استانا. 4 ءساۋىر. اقتوبەدە قوعامدىق كومەكشىلەر ينستيتۋتى ەنگىزىلدى. بۇل تۋرالى egemen.kz ءتىلشىسى حابارلادى.
وبلىس اكىمىنىڭ قوعامدىق كومەكشىلەرى ينستيتۋتى ءوڭىر باسشىسى بەردىبەك ساپارباەۆتىڭ باستاماسىمەن ەنگىزىلىپ وتىر. قوعامدىق كومەكشىلەردىڭ باستى ماقساتى وبلىس باسشىسى مەن تۇرعىندار اراسىنداعى بايلانىستى كۇشەيتۋ, تۇرعىنداردى مازالايتىن ماسەلەلەر مەن اۋىل-ايماقتارداعى جاعدايلار جونىندە وبلىس باسشىسىن اقپاراتتاندىرۋ بولىپ تابىلادى. وبلىس اكىمىنىڭ كومەكشىلەرى, سونىمەن بىرگە, تۇرعىنداردى قابىلداپ, كەزدەسۋ بارىسىندا كەلىپ تۇسكەن اقپاراتتاردى وبلىس اكىمدىگىنە جەتكىزىپ وتىرادى.
«ءبىز اۋدان اكىمدەرى ۇسىنعان مالىمەتتەرگە سەنەمىز, الايدا ولار وزدەرىنە ءتيىمدى مالىمەتتەردى بەرەدى. ال سىزدەردىڭ جۇمىستارىڭىز, وبلىس باسشىسىن شىنايى جاعدايمەن حاباردار ەتىپ وتىرۋ. اسىرەسە, ءبىلىم بەرۋ, مەديتسينالىق قىزمەت كورسەتۋ, نەگىزگى ازىق-ت ۇلىك تۇرلەرىنە باعا, اۋىل شارۋاشىلىعىن دامۋى تۋرالى الەۋمەتتىك سالاعا نازار اۋدارۋلارىڭىزدى سۇرايمىن», دەپ اتاپ ءوتتى بەردىبەك ساپارباەۆ.
ايماق باسشىسىنىڭ كومەكشىلەرى قاتارىندا اقتوبە وبلىسىنىڭ 12 اۋدانىنىڭ بەدەلدى وكىلدەرى بار, ولار ايماقتىڭ الەۋمەتتىك-ەكونوميكالىق دامۋىنا ۇلەس قوسقان, قوعام ومىرىنە بەلسەندى ارالاسىپ جۇرگەن جاندار.
بەردىبەك ساپارباەۆ ءوزىنىڭ قوعامدىق كومەكشىلەرىمەن كەزدەسىپ, ولارعا كۋالىكتەرىن تابىس ەتتى.
ايتا كەتەرلىك ءجايت, قوعامدىق كومەكشىلەردىڭ جۇمىس ىستەۋىنە ىڭعايلى بولۋى ءۇشىن بولمە مەن تەلەفون, سونىمەن بىرگە اۋدانداعى ەلدى مەكەندەرگە قاتىناۋىنا كولىك بەرىلەتىن بولادى.
ساتىبالدى ءساۋىرباي.
دەرەك, فوتو: egemen.kz
