بيىل ەگىن شىعىمدى بولادى

كەشە ورتالىق كوممۋنيكاتسيالار قىزمەتىندە كوكتەمگى ەگىس ناۋقانىنا قاتىستى ءباسپاسوز ءماسليحاتى ءوتتى. وندا اۋىل شارۋاشىلىعى مينيسترلىگى وسىمدىك شارۋاشىلىعى ونىمدەرىن ءوندىرۋ مەن قايتا وڭدەۋ دەپارتامەنتىنىڭ ديرەكتورى اجار قاجىبەكوۆا بيىلعى ەگىس جۇمىستارى جونىندە اڭگىمەلەدى. «قازگيدرومەت» مەكەمەسىنىڭ ءما­لىمەتتەرى بويىنشا, بيىلعى باس­تالىپ كەتكەن ەگىس كەزىندە توپىراق ىلعالى وتە جاقسى قالپىندا ساقتالىپ وتىر. بارلىق وڭىرلەردە توپىراقتىڭ مەترلىك قاباتىندا جەر ىلعالى جەتكىلىكتى بولاتىن كورىنەدى. وسىنى ايتقان دەپارتامەنت ديرەكتورى, جازدىق اۋىلشارۋاشىلىق داقىلدارى 209 مىڭنان استام گەكتارعا سەبىلەتىنىن اتاپ ءوتتى. وعان قوسا, قار سۋىنىڭ, سونداي-اق, ناۋرىز ايىنداعى جاۋىن-شاشىننىڭ  ناتيجەسىندە توپىراقتاعى ونىمگە قاجەتتى ىلعال ايتارلىقتاي تولىعا تۇسكەنىنە نازار اۋدارتتى. وسىعان بايلانىستى عىلىمي مەكەمەلەر ەلىمىزدىڭ سولتۇستىك جانە ورتالىق وڭىرلەرى ءۇشىن جازدىق بيداي داقىلدارىن سەبۋگە ەڭ ىڭعايلى كەزەڭ رەتىندە 15-30 مامىر ارالىعىن اتاپ وتىر ەكەن. سپيكەردىڭ سوزىنە قاراعاندا, ديقاندار ەگىس القاپتارىن تولىق انىقتاپ بولعان. «وبلىس اكىمدىكتەرىنىڭ الدىن الا مالىمەتتەرىنە قاراعاندا, 2016 جىلى اۋىلشارۋاشىلىق داقىلدارىنىڭ جالپى ەگىس الاڭى 21,6 ملن. گەكتاردى قۇرايتىن بولادى. ونىڭ ىشىندە 15,2 ملن. گەكتارعا استىق, مايلى داقىلدار 1,9 ملن. گەكتارعا, جەم ازىق 4  ملن. گەكتارعا, باۋ-باقشا ونىمدەرى مەن كارتوپ 411 مىڭ گەكتارعا ەگىلمەك. كەيبىر وڭىرلەردە ورىن الىپ وتىرعان تۇقىم تاپشىلىعى ىشكى وبلىستىق جانە وبلىسارالىق الماسۋلار ەسەبىنەن قامتاماسىز ەتىلەدى», – دەدى ا.قاجىبەكوۆا. ديرەكتوردىڭ مالىمەتىنە زەر سالساق, 2016 جىلى اۋىلشارۋاشىلىق داقىلدارىن 21,6 ملن. گەكتارعا ەگۋ جوسپارلانعان. بۇل وتكەن جىلمەن سالىستىرعاندا 0,4 ميلليونعا ارتىق ەكەن. ەگىس القاپتارىن ءارتاراپتاندىرۋ جۇمىستارى اياسىندا بيداي القابى 2011 جىلمەن سالىستىرعاندا 2,1 ملن. گەكتارعا قىسقارىپتى. ال, ەگىستەگى بيدايدىڭ ۇلەسى 55 پايىزعا دەيىن ازايىپ كەتىپتى. سونداي-اق, مايلى داقىلدار القابى 11, مال ازىقتارى القابى 42 پايىزعا ۇلعايعان كورىنەدى. بيىلعى كوكتەمگى ەگىس جۇمىستارىن جۇرگىزۋدى قارجىلاندىرۋعا ەكىنشى دەڭگەيلى بانكتەر جانە «قازاگرو» حولدينگىنىڭ ەنشىلەس ۇيىمدارى ارقىلى شارۋالارعا 60 ملرد. تەڭگە بيۋدجەتتىك نەسيە ءبولىنىپتى. وعان قوسا, مينەرالدى تىڭايتقىشتار مەن گەربيتسيدتەردىڭ قۇنىن ارزانداتۋعا 26,3 ملرد. تەڭگە جۇمسالادى ەكەن. بۇل قارجى 291 مىڭ توننا مينەرالدى تىڭايتقىشتاردى جانە 12,6 ملن. ليتر گەربيتسيدتەردى جەتكىزۋدى قامتاماسىز ەتۋگە مۇمكىندىك بەرەدى. بۇلارمەن بىرگە, اسا زياندى جاندىكتەرمەن كۇرەس جۇرگىزۋ ءۇشىن رەسپۋبليكالىق بيۋدجەتتەن 4,6 ملرد. تەڭگە قاراستىرىلىپتى. بۇدان باسقا وسىمدىك شارۋاشىلىعى سالاسىن قارجىلاندىرۋعا بارلىق باعىتتار بويىنشا 34,8 ملرد. تەڭگە بولىنەدى. ال ەم مالىمەتىنە ساي, كوكتەمگى ەگىس جۇمىستارىن وتكىزۋ ءۇشىن ديزەل وتىنىنا دەگەن سۇرانىس 367 مىڭ توننانى قۇراپتى. مۇنىمەن بىرگە, وسى ءساۋىر ايىنا دەيىن ەلىمىز 6,5 ملن. توننا استىقتى ەكسپورتقا شىعارىپ ۇلگەرىپتى. بۇل كورسەتكىش وتكەن ماۋسىممەن سالىستىرعاندا 33 پايىزعا ارتىق. نۇرباي ەلمۇراتوۆ, «ەگەمەن قازاقستان».