وڭتۇستىكتە مەكتەپ وقۋشىسى 3 جاستاعى قىزدى اجالدان قۇتقاردى

استانا. 4 ءساۋىر. وڭتۇستىك قازاقستان وبلىسى قازىعۇرت اۋدانىنىڭ قوساعاش اۋىلىندا مۇحاممەدالى قۇراق ەسىمدى 4 سىنىپتىڭ وقۋشىسى 3 جاستاعى قىزدى اجالدان قۇتقارىپ الدى. بۇل تۋرالى egemen.kz ءتىلشىسى حابارلادى. جۇرتشىلىققا باتىر بالانىڭ ەرلىگى تۋرالى حاباردى التىنتوبە اۋىلىنىڭ تۇرعىنى سەيدالى دۇيسەباي ۇلى جەتكىزدى. ول facebook الەۋمەتتىك جەلىسىندەگى پاراقشاسىندا وقيعانىڭ قاتتى نوسەردەن كەيىن  بولعانىن ايتتى. «تۇنىمەن توككەن جاۋىن اۋىل ءىشىن سەلدەتە وتە شىققان. سول تاسقىندا قوساعاش اۋىلىندا 3 جاسار قىزدى سۋ اعىزىپ ءبىراز جەرگە بارعاندا مىنا ءبىر قارشاداي بالا قۇتقارىپ الىپتى. قۇتقارىپ العاسىن ەسسىز جاتقان كىشكەنتاي ءبۇلدىرشىننىڭ كوكىرەگىن باسىپ, جۇتقان لاي سۋىن قۇسقىزىپتى. لاي سۋمەن بىرگە ءشوپ-شالام, اعاش بۇتالارى ءتۇستى دەيدى كورگەندەر. اۋىل تۇرعىندارى قارشاداي بالانىڭ ەرلىگىن اڭىز قىپ ايتىپ ءجۇر. بالانىڭ اتى مۇحامەدالى. 4 سىنىپتا وقيدى», دەدى ول. ءبىز وسىنى ەستي سالا بالانىڭ وزىمەن نەمەسە اكەسىمەن حابارلاسۋعا اسىقتىق. الايدا قوساعاش اۋىلىندا ۇيالى بايلانىس ناشار بولعاننان كەيىن ازىرشە سەيدالى دۇيسەباي ۇلىنىڭ حابارىمەن شەكتەلۋدى ءجون كوردىك. داستان كەنجالين. دەرەك, فوتو: سەيدالى دۇيسەباي ۇلىنىڭ facebook الەۋمەتتىك جەلىسىندەگى پاراقشاسى.