پەتروپاۆل. 4 ءساۋىر. وبلىس ورتالىعىندا وزدىگىنەن جىلۋ رەتتەيتىن كابەل شىعاراتىن زاۋىت وتقا ورانىپ, تۇگەلدەي جانىپ كەتتى. بۇل تۋرالى سولتۇستىك قازاقستان وبلىستىق توتەنشە جاعدايلار جونىندەگى دەپارتامەنتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
تمد بويىنشا تەڭدەسى جوق جالعىز كاسىپورىن قازاقستان مەن گەرمانيانىڭ بىرلەسكەن جوباسى اياسىندا تۇرعىزىلىپ, قاڭتار ايىندا ىسكە قوسىلعان. ونىڭ قۇرىلىس جۇمىستارىنا 600 ميلليون تەڭگە ينۆەستيتسيا تارتىلعان.
ەكى قاباتتى عيماراتتىڭ 964 شارشى مەترى جانىپ كەتكەنى بەلگىلى بولىپ وتىر. ءتىلسىز جاۋ دجيپ شەتەلدىك كولىگىن, گەرمانيادان اكەلىنگەن جارتىلاي ونىمدەردى, دايىن شيكىزاتتاردى, جۇمىسشى-قىزمەتكەرلەردىڭ ەڭبەك كىتاپشاسى سەكىلدى قۇجاتتاردى جالماعان. ءورتتىڭ شىعۋ سەبەبى بەلگىسىز.
«ديسپەچەرلىك قىزمەتكە حابار كەش ءتۇستى. سول سەبەپتى قىزىل جالىندى ءسوندىرۋ وڭاي بولعان جوق. بۇل جۇمىسقا بەس ءورت ءسوندىرۋ ءبولىمى, 71 ادام, 15 ارنايى تەحنيكا جۇمىلدىرىلدى», - دەيدى وبلىستىق توتەنشە جاعدايلار دەپارتامەنتى مەملەكەتتىك ءتىل جانە اقپارات توبىنىڭ باس مامانى ەۆگەني جۋراۆلەۆ.
ءومىر ەسقالي.
دەرەك, فوتو: سولتۇستىك قازاقستان وبلىستىق توتەنشە جاعدايلار جونىندەگى دەپارتامەنتتىڭ ءباسپاسوز قىزمەتى.
