ساپار ءوڭىر حالقىمەن, ەتنومادەني بىرلەستىكتەرمەن كەزدەسۋدەن باستالدى. كوكشەتاۋداعى «بولاشاق سارايىندا» 400-گە جۋىق ادام – زيالى قاۋىم, شاعىن جانە ورتا بيزنەس وكىلدەرى, اقساقالدار, ءماسليحات دەپۋتاتتارى, دەنساۋلىق ساقتاۋ جانە ءبىلىم بەرۋ سالاسىنىڭ قىزمەتكەرلەرى, باسقا دا بەلسەندى ازاماتتار جينالدى.
القالى جيىندا ءسوز سويلەگەن ءماجىلىس توراعاسى ەرلان قوشانوۆ ەلىمىزدەگى قوعامدىق ديالوگتى جاڭا دەڭگەيگە كوتەرەتىن تۇبەگەيلى جاڭا ورگان – حالىق كەڭەسىنىڭ قۇرىلۋىنا ەرەكشە نازار اۋداردى.
«جاڭا كونستيتۋتسيا ارقىلى حالىق كەڭەسى ينستيتۋتى قۇرىلادى. ول قازاقستان حالقىنىڭ ورتاق مۇددەسىن بىلدىرەتىن ەڭ جوعارى كونسۋلتاتيۆتىك ورگان بولادى. اسسامبلەيانىڭ بارلىق ينفراقۇرىلىمى مەن بىرەگەي تاجىريبەسى ساقتالىپ, ءوز جۇمىسىن جالعاستىرادى. حالىق كەڭەسى وڭىرلەردى, ازاماتتىق قوعامدى جانە ەتنومادەني بىرلەستىكتەردى بىرىكتىرەدى. ياعني, حالىقتىڭ كوپەتنيكالىق ءۇنى ايقىندالا تۇسەدى دەگەن ءسوز. وسىلايشا, اسسامبلەيانىڭ ۇزاق جىلدار بويى جيعان تاجىريبەسىن پايدالانىپ, ءوز بەتىنشە زاڭنامالىق كۇن ءتارتىبىن قالىپتاستىراتىن ءبىرتۇتاس قۇرىلىم قالىپتاسادى», – دەپ اتاپ ءوتتى ەرلان قوشانوۆ.
ءماجىلىس دەپۋتاتى, «اۋىل» پارتياسىنىڭ توراعاسى سەرىك ەگىزباەۆ جاڭا كونستيتۋتسيانى قابىلداۋدىڭ تاريحي مانگە يە ەكەنىن, الەمدىك احۋال قۇبىلىپ تۇرعان ۋاقىتتا مەملەكەتىمىز تابيعي دامۋ كەزەڭىنە اياق باسقانىن ايتتى. دەپۋتاتتىڭ پىكىرىنشە, جاھاندىق وزگەرىستەرگە وراي, ەلىمىزدىڭ ورنىقتىلىعىن, تاۋەلسىزدىگىمىزدىڭ تۇراقتىلىعىن جانە الداعى ونداعان جىلدار بويى بىرتىندەپ دامۋدى قامتاماسىز ەتەتىن بەرىك ءارى زاماناۋي قۇقىقتىق ىرگەتاس قاجەت.
جەرگىلىكتى جۇرتشىلىق وكىلدەرى الداعى رەفەرەندۋم قوعامدى مەملەكەت باسشىسىنىڭ ستراتەگيالىق ماقساتتارىنا بىرىكتىرەتىنىنە نازار اۋداردى. وبلىستىق ءماسليحات دەپۋتاتى, كاسىپكەر ۋمار شونازاروۆ ءار ازامات ءۇشىن كونستيتۋتسيانىڭ ماڭىزدىلىعىن تولقۇجاتپەن سالىستىرۋعا بولاتىنىن ايتتى. ەگەر تولقۇجاتتا ادامنىڭ جەكە دەرەكتەرى كورسەتىلسە, كونستيتۋتسيادا بۇكىل حالىقتىڭ تاعدىرى مەن بولاشاعى قامتىلعان.
كواليتسيا مۇشەلەرىنىڭ وڭىردەگى ۆولونتەرلىك بىرلەستىكتەرمەن كەزدەسۋى دە مازمۇندى ءوتتى. ا.مىرزاحمەتوۆ اتىنداعى كوكشەتاۋ ۋنيۆەرسيتەتىندە وتكەن جيىن وبلىستىق ۆولونتەرلەر فورۋمىنىڭ اشىلۋىمەن تۇسپا-تۇس كەلدى. فورۋمعا 500-گە جۋىق ادام قاتىستى.
كەزدەسۋدە ءماجىلىس دەپۋتاتى, رەسپۋبليكالىق ۆولونتەرلىك قوزعالىستىڭ جەتەكشىلەرىنىڭ ءبىرى ۆەرا كيم جاڭا كونستيتۋتسيا جوباسىندا ۆولونتەرلىك قىزمەتتىڭ ماڭىزدىلىعىنا ءمان بەرىلگەنىنە توقتالىپ, جۇرتشىلىقتى قۇتتىقتادى. دەپۋتات اتاپ وتكەندەي, وسى ارقىلى اتا زاڭ جوباسىندا مىقتى مەملەكەت تەك بيلىك ينستيتۋتتارى عانا ەمەس, سونىمەن قاتار ءبىر-بىرىنە قولداۋ كورسەتۋگە دايىن ادامدارعا دا ارقا سۇيەيتىنى تۋرالى قاراپايىم, بىراق اسا ماڭىزدى يدەيا ايقىن كورىنىس تاۋىپ وتىر.
عىلىم جانە جوعارى ءبىلىم ءمينيسترى ساياسات نۇربەك پەن «اسسامبلەيا جاستارى» رەسپۋبليكالىق قوعامدىق بىرلەستىگىنىڭ توراعاسى تيمۋر جۇمىرباەۆ جاڭا اتا زاڭدا ادامي كاپيتالدىڭ دامۋى ەلدىڭ ستراتەگيالىق دامۋ باعىتتارىنىڭ ءبىرى رەتىندە تانىلاتىنىن اتاپ ءوتتى. بۇل مەملەكەت بىلىمگە, عىلىمعا جانە جاس ۇرپاقتىڭ مۇمكىندىكتەرىنە سەنىم ارتىپ وتىرعانىن كورسەتەدى.
«Eurasia Group Kazakhstan» كاسىپورنى الاڭىنداعى اشىق ديالوگ بارىسىندا قوعامدىق كواليتسيا مۇشەلەرى فەرمەرلەردىڭ بارلىق سۇراقتارىنا جاۋاپ بەردى. ءوز كەزەگىندە اگرارلىق سەكتور وكىلدەرى جاڭا كونستيتۋتسيا جوباسىندا ەڭبەكسۇيگىشتىك, پروگرەسس پەن ءبىلىم مەملەكەتتىڭ ىرگەلى قاعيدالارى رەتىندە بەكىتىلگەنىنە وڭ پىكىر ءبىلدىردى.
جاڭا كونستيتۋتسيا جوباسىنداعى ەڭبەك ادامىنىڭ مارتەبەسى «ENKI» جشس كەراميكالىق كىرپىش زاۋىتىنىڭ ەڭبەك ۇجىمىمەن كەزدەسۋدە تالقىلاندى.
ءماجىلىس دەپۋتاتى, «Respublica» پارتياسىنىڭ توراعاسى ايداربەك قوجانازاروۆ كونستيتۋتسيانىڭ جاڭا رەداكتسياسىندا قاۋىپسىز ەڭبەك جاعدايلارى, لايىقتى سىياقى تولەۋ جانە الەۋمەتتىك قورعاۋ قۇقىعى زاڭدىق نەگىزدە بەكىتىلەتىنىنە نازار اۋداردى.
ودان ءارى جالپىۇلتتىق كواليتسيا مۇشەلەرىنىڭ اقمولا وبلىسىنىڭ سپورت سالاسىنىڭ وكىلدەرىمەن كەزدەسۋى زەرەندى اۋدانىنىڭ مامانداندىرىلعان بالالار مەن جاسوسپىرىمدەردىڭ سپورت مەكتەبىندە ءوتتى. بۇل سپورت مەكتەبى زاڭسىز الىنعان اكتيۆتەردى قايتارۋدان تۇسكەن قاراجات ەسەبىنەن بوي كوتەرگەنىن ايتا كەتكەن ءجون.
باپكەرلەرمەن, سپورتشىلارمەن جانە سەكتسيا باسشىلارىمەن اڭگىمە بارىسىندا كواليتسيا مۇشەلەرى جاڭا كونستيتۋتسيا جوباسىندا ادىلەتتىلىك ۇعىمى العاش رەت مەملەكەت پەن بيلىكتىڭ جاڭارعان مودەلىنىڭ قاعيدالارىنىڭ ءبىرى رەتىندە بەكىتىلگەنىن اتاپ ءوتتى. كەزدەسۋدە جەرگىلىكتى سپورتشىلار بارلىعىنا تەڭ مۇمكىندىكتەر تۋعىزۋ, اسىرەسە, وڭىرلەردەن شىققان تالانتتى جاستاردىڭ دامۋى ءۇشىن ماڭىزدى مۇمكىندىك ەكەنىنە نازار اۋداردى.
اقمولا وبلىسىنىڭ تۋريزم جانە قولونەر سالاسى وكىلدەرىمەن كەزدەسۋدە اتا زاڭ دەڭگەيىندە تابيعاتقا قامقورلىق, ۇلتتىق مادەنيەتتى قولداۋ جانە شىعارماشىلىق ەركىندىكتىڭ ەرەكشە ماڭىزى ءسوز بولدى.
ءوز كەزەگىندە تۋريزم سالاسىنىڭ وكىلدەرى جاڭا كونستيتۋتسيا جوباسىندا ازاماتتار مەن مەملەكەتتىڭ مىندەتتەرى اراسىنداعى تەڭگەرىم قامتىلعانىنا نازار اۋداردى. ولار اتاپ وتكەندەي, ءاربىر قازاقستاندىقتىڭ دەربەس جاۋاپكەرشىلىگى ارقىلى ەلىمىزدىڭ قايتالانباس باي مۇراسىن بولاشاق ۇرپاققا امان جەتكىزە الامىز.
كەزدەسۋلەرگە قاتىسۋشىلاردىڭ بارلىعى 15 ناۋرىزداعى رەفەرەندۋمعا قاتىسىپ, جاڭا كونستيتۋتسيانى قابىلداۋعا داۋىس بەرۋگە نيەتتى ەكەنىن ءبىلدىردى.
ەلىمىزدىڭ سپورتشىلارى مەن ونەر يەلەرى جاڭا كونستيتۋتسيا جوباسىن قولدادى
