نۇرعيسا رۋحى نۇرلاندى

نۇرعيسا تىلەنديەۆ كوزىنىڭ تىرىسىندە-اق قازاق مۋزىكاسىنىڭ سايىپقىرانى اتانعان ەدى. ونىڭ تالاي ءان-اۋەندەرى تىڭدارماننىڭ جۇرەگىنەن ورىن تاۋىپ, قازاق كينوسىن اسەم سازبەن ارلەگەن بولاتىن. ول 500-دەن استام مۋزىكالىق ءتول تۋىندىلاردىڭ اۆتورى. ونىڭ «اققۋ», «اڭساۋ», «ارمان», «كوش كەرۋەن», «ماحامبەت», «سارجايلاۋ» سياقتى اندەرى مەن كۇيلەرى حالقىنىڭ ءسۇيىپ تىڭدايتىن رۋحاني قازىناسىنا اينالعان. جىر جامپوزى جامبىل جاباەۆ: «مەنىڭ يەم, جولبارىسىم تىلەندىنىڭ بالاسى نۇرعيساعا كەتتى. تۇسىمدە سونىڭ الاقانىن جالاپ تۇر ەكەن. ەندىگى يەسى سول بولار», – دەپ نىق سەنىممەن ايتقانى شىندىققا اينالدى. اقيقاتىندا سولاي... تاياۋدا استاناداعى كونگرەسس-حولل سارايىندا قازاق ەلىنىڭ ءبىرتۋار پەرزەنتى, حالقىمىزدىڭ مادەنيەتىندە, مۋزىكا ونەرىندە كومپوزيتور, ديريجەر رەتىندە وشپەس ءىز قالدىرعان, داۋلەسكەر كۇيشى, ايگىلى سازگەر نۇرعيسا ءتى­لەنديەۆتىڭ شىعارماشىلىعىنا ارنالعان «نۇر اعا» اتتى گالا-كونتسەرت ءوتتى. كەشكە قازاق ەسترا­داسىنىڭ مايتالماندارى, اتاپ ايتساق, كسرو حالىق ءار­تىسى بيبىگۇل تولەگەنوۆا, ۇلان كەن­جەبەكوۆ, قازاقستاننىڭ ەڭ­بەك سىڭىرگەن قايراتكەرلەرى اي­گۇل ۇلكەنباەۆا, التىناي جو­را­باەۆا, ايگۇل قوسانوۆا, ازا­مات جىلتىركوزوۆ, بيبىگۇل جان­ۇزاق, جاستار سىيلىعىنىڭ لاۋرەاتى نۇرعالي تۇرلىبەكوۆ, سونداي-اق, رەسپۋبليكالىق جانە حالىقارالىق بايقاۋلاردىڭ جەڭىم­پازدارى ايزادا كاپو­نوۆا, نۇربول بالاپانوۆ, شاح­ريزادا تىنىشتىق سىندى كومەيىنە بۇلبۇل ۇيالاعان جەز­تاڭداي انشىلەرمەن قوسا, «شالقىما» حالىقتىق بي ان­سامبلى ونەر كورسەتتى. اتالعان كون­تسەرتتە اۆتوردىڭ حالىقتىق ۇجىمدارعا ارناپ جازعان شى­عارمالارىن استانا قالا­سى اكىمدىگى مەملەكەتتىك اكادە­ميا­لىق فيلارمونياسىنىڭ سيم­فونيالىق وركەسترى شەبەر ورىنداپ, تىڭدارمان قاۋىمنىڭ ىقى­لاسىنا بولەندى. كونتسەرتكە جينالعان قارا­قۇرىم جۇرت پەن ولاردىڭ ايگىلى سازگەرگە دەگەن ساعىنىشى, قالت­قىسىز كوڭىلى, ورىندارىنان ورە تۇرەگەلىپ, قۋانا قول سوق­قان بەينەلەرى سونداي شىنايى بولدى. قايتالانباس تۇلعا نۇر­عيسا تىلەنديەۆ قازاقستان كوم­پوزيتورلارىنىڭ ىشىندە تۇڭعىش رەت حالىق قاھارمانى اتاعىن الدى. سول قۇرمەت پەن ىستىق ىقى­لاستىڭ ءبىر كورىنىس-كۋاسى رەتىندە وسى كونتسەرتتى ايتار ەدىك. مۇشەلگە تولار-تولماس كەزى­نىڭ وزىندە-اق اۋىلىنداعى قا­زاق پەن قىرعىزدىڭ, ورىس پەن تاتاردىڭ مۋزىكالىق اسپاپتارىن تەگىس قولىنان وتكىزىپ, الۋان ءتۇرلى ءان مەن كۇيدى قۇي­قىلجىتا تارتقان نۇرعيسا, ەسەيە كەلە انشىلىكتىڭ اقيىعى كە­نەننەن باتا الىپ, جىر جامپوزى جامبىلدىڭ سارقىتىن ءىشتى. الايدا, ۇلكەن ونەرگە ول ون ءتورت جاسىندا كەزىكتى. قىدىرى – قازاق مۋزىكاسىنىڭ شاپاعاتشىسى احمەت جۇبانوۆ ەدى. جاڭا عانا بۇلقىنىپ شىعىپ, بۋلىعا اعىپ, ەندى عانا جۇلگە تارتا باستاعان كاۋسار بۇلاقتىڭ تەگەۋرىنىن احاڭ ابىز بىردەن تانىدى. ءسويتىپ, نۇرعيسانى قازاق ۇلت اسپاپتار وركەسترىنىڭ دومبىراشىلار توبىنا قوسادى. دومبىراشىلىقتىڭ ءدۇلد ۇلى قالي جانتىلەۋوۆتىڭ وڭ جاعىنان نۇرعيساعا دا ورىن تيەدى. قاليدىڭ الدىن كورگەن قۇيماقۇلاق نۇرعيسا كەشىكپەي-اق, بۇرىن كۇيدى قىزىعىپ تارتسا, ەندى كۇيدى قۇنىعىپ تارتاتىن بولادى, بۇرىن كۇيدى ەلىرىپ تارتسا, ەندى كۇيدى ەلىگىپ تارتادى. مىنە, وسىنىڭ ءبارى دە نۇرعيسا الەمىنە تاپجىلماس تۇعىر بولدى, وسىنىڭ ءبارى دە نۇرعيسا دارىنىنىڭ سارقىلماس قاينار كوزى ەدى. كەش بارىسىندا ن.تىلەن­ديەۆتىڭ ءومىر جولىنىڭ قىسقا, ۇزىكتەرى كورسەتىلدى. ونىڭ ءان-كۇيلەرىنىڭ ومىرشەڭدىگى بولار, حالىق قوسىلا شىرقاپ وتىردى. بۇل جولى دا نۇرعيسا رۋحى حالقىنىڭ سىرلاسى دا, مۇڭداسى دا بولا ءبىلدى. راۋشان تاۋىرحانقىزى, «ەگەمەن قازاقستان».