قازىعۇرت

قازاقتا: «قازىعۇرتتىڭ باسىندا كەمە قالعان. ول اۋليە بولماسا نەگە قالعان», – دەپ ايتىلاتىن ءاپسانا بار. نۇح پايعامباردىڭ كەمەسى قايىرلاعان دەيتىن اڭىز-اڭگىمەگە جۇرت قۇلاي سەنىپ, كوپ ادامدار مەرەكە كۇندەرى قاسيەتتى تاۋدىڭ باسىنا كوتەرىلەدى. بۇل جولى وڭتۇستىك قازاق­ستان وبلىسى كاسىپكەرلىك, يندۋس­تريالىق-يننوۆاتسيالىق دامۋ جانە تۋريزم باسقارماسىنىڭ ۇيىمداستىرۋىمەن 150 ادام «قازىعۇرت» شىڭىنا شىقتى.  ەل تاۋەلسىزدىگىنىڭ 25 جىلدىعى مەن «ناۋرىز» مەرەكەسىنە ارنال­عان شاراعا تاجىريبەلى الپينيستەرمەن قاتار, مەكتەپ وقۋ­شىلارى, جەرگىلىكتى جوعارى وقۋ ورىندارىنىڭ ستۋدەنتتەرى, اتا-انالار بالالارىمەن قاتىستى. قازىعۇرت توبەسىنەن قاراپ تۇرعان الاتاۋداي اسقاق ەمەس, تەڭىز دەڭگەيىنەن 1761 مەتردەي عانا بيىك. سوندىقتان, ونىڭ بيىگىن باعىندىرۋ قيىندىق تۋ­عىزبايدى. وڭتۇستىك قازاقستان وب­لى­سى كاسىپكەرلىك, يندۋس­تريالىق-يننو­ۆاتسيالىق دا­مۋ جانە تۋريزم باسقارماسىنىڭ باسشىسى مارات قاراباەۆ: «ەل تاۋەلسىزدىگىنىڭ 25 جىلدىعى ءار قازاقستاندىق ءۇشىن تورقالى توي. دۇنيە جۇزىندە ۇلتاراقتاي دا جەرى جوق, اركىمگە كىرمە بولىپ توزىپ جۇرگەن ۇلتتار دا بار. ال, حالقى شاعىن بولسا دا قازاقستان جەر كولەمى جاعىنان الەمدە العاشقى توعىزدىققا كىرەدى. مۇنى جاس ۇرپاق ءبىلىپ-ءوسۋى كەرەك. وتانىن قادىرلەۋدى, اتا-بابا اماناتىنا ادال, ءوز ەلىنىڭ پاتريوتى بولىپ ءوسۋى ءۇشىن وسىنداي باستامالار كەرەك دەپ ويلايمىن. بۇل ساپاردا بىزبەن بىرگە جاس بالالار دا ەرە ءجۇردى. ولاردىڭ جۇزىنەن وتانىنا دەگەن ماقتانىش, ەرتەڭگە دەگەن سەنىم, الاڭسىز بالالىق شاق كوردىك», – دەدى. باقتيار تايجان, «ەگەمەن قازاقستان». وڭتۇستىك قازاقستان وبلىسى.