ولجاس سۇلەيمەنوۆ سۇحباتتارى

توپتاستىرىلعان كىتاپتىڭ تۇساۋكەسەر ءراسىمى «ەكسپرەسس ك» گازەتىنىڭ رەداكتسياسىندا ءوتتى «ول جاس – ون مولودوي» دەپ اتالاتىن بۇل وزگەشە كىتاپتىڭ اۆتورى بەلگىلى جۋرناليست تىلەۋجان ەسىلباەۆ. جيناققا ونىڭ 2008 جىلدان باستاپ قازاقتىڭ اسا كورنەكتى جازۋشىسى, قوعام قايراتكەرى, ديپلومات, لينگۆيست ولجاس ومار ۇلى سۇلەيمەنوۆپەن سوڭعى جەتى جىل بويى جۇرگىزگەن سەگىز سۇحباتى كىرگەن ەكەن. ۋاقىتپەن بىرگە تى­نىس­تاعان زاماناۋي سۇحباتتار اۆتوردىڭ ءوزى قىزمەت اتقاراتىن رەسپۋبليكالىق قوعامدىق-ساياسي «ەكسپرەسس ك» گازە­تىندە ەدەل-جەدەل جاريالانىپ تۇر­عا­نىن زەيىندى دە بەيىلدى قاۋىم بىلەدى. بۇل سۇحباتتاردا جۇرتشىلىقتى تولعاندىرىپ جۇرگەن كوپتەگەن كوكەيكەستى ماسەلەلەردىڭ كەڭ اۋقىم­دا قامتىلعانى بايقالادى. كوزگە سۇيكىمدى, قولعا تولىمدى كوزايىم كىتاپتى العاش پاراق­تاعاندا تاقىرىپتاردىڭ وزىنەن-اق ولاردىڭ ۇلتتىق ادەبيەت پەن مادەنيەتتىڭ تاعدىرى, قازاق­ستاننىڭ الەمدە الار ورنى, ساياسات پەن تاريح, لينگۆيستيكا مەن ءتىلدىڭ دامۋى, جالپى ادەبيەت پەن قوعام حاقىنداعى ازاماتتىق ءھام اقىندىق ورەلى تولعانىستار ەكەندىگىن پايىمدايمىز. البەتتە, ولجاس سۇلەيمەنوۆتىڭ كەز كەلگەن ماسەلەدەگى پىكىر-پايى­مى, كوزقاراسى ەشكىمدى ەشقاشان بەيجاي قالدىرىپ كورگەن ەمەس.  مىنا سۇحباتتاردا الەمگە ايگىلى قالامگەردىڭ ءوزى بەل ورتاسىندا بولعان حح-ءححى عاسىرلاردىڭ وقيعا­لارىنا بەرگەن ءدال دە دايەكتى باعاسىن ءبىلۋ وقىرمانعا قىزىق بولماعى ءشۇباسىز. ويتكەنى, ولجەكەڭ سۇڭعىلا زەرگەرلىكپەن سونشالىقتى ءدال سيپاتتاعانداي, كىتاپ پەن ادەبيەتتىڭ ءمان-ماڭىزى جەكە ادام ءۇشىن عانا ەمەس, جالپى قوعام مەن ەل ءۇشىن قاشاندا ءبىرىنشى كەزەكتە, بىرەگەي ورىندا تۇرماق. تىلەۋجان ەسىلباەۆ وسى جايلاردى ايتا كەلە, ولجاس ومار ۇلىنا كىتاپتىڭ ءسۇيىنشى داناسىن ۇيىنە اپارىپ سىيلاعانىن, ول كىسى ەڭبەككە ىرزاشىلىق بىلدىرگەنىن جەتكىزدى. سونىمەن بىرگە, سۇحباتتاردىڭ قازاقشا نۇسقاسىنىڭ قوسا بەرىلۋى جيناقتى نەعۇرلىم تولىققاندى تولايىم ەتىپ, قۇندىلىعىن ارتتىرا تۇسكەن. اۆتور بۇدان ءارى سۇحباتتاردى قازاق تىلىنە تۇششىمدى ءارى جاتىق اۋدارىپ شىققان جۋرناليست ەسكەندىر ەرتايدىڭ ىلكىمدى ەڭبەگىنە العىس ايتتى. سونداي-اق, ۇلكەن عالىم, ولجاستانۋشى دەسەك جاراسىمدى, سافار ابدۋللونىڭ العىسوزى دە مول ماعلۇماتتار بەرىپ, مايەكتى ويلار توگىپ, كىتاپتى كور­كەيتىپ, مازمۇنىن اشىپ تۇرعانىن ايتقان ءلازىم. «ەكسپرەسس ك» گازەتى رەداك­تسياسىنىڭ باس ديرەكتورى ءادىلحان ءنۇسىپوۆ ولجاس سۇلەيمەنوۆ گا­زەتتىڭ ۇلكەن دوسى, تۇراقتى اۆتورى ءارى وقىرمانى ەكەنىن العا تارتىپ, اتالمىش جوبانىڭ وسى­لاي تاماشا ىسكە اسقانى وزدەرىن ماقتانىش سەزىمىنە بولەپ وتىرعانىن باسا ايتتى. ءارى رەداكتسيانىڭ ەۋرازيالىق توپپەن بىرگە كىتاپتىڭ شىعۋىنا دەمەۋشىلىك جاساعانىن كوپتىڭ قاپەرىنە سالدى. «كازاحستانسكايا پراۆدا» رەسپۋب­ليكالىق گازەتى» اق باسقارما ءتور­اعاسى الەكساندر تاراكوۆ, جۋر­ناليست سەرگەي لەسكوۆسكي جانە باسقا سويلەۋشىلەر اۆتوردى وسىناۋ ايتۋلى ەڭبەكپەن قۇت­تىقتاپ, ولجاس سۇلەيمەنوۆپەن جۇيەلى سۇحباتتار كىتابىنىڭ ۆا­شينگتوندا ءوتىپ جاتقان يادرولىق قاۋىپسىزدىك جونىندەگى سامميت قار­ساڭىندا شىق­قانىن, وسىناۋ كۇندەردە قازاقستان مەن اقش پرەزيدەنتتەرى نۇرسۇلتان نازارباەۆ پەن باراك وباما يادرو­لىق قاۋىپسىزدىك جانە تاراتپاۋ سالاسىنداعى ىنتى­ماقتاستىق تۋرالى بىرلەسكەن مالىمدەمە جاساۋىن جاقسىلىق جوراسىنا بالادى. ولجاس اقىن, ولجاس ازامات باسىندا تۇرعان «نەۆادا-سەمەي» قوزعالىسى تۇتاتقان ءۇمىت وتىنىڭ وسىلاي لاۋ­لاي تۇسكەنى عانيبەت قوي. الدا – سەمەي پوليگونى جابىلۋىنىڭ 25 جىلدىعى. ولاي بولسا, دارىندى جۋرناليست تىلەۋجان ەسىلباەۆتىڭ زاما­نىمىزدىڭ اقيىق اقىنى  ول­جاس سۇلەيمەنوۆپەن سۇحباتتار كىتا­بى ورتاق مۇراتقا ولجا سالعانى انىق. قورعانبەك امانجول, «ەگەمەن قازاقستان». استانا.