اقتوبە. 4 ءساۋىر. وبلىس ورتالىعىنداعى قازاقستان حالقى اسسامبلەياسى عيماراتىندا قازاقستان رەسپۋبليكاسى تاۋەلسىزدىگىنىڭ 25 جىلدىعىنا جانە وبلىستىق حالىق شىعارماشىلىعى ءۇيىنىڭ 55 جىلدىعىنا ارنالعان نۇرسۇلۋ تاپالوۆا اتىنداعى III رەسپۋبليكالىق «ءبيدىڭ نۇرى – نۇرسۇلۋ» اتتى جەكە ورىنداۋشىلار بي بايقاۋى مارەگە جەتتى. بۇل تۋرالى egemen.kz ءتىلشىسى حابارلادى.
بايقاۋدى ۇيىمداستىرۋدىڭ ماقساتى – قازاقتىڭ بالەت ءبيشىسى, قازاق كسر-ءنىڭ ەڭبەك سىڭىرگەن ءارتىسى نۇرسۇلۋ تاپالوۆانىڭ شىعارماشىلىعىن ناسيحاتتاۋ, حورەوگرافيا ونەرىن جانە حالىقتىق بيلەردىڭ جەكە ورىنداۋشىلارىن وسكەلەڭ ۇرپاق پەن شىعارماشىل جاستار اراسىندا كەڭىنەن ناسيحاتتاۋ.
وعان جاستارى 15-25 ارالىعىنداعى ەلىمىزدىڭ استانا, اتىراۋ, شىمكەنت, قىزىلوردا, اتىراۋ, سەمەي, تاراز, اقتاۋ, اقتوبە قالالارى مەن اقتوبە وبلىسىنىڭ ويىل اۋدانىنان 14 كاسىبي جانە اۋەسقوي بي ۇجىمدارىنىڭ جەكە ورىنداۋشىلارى قاتىستى.
ەكى تۋر بويى بي بايقاۋىنا قاتىسۋشىلاردىڭ اكتەرلىك شەبەرلىگىن, كوركەمدىك-ساحنالىق بەينەسىن, بي قوزعالىسىنىڭ مانەرى مەن ەرەكشەلىگىن سارالاعان قازىلار القاسىنىڭ شەشىمىمەن استانالىق ءبيشى اسحات مادەن بايقاۋدىڭ گران-پري جۇلدەسىن جەڭىپ الدى. ءبىرىنشى ورىندى دا استانالىق ساعىنىش نۇرحايداروۆا يەلەندى. ەكىنشى ورىن وڭتۇستىك قازاقستان وبلىسىنىڭ ءبيشىسى مارجان سارسەنبەككە بۇيىردى. ءۇشىنشى ورىندى ماڭعىستاۋ وبلىسىنان كەلگەن ءبيشى انار قىدىرباەۆا مەن اقتوبەلىك كامشات بيماعانبەتوۆا ءبولىستى.
بايقاۋ جەڭىمپازدارى مەن جۇلدەگەرلەرى ديپلومدارمەن جانە اقشالاي سىيلىقتارمەن ماراپاتتالدى. بايقاۋعا قاتىسقان بيشىلەردىڭ بارلىعىنا دا بي ونەرى سايىسىەن ۇيىمداستىرۋشىلار اتىنان سىي-سياپات جاسالدى.
ساتىبالدى ءساۋىرباي.
دەرەك, فوتو: egemen.kz
