كەشە ەلورداداعى ۇلتتىق اكادەميالىق كىتاپحانادا مەملەكەتتىك حاتشى گۇلشارا ابدىقالىقوۆانىڭ ءتورايىمدىعىمەن قازاقستان رەسپۋبليكاسى تاۋەلسىزدىگىنىڭ 25 جىلدىعىن وتكىزۋ بويىنشا مەملەكەتتىك كوميسسياسىنىڭ ءبىرىنشى وتىرىسى ءوتتى.
اتالعان كوميسسيا قازاقستان پرەزيدەنتىنىڭ بيىلعى جىلعى 28 ناۋرىزداعى جارلىعىمەن تاۋەلسىزدىكتىڭ 25 جىلدىعىن مەرەكەلەۋدى جوعارى يدەولوگيالىق جانە ۇيىمداستىرۋشىلىق دەڭگەيدە وتكىزۋ ماقساتىندا قۇرىلعان ەدى. سوندىقتان, كوميسسيانىڭ العاشقى وتىرىسىندا تاۋەلسىزدىكتىڭ 25 جىلدىعىن مەرەكەلەۋ شەڭبەرىندە ۇيىمداستىرىلاتىن ءىس-شارالاردى دايىنداۋ مەن ءوتكىزۋدىڭ نەگىزگى ماسەلەلەرى تالقىلاندى.
وتىرىستى اشقان گۇلشارا ابدىقالىقوۆا قازاقستان تاۋەلسىزدىگىنىڭ 25 جىلدىعىن اتاپ ءوتۋ, مەرەيلى جىلدى لايىقتى قارسى الۋ ەلدىگىمىزگە ۇلكەن سىن ەكەنىن ايتتى. «ەلباسى قازاقستان تاۋەلسىزدىگىنىڭ 25 جىلدىعىن مەرەكەلەۋ تۋرالى جارلىققا قول قويدى. ارنايى مەملەكەتتىك كوميسسيا قۇرىلىپ, ول تۋرالى ەرەجە مەن كوميسسيانىڭ دەربەس قۇرامى بەكىتىلدى. بۇگىن كوميسسيا مۇشەلەرى تولىقتاي جينالىپ وتىر. جىلدى «بىرلىك پەن جاسامپازدىقتىڭ 25 جىلى» ۇرانىمەن مەرەكەلەۋ تۋرالى تۇجىرىمداما قابىلداندى. قاستەرلى تاۋەلسىزدىگىمىزدىڭ شيرەك عاسىرلىق مەرەيتويى ەل تاريحىنداعى بەتبۇرىستى كەزەڭ بولماق. ول ەلىمىزدى تۇبەگەيلى جاڭعىرتاتىن 5 ينستيتۋتتىق رەفورمانى قارقىندى جۇزەگە اسىرۋ كەزەڭىنە سايكەس كەلدى. سونىمەن بىرگە, الەمدىك داعدارىستىڭ سالدارى سەزىلىپ تۇرعان كۇردەلى ۋاقىتقا تۇسپا-تۇس كەلىپ وتىر. دەگەنمەن, ەلباسى اتاپ وتكەندەي, قازاقستاننىڭ 25 جىلدا جەتكەن جەتىستىكتەرى قانداي داعدارىستان دا سالماقتىراق. مەرەيلى جىل ەلىمىزدىڭ تاۋەلسىزدىگى مەن مەملەكەتتىلىگىن ودان ءارى نىعايتىپ, حالىقتى رۋحاني-مادەني بىرىكتىرە ءتۇسۋى, ساباقتاستىق پەن پروگرەسسيۆتى دامۋدى قامتاماسىز ەتۋى ءتيىس. قاسيەتتى تاۋەلسىزدىگىمىزدىڭ ارقاسىندا ەلىمىزدىڭ جەتكەن جەتىستىكتەرىن ءاربىر ازاماتتىڭ سەزىنۋى ايرىقشا ماڭىزدى. ەلباسىنىڭ سارابدال ساياساتىمەن ەلىمىز تاۋەلسىزدىك جىلدارىندا بارلىق سالا بويىنشا تابىستى رەفورمالار جۇرگىزدى. ەڭ قارقىندى دامۋشى ەلدەردىڭ ءبىرى اتانىپ, الەمگە سىيلى ءارى سەنىمدى مەملەكەت رەتىندە تانىلدى. بۇگىنگى قازاقستان ەكونوميكاسى مىعىم, ساياسي احۋالى تۇراقتى, قوعامى دامىپ, تىرشىلىگى جاقسارعان, الدەقاشان قالىپتاسقان مەملەكەت. بەيبىتشىلىك پەن كەلىسىمدى نىعايتىپ, ەتنوسارالىق جانە كونفەسسياارالىق تاتۋلىقتى ساقتاي بىلگەن ەل. بۇل رەتتە, تاۋەلسىزدىك – ءبىزدىڭ بارلىق جەتىستىگىمىزدىڭ نەگىزى. دەمەك, بۇل ازاتتىعىمىزدىڭ شيرەك عاسىرلىق مەرەيلى جىلىن مەرەكەلەۋ بارىسىندا ءاربىر قازاقستاندىقتىڭ جۇرەگىنەن نىق ورىن الۋى ءتيىس», – دەدى.
بۇدان كەيىنگى كەزەكتە تاۋەلسىزدىكتىڭ 25 جىلدىعىن مەرەكەلەۋگە دايىندىق شارالارى تۋرالى مادەنيەت جانە سپورت ءمينيسترى ارىستانبەك مۇحامەدي ۇلى ءسوز الدى. «تاۋەلسىزدىك العان 25 جىلدان بەرگى ۋاقىتتا ەلباسىنىڭ ارقاسىندا بۇكىل الەم قازاق ەلىن, قازاق ۇلتىن بارىنشا تانىدى, مارتەبەلى مەملەكەت رەتىندە مويىندادى. ءبىز تاۋەلسىزدىكتىڭ ارقاسىندا ىرگەسى بەرىك, كەلەشەگى كەمەل مەملەكەت قۇردىق. الەمدىك قاۋىمداستىققا دەموكراتيالى-زايىرلى مەملەكەت ەكەنىمىزدى دالەلدەدىك. سوندىقتان, ەلباسىنىڭ حالىققا ارناعان جولداۋىندا كورسەتىلگەن تاپسىرمالار مەن مىندەتتەردى, ەلىمىزدە ىسكە اسىرىلىپ جاتقان رەفورمالاردى باسشىلىققا الا وتىرىپ, ولاردى لايىقتى جۇزەگە اسىرۋعا بارلىق كۇش-جىگەرىمىزدى سالاتىن بولامىز. ەڭ باستىسى, بيىلعى جىلى تاۋەلسىزدىكتىڭ 25 جىلدىعىن بۇكىل حالىق بولىپ اتاپ ءوتۋ شارالارىنا جىل باسىنان بەرى دايىندىق شارالارىن ويداعىداي باستاپ كەتتىك. بۇل – داۋىرلىك وقيعا. حالقىمىزدىڭ سان ۇرپاعىنىڭ ورىندالعان ارماندارى مەن ۇمىتتەرىنىڭ ناتيجەسى. 1991 جىلعى 16 جەلتوقساندا قازاقستان رەسپۋبليكاسى مەملەكەتتىك تاۋەلسىزدىگى تۋرالى كونستيتۋتسيالىق زاڭ قابىلدانىپ, ەلىمىز تۇڭعىش رەت الەمدىك قوعامداستىق مويىنداعان مەملەكەت مارتەبەسىنە يە بولدى. ەگەمەن دامۋدىڭ 25 جىلى ىشىندە قازاقستان «2030 ستراتەگياسىن» مەرزىمىنەن بۇرىن ىسكە اسىرىپ, «2050 ستراتەگياسىن», «100 ناقتى قادام» ۇلت جوسپارىن جۇزەگە اسىرا باستادى. بۇگىندە الەمدىك قاۋىمداستىق قازاقستاندى تمد ەلدەرىنىڭ اراسىنان جاڭعىرعان وزگەرىستەردىڭ كوشباسشىسى دەپ بىلەدى», – دەدى ا. مۇحامەدي ۇلى.
ينۆەستيتسيالار جانە دامۋ ءمينيسترى اسەت يسەكەشەۆ تاۋەلسىزدىكتىڭ 25 جىلدىعىندا 100-دەن استام اقپاراتتىق-ناسيحاتتىق شارالاردى وتكىزۋ جوسپاردا تۇرعانىن مالىمدەدى. «بيىل 100-دەن استام اقپاراتتىق-ناسيحات شارالارىن وتكىزۋ جوسپاردا بار. سونىمەن قاتار, جەلتوقسان ايىندا اتاۋلى جىلعا بايلانىستى تاۋەلسىزدىككە ارنالعان پوشتا ماركالارى باسىپ شىعارىلادى. اتالعان جۇمىستار جىل باسىنان باستالدى. مىسالى, 18 اقپان كۇنى الەۋمەتتىك جەلىلەردە «25 جىل – ءبىر ەل – ءبىر تاعدىر» اتتى شارا باستاۋ الدى. ونىڭ اياسىندا بىردەن 30 مىڭنان استام قولدانۋشى ءوز سۋرەتتەرىن (اۆاتار) ۇلتتىق ناقىشپەن بەزەندىرگەن ەدى. قازىرگى ۋاقىتتا 102 مىڭ ادام الەۋمەتتىك جەلىلەردەگى فوتوسۋرەتتەرىن ۇلتتىق ناقىشپەن كومكەرىپ ۇلگەردى», دەدى ءا.يسەكەشەۆ. ونىڭ ايتۋىنشا, بۇل تاقىرىپقا وتاندىق باق وكىلدەرىنىڭ قىزىعۋشىلىعى دا ارتىپ كەلەدى. مىسالى, جىل باسىنان بەرى 5 مىڭنان استام ماتەريال جاريالانعان.
سونىمەن قاتار, ول مەرەيتويعا اقپاراتتىق قولداۋ كورسەتۋ اياسىندا 50-گە تارتا رەسپۋبليكالىق باق-تى تارتۋ كوزدەلىپ وتىرعانىن, وتاندىق كينو مەن ەسترادا جۇلدىزدارىن دا وسى ىسكە بەلسەندى قاتىستىرۋ جوسپاردا تۇرعانىن جەتكىزدى. بۇعان قوسا, تاۋەلسىزدىكتىڭ 25 جىلدىعىنا وراي, مەملەكەتتىك ورگانداردىڭ, ۇلتتىق كومپانيالاردىڭ, ونەركاسىپ كاسىپورىندارىنىڭ باسشىلارى جانە مادەنيەت پەن سپورت وكىلدەرىنىڭ قاتىسۋىمەن 25 ونلاين-كونفەرەنتسيا وتكىزىلمەك. «اقپاراتتىق-ناسيحاتتىق جۇمىستار الەۋمەتتىك جەلىلەردە دە جۇرگىزىلەدى. قازان ايىندا الەۋمەتتىك جەلىلەردە ءبىزدىڭ ەلىمىزدىڭ گەوگرافيالىق ەرەكشەلىكتەرىنە ارنالعان «قازاقستاننىڭ بارۋعا تۇرارلىق بەلگىسىز 25 جەرى» اتتى بايقاۋ وتەدى دەپ كوزدەلىپ تۇر», دەدى ءا.يسەكەشەۆ.
بۇل كۇنى ەلىمىزدىڭ مادەنيەت جانە قوعام قايراتكەرلەرى الداعى مەرەيتويدى ابىرويمەن وتكىزۋ قاجەتتىگىنە باسا نازار اۋدارىپ, قۇر ناۋقانشىلىقتان ادا بولۋعا شاقىردى. ماسەلەن, سەناتور, قوعام قايراتكەرى نۇرلان ورازالين تاۋەلسىزدىكتىڭ 25 جىلدىعى استا-توك ەمەس, ساناعا جەتەتىندەي, كوكىرەككە قوناتىنداي, جۇرەككە جىلى تيەتىندەي ەتىپ تويلانۋى شارت ەكەنىن ايتتى. «17 ميلليون حالقىمىز ول مەيرامدى قالاي تويلاسا, سونىڭ سىرتىندا ءبىزدى قاداعالاپ وتىرعان مەملەكەتتەر دە ونى جەتە ءتۇسىنۋى ءتيىس», دەدى ن.ورازالين.
مەملەكەت قايراتكەرى, پارلامەنت ءماجىلىسىنىڭ دەپۋتاتى قۋانىش سۇلتانوۆتىڭ ءسوزى دە وسى ۇدەدەن شىقتى. ال بەكبولات تىلەۋحان اتالعان مەيرام «قۇر تويلاۋ, قۇر شالقۋ بولماۋى قاجەتتىگىن» جەتكىزدى. «ەشقانداي ەيفوريانىڭ قاجەتى جوق. بۇل مەيرام – تاۋەلسىزدىك الدىنداعى ەسەپ. بۇل – تاۋەلسىزدىكتىڭ قادىرىن ءتۇسىندىرەتىن ۇلكەن يدەولوگيالىق شارا. وسىنى پايدالانىپ, ەلدىڭ ساناسىنا قۇيىپ قالۋ قاجەت. تاۋەلسىزدىكتەن ءتاتتى, ازاتتىقتان اسىل ەشتەڭە جوق ەكەنىن ۇرپاقتىڭ ساناسىنا ءسىڭىرۋ كەرەك», دەدى ول ءوز سوزىندە.
وتىرىس سوڭىندا مەملەكەتتىك حاتشى گۇلشارا ابدىقالىقوۆا قازاقستان ءتاۋەلسىزدىگىنىڭ 25 جىلدىعىن وتكىزۋگە ارنالعان مەملەكەتتىك كوميسسيانىڭ وتىرىسىندا اتاۋلى جىلدى اتاپ ءوتۋدىڭ مەديا-جوسپارىن 25 ساۋىرگە دەيىن ءبىتىرۋدى تاپسىردى. «ەڭ ماڭىزدى ماسەلەلەردىڭ ءبىرى – مەرەيتوي اياسىنداعى شارالاردى اقپاراتتىق-يميدجدىك قولداۋدى قامتاماسىز ەتۋ. وسىعان بايلانىستى ينۆەستيتسيالار ءجانە دامۋ مينيسترلىگىنە قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىمەن, مۇددەلى ورتالىق جانە جەرگىلىكتى ورگاندارمەن بىرگە تاۋەلسىزدىكتىڭ 25 جىلدىعىن مەرەكەلەۋدىڭ مەديا-جوسپارىن 25 ساۋىرگە دەيىن جاساۋدى تاپسىرامىن», دەدى گ.ابدىقالىقوۆا.
مەملەكەتتىك حاتشى سونىمەن قاتار, پرەزيدەنت جانىنداعى ورتالىق كوممۋنيكاتسيالار قىزمەتىندە ۇلكەن تاجىريبە جيناقتالعانىن, ءتۇرلى پاتريوتتىق ينتەرنەت-اكتسيالار جانە ارنايى جوبالار جاسالعانىن تيەك ەتە كەلە: «جىل بويى وسى جۇمىستاردى اتقارىپ شىعۋ كەرەك. جاڭا وندىرىستەردىڭ اشىلۋىن, جاڭا جۇمىس ورىندارىنىڭ پايدا بولۋىن, الەۋمەتتىك-ءمادەني جانە تۇرمىستىق نىسانداردىڭ پايدالانۋعا بەرىلۋىن كەڭىنەن كورسەتۋ كەرەك», دەدى.
وتىرىس اياسىندا مەملەكەتتىك كوميسسيا ءمۇشەلەرى مەن شاقىرىلعان قوناقتار تاۋەلسىزدىكتىڭ 25 جىلدىعىنا ارنالعان «تاۋەلسىزدىك تاريحى: قازاقستان جولىنىڭ قارىشتى قادامدارى» اتتى دەرەكتى فوتوكورمەنىڭ اشىلۋ راسىمىنە قاتىستى.
ءلايلا ەدىلقىزى,
«ەگەمەن قازاقستان».
