اعايىندى ماحروۆتار

جاساعان اشەكەي بۇيىمدار سۇرانىسقا يە اعالى-ءىنىلى ماحروۆتار – ون ساۋساعىنان ونەر تامعان ناعىز شەبەرلەر. ولاردىڭ اقمولا وبلىسىنا قاراستى بۋراباي اۋدانىندا جەكە شەبەرحانالارى بار. بۇگىندە ۇستالاردىڭ قولىنان شىققان اشەكەي بۇيىمداردى اۋىلداستارى تالاسا-تارماسا ساتىپ الادى. تاياۋدا كوكشەتاۋ قالاسىندا ىسكەر ايەلدەر فورۋمى ءوتتى. شاراعا كەلگەن قىز-كەلىنشەكتەر الدىمەن قولونەر شەبەرلەرىنىڭ بۇيىمدارى قويىلعان كورمەگە قاتىستى. سون­دا اعايىندىلاردىڭ قولىمەن جاسالعان اشەكەيلەرىنە قاتتى قىزىعىپ, ءتىپتى تالاسا ساتىپ الدى. سونداي-اق, ىسكەر ايەلدەر ارا­سىندا كۇندەلىكتى تۇرمىسقا قاجەتتى قولونەر بۇيىمدارىن ۇناتىپ, ساتىپ العاندار دا بار. اسىرەسە, نان ونىمدەرىن سالاتىن كارزەڭكەگە سۇرانىس مول بولدى. – ءبىز ءۇشىن قولونەر اتا كاسىبىمىز ىسپەتتەس. اكەمىز ۇنەمى بىزگە ءوزىنىڭ بىلگەنىن ۇيرەتۋدەن جالىققان جوق. ونىڭ ءوز شەبەرحاناسى بولعان. باۋىرىم ەكەۋمىز كۇن سايىن اكەمىز­دىڭ جانىنان شىقپاي, اشەكەي بۇيىمداردى, باسقا دا قاجەتتى زات­تاردى قالاي جاساۋ كەرەكتىگىن ۇيرەندىك, – دەيدى نيكولاي ماحروۆ. ايتا كەتەيىك, اعايىندىلاردىڭ ۇستاحاناسىنان شىققان ءاربىر بۇيىم جوعارى ساپاعا يە. سونداي-اق, اقمولالىقتار دا وتاندىق ءونىمدى قولداۋ ماقساتىندا وسى شەبەرلەردىڭ تاۋارلارىن كوپتەپ ساتىپ الۋدى ادەتكە اينالدىرعان. تالعات رايىمبەك, «ەگەمەن قازاقستان».