۇيىمىنا مۇشە مەملەكەتتەردىڭ قورعانىس بيۋدجەتتەرىنىڭ 1%-ىن بۇۇ تۇراقتى ماقساتتارى قورىنا اۋ­دارۋ حاقىندا; سونداي-اق, جاھاندىق انتي­ياد­رو­لىق قوزعالىس قالىپتاستىرۋداعى ەلبا­سىنىڭ باس­تامالارى جايلى ەرەكشە اتاپ ءوتىلدى. قارۋسىزدانۋ جونىندەگى كوميسسيا بۇۇ باس اسسامبلەياسىنا باعىنىشتى كون­سۋلتاتيۆتىك ورگان بولىپ تابىلادى. ونىڭ فۋنكتسيالارى – قارۋسىزدانۋ سالا­سىنداعى ءتۇرلى ماسەلەلەر بويىنشا ۇسىنىمداردى قاراستىرۋ جانە جاساۋ. كوميسسيانىڭ كۇن ءتارتىبى ەكى نەگىزگى تار­ماقتان تۇرادى: يادرولىق قارۋسىزدانۋ جانە يادرولىق قارۋدى تاراتپاۋ, سونداي-اق, جاي (كونۆەنتسيالىق) قارۋ-جاراقتار. قك جىل سايىن ءساۋىر ايىندا ءۇش اپتاعا جيىلىپ, ءوز جۇمىسىن پلەنارلىق سەسسيالار مەن ەكى جۇمىس توبى ارقىلى جۇزەگە اسىرادى. ساۋلەبەك ءبىرجان.