ەتىكشى قىز

ەتىكشىلىك – ەكىنىڭ ءبىرىنىڭ قو­­لىنان كەلە بەرمەيتىن كاسىپ. سونىڭ ىشىندە بۇل كاسىپكە نازىك جان­دى­لاردىڭ دەن قويۋى دا سيرەك. الايدا, كوڭىلىڭ قالاعان كاسىپكە ەشكىم دە كەدەرگى بولا المايتىنى جانە بار. تاڭنىڭ اتىسى, كۇننىڭ باتىسى ءبىز بەن تەبەندى, بالعا-شەگەنى جانىنا سەرىك ەتكەن نازىك جان جاننا قۇرمانعاليەۆا ەتىكشىلىكتى شەبەرلىك پەن اسا ىج­دا­عاتتىلىقتى, توزىمدىلىكتى, ناعىز ەڭبەكتى قاجەت ەتەتىن كاسىپ دەپ ەسەپتەيدى. ونىڭ ەتىكشى ماماندىعىن يگەر­گەنىنە 15 جىلدان استام ۋا­قىت بولدى. ادەتتە, ەر ازاماتتار عانا شۇعىل­داناتىن بۇل كاسىپتى مەڭ­گەرگەن ەتىكشى قىز «قاز­حروم «تۇك» اق في­ليالى – اقتوبە فەر­رو­قورىتپا زاۋىتى اكىم­شىلىك-شارۋاشىلىق بولىمىنە قاراس­تى اياق كيىم جوندەۋ شەبەرحا­ناسىندا ەڭبەك ەتىپ كەلەدى. «ەرىنبەگەن ەتىكشى بولادى» دەگەن قاعيدانى باستى نازاردا ۇستاعان جاننا ەتىكشىلىك كاسىپتىڭ قىر-سىرىن جاقسى مەڭگەرىپ, ابدەن ما­شىق­تانعان جان. زاۋىتتىڭ اياق كيىم جوندەۋ شەبەرحاناسى بولعان­دىقتان ماۋسىمعا بايلا­نىستى قىس مەزگىلىندە جۇمىس­شى­لاردىڭ بايپاقتارىن رەتكە كەلتىرۋ, جاز, كۇز ايلارىندا ەتىكتەرگە تابان جاپسىرىپ, جاماپ, جەلىمدەپ جوندەيدى. – ءبىز اۋلەتىمىزبەن ەتىكشىلىكتى كاسىپ ەتىپ كەلەمىز. مەنىڭ وسى كا­سىپتى مەڭگەرۋگە اعالارىمنىڭ ىقپا­لى زور بولدى. اعالارىم شىم­بولات, يسلام ەتىكشىلىك كاسى­بىنىڭ مايىن ءىشىپ, جىلىگىن شاققان ءوز ءىسىنىڭ شەبەرلەرى. ال شىمبولات اعامنىڭ ەتىكشىلىك كاسىپتى دوڭگەلەتىپ كەلە جاتقانىنا 20 جىل بولىپ قالدى. جەكە شەبەرحاناسى بار. سولاردىڭ ءىزىن جالعاستىرىپ, بار ءومى­رىمدى وسى كاسىپكە ارناپ, ءناسىبىمدى تا­ۋىپ ءجۇرمىن. وعان ەش وكىنبەيمىن. كەرىسىنشە, ەكىنىڭ ءبىرىنىڭ قولىنان كەلە بەرمەيتىن تياناق­تىلىقتى, شەبەر­لىكتى, شىدام­دىلىقتى تالاپ ەتەتىن وسى مامان­دىقتى يگەرگەنىمدى ماقتان تۇتامىن. مەن العاش رەت شىم­بولات اعامنىڭ اياق كيىم جوندەۋ شەبەر­حاناسىندا ەڭبەك ەتىپ, وسى سالاعا ماشىقتاندىم. قالامىزداعى ەلەكتريكتەر دا­يىندايتىن كوللەدجدىڭ تۇلەگىمىن. ماماندىعىم ەلەكتر مونتەرى بولا تۇرسا دا ەتىكشىلىكتى تاڭدادىم. 15 جىلدىق ءىس-تاجىريبەمدە ءجون­دەل­گەن اياق كيىمدەرگە سىن ايتىپ, رەنىش بىلدىرگەن تۇتىنۋشى بول­عان ەمەس. كەرىسىنشە, العىس ايتىپ كەتەتىندەردىڭ قاتارى كوپ. سون­دىقتان دا ەلدىڭ ىقىلاسىنا بولەنۋ مەن ءۇشىن ءبىر عانيبەت, – دەيدى ەتىكشى قىز جاننا. ەتىكشىلەردىڭ ەڭبەگى شىنىمەن دە باعالاۋعا تۇرارلىق. ويتكەنى, اياق كيىم جوندەۋ شەبەرحاناسىنا ءبىر كىرىپ شىققاننىڭ وزىندە اياق كيىم­دەردەن شىعاتىن جانە جاپسىر­مانىڭ جاعىمسىز يىستەرى ادام­عا جاي­سىزدىق تۋعىزاتىنى بەلگىلى. وسىنداي جايسىزدىققا قاراماس­تان ناپاقاسىن تاۋىپ, تۇتىنۋ­شىلاردىڭ كوڭىلىنەن شىعىپ وتىر­عان ەتىكشىنىڭ ەڭبەگى شىنىمەن باعا­لاۋعا تۇرارلىق. ءوز كاسىبىنىڭ شە­بەرى ءاردايىم شەبەرحاناعا كەلگەن زاۋىت­تىقتاردى جىلى شىرايمەن قارسى الىپ, كوڭىلىن تابۋعا تىرىسادى. ارىپتەستەرى دە جاننانىڭ وسى قاسيەتتەرىنە جانە ءوز كاسىبىن جەتىك بىلەتىنىنە سۇيسىنە قارايدى. «ءبىزدىڭ ەتىكشى قىز جاننا» دەپ ەركەلەتىپ, ماقتان تۇتادى. ساتىبالدى ءساۋىرباي, «ەگەمەن قازاقستان». اقتوبە وبلىسى.