قىزىلوردادا وبلىستىق پروكۋراتۋرانىڭ القا وتىرىسى ءوتتى

استانا. 4 ءساۋىر. قىزىلوردا قالالىق اكىمدىگىندە وبلىس پروكۋرورى ساپاربەك نۇرپەيىسوۆتىڭ توراعالىق ەتۋىمەن وبلىستىق پروكۋراتۋرانىڭ كوشپەلى القا وتىرىسى وتكىزىلدى. وعان القا مۇشەلەرى, قۇقىق قورعاۋ جانە ءتيىستى مەملەكەتتىك ورگانداردىڭ باسشىلارى قاتىستى. بۇل تۋرالى وبلىستىق پروكۋراتۋرانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. پروكۋراتۋرا ورگاندارى دا قاداعالاۋدىڭ بارلىق سالاسىندا «مۇلدەم توزبەۋشىلىك» قاعيداسىن قالىپتاستىرۋ باعىتىن ۇستانادى. وسى رەتتە, جول قاۋىپسىزدىگىن قامتاماسىز ەتۋ سالاسىنا قاتىستى ستاتيستيكالىق كورسەتكىشتەردىڭ الاڭداتارلىق جاعدايى ەسكەرىلىپ, پروكۋراتۋرامەن ۋاكىلەتتى جانە مۇددەلى ورگانداردىڭ بۇل باعىتتاعى ءىس-قيمىلىنىڭ تيىمدىلىگى مەن زاڭدىلىعىنا تەكسەرۋ جۇرگىزىپ, زاڭسىزدىقتار مەن كەمشىلىكتەردى انىقتادى. ىشكى ىستەر ورگاندارىنىڭ جول قاۋىپسىزدىگى سالاسىندا قالىپتاسقان جاعدايدى تىزگىندەۋگە ءالى دە بولسا قاۋقارسىزدىعى بايقالادى. جاعدايدىڭ وسىلايشا قىلىپتاسۋىنا, ءبىرىنشى كەزەكتە – حالىقتىڭ قۇقىقتىق ساناسىن قالىپتاستىرۋ باعىتىنداعى جۇمىستىڭ جەتكىلىكسىزدىگى, بۇل ىسكە ۇكىمەتتىك ەمەس ۇيىمدار مەن ەرىكتىلەردىڭ تارتىلماۋى, پروفيلاكتيكالىق شارالاردىڭ تيىمسىزدىگى سەبەپ بولعان. ىشكى ىستەر ورگاندارى نەگىزىنەن – قۇقىق بۇزۋشىلىقتى انىقتاۋ, كىنالىگە ايىپپۇل سالۋ ساياساتىن ۇستانىپ كەلەتىنىن دە اتاپ ءوتۋ قاجەت. وبلىستاعى ىشكى ىستەر ورگاندارىمەن ۇستىمىزدەگى جىلى 224,6 ملن. تەڭگە ايىپپۇل سالىنسا, حالىق سانى 4 ەسەگە ارتىق وڭتۇستىك-قازاقستان وبلىسىندا ءبىر جارىم ەسەگە كەم ايىپپۇل سالىنىپ, سايكەسىنشە ءوندىرۋ كورسەتكىشى وڭتۇستىك قازاقستان وبلىسىندا 45,9 پايىزدى قۇراپ, بىزدە 28,2 پايىزعا ارەڭ جەتكەن. رەسپۋبليكا بويىنشا ورتاشا كورسەتكىش 34,5 پايىز. اكىمشىلىك جانە جەرگىلىكتى پوليتسيا قىزمەتتەرىنىڭ, مەملەكەتتىك جانە جەكە سوت ورىنداۋشىلاردىڭ قاتىسۋىمەن وتكىزىلگەن «بورىشكەر» ءىس-شاراسى بارىسىندا تاۋلىگىنە شامامەن 20-25 اۆتوكولىكتىڭ ايىپ الاڭىنا قامالعانى, ءوز كەزەگىندە وبلىستىق پروكۋراتۋرانىڭ باستاماسىمەن ۇيىمداستىرىلعان, نەبارى 2 ساعاتقا سوزىلعان رەيد بارىسىندا بورىشكەرلەردىڭ 20-دان استام اۆتوكولىگىنىڭ ۇستالعانى, اتالعان جۇمىستىڭ قاناعاتتاندىرارلىقسىز دەڭگەيدە جۇرگىزىلگەنىن كورسەتتى. ىشكى ىستەر ورگاندارىنىڭ قىزمەتكەرلەرى جول ءجۇرىسىنىڭ وزگە قاتىسۋشىلارىنا ۇلگى بولۋدىڭ ورنىنا, 2015-جىلى جول ءجۇرىسى قاعيدالارىن 108 رەت بۇزسا, اعىمداعى جىلدىڭ وزىندە 21 فاكتى تىركەلىپ, ونىڭ 12-ءى پروكۋراتۋرا جانە وزىندىك قاۋىپسىزدىك باسقارماسى قىزمەتكەرلەرىمەن بىرلەسىپ جۇرگىزىلگەن رەيد بارىسىندا انىقتالعان. جول قاۋىپسىزدىگىن قامتاماسىز ەتۋگە پايدالانىلاتىن قىزمەتتىك كولىكتەرىنىڭ بارلىعىندا دەرلىك العاشقى مەديتسينالىق كومەك قوبديشاسىنداعى دارىلىك زاتتاردىڭ تۇگەل بولماعانىن اتاپ وتكەن ءجون. جازاتايىم جول اپاتى بولا قالعان جاعدايدا, وقيعا ورنىنا ءبىرىنشى كەلەتىن پوليتسەيدىڭ العاشقى مەديتسينالىق كومەك كورسەتۋى كۇمان تۋدىرادى. ىشكى ىستەر دەپارتامەنتىمەن ينتەرنەت جەلىلەرىندە كورىنىس تاپقان جول ءجۇرىسى قاعيدالارىن بۇزۋ فاكتىلەرى, پوليتسيا قىزمەتكەرلەرىنە قاتىستى ورنالاستىرىلعان جاعىمسىز بەينەماتەريالدار دەر كەزىندە زەردەلەنبەيدى, زاڭسىزدىقتارعا جول بەرگەن كىزمەتكەرلەر جاۋاپتىلىققا تارتىلمايدى, ناتيجەسىندە قۇقىق قورعاۋ ورگاندارىنىڭ يميدجىنە كەرى اسەر ەتەتىن فاكتورلاردى بولدىرماۋعا جانە ولاردى جويۋعا باعىتتالعان شارالار قولدانىلمايدى. سونداي-اق, وبلىس ورتالىعى كوشەلەرىنىڭ جول قوزعالىسىن رەتتەۋگە ارنالعان تەحنيكالىق قۇرالدارمەن قامتاماسىز ەتىلۋ جاعدايىن زەردەلەۋمەن, جول بەلگىلەرىنىڭ بەي-بەرەكەت, تالاپقا ساي ورناتىلماۋ نەمەسە قاجەتتى جەرلەرگە ورناتىلماۋ فاكتىلەرى انىقتالعان. مىسالى, «تۇراقتايتىن جەر» جانە «مۇگەدەكتەر» جول بەلگىلەرىن قايتالاۋ تاڭبالارىنىڭ ءوشىرىلىپ قالۋ سالدارىنان, قۇقىق بۇزۋشىلاردى جاۋاپتىلىققا تارتۋدى قيىنداتادى. وسى رەتتە, جولى سالىنباعان مومىش ۇلى كوشەسى بويىندا جول بەلگىلەرىنىڭ ورناتىلعانى الەۋمەتتىك جەلىلەردە كەڭىنەن تالقىلانعانىن, تەك پروكۋراتۋرانىڭ تىكەلەي ارالاسۋىنان كەيىن نەگىزسىز ورناتىلعان جول بەلگىلەرى الىنىپ تاستالدى. القا وتىرىسىندا وبلىستىڭ باس پروكۋرورى ىشكى ىستەر سالاسى باسشىلىعىنا جانە پوليتسەيلەرگە قۇقىق بۇزۋشىلىقتىڭ الدىن الۋدى تاپسىردى. سونداي-اق, جول قاۋىپسىزدىگىن قامتاماسىز ەتۋدە مۇقيات بولۋدى, جوعارىدا اتالعان كەمشىلىكتەردى تۇزەتۋ كەرەكتىگىن ايتتى. تالعات رايىمبەك. دەرەك, فوتو: قىزىلوردا وبلىستىق پروكۋراتۋراسىنىڭ ءباسپاسوز قىزمەتى.