يراندىقتاردىڭ ىقىلاس-پەيىلى ەرەكشە

«بارماساڭ, كەلمەسەڭ جات بولاسىڭ» دەيدى حالىق دانالىعى. قازاقستاندا ءتورت مىڭنان استام يراندىق اعايىن بار. تاعدىر تالايىمەن اتاجۇرتىنان اجىراعان ولار باقىتىن قازاق جەرىنەن تاپتى. ءوستى, ءوندى, قازاقتىڭ ەنشى الىسپاعان ءبىر بالاسىنداي ءسىڭىسىپ كەتتى. ولار يرانداعى تۋىستارىنا بارىپ تۇرادى. جاقىندا وڭتۇستىككە ىستىق ىقىلاس, تۋىسقاندىق سەزىمىن قاناتىمەن سۋ سەپكەن قارلىعاشتاي الىپ ۇشىپ, يران مەملەكەتىنەن ارنايى دەلەگاتسيا كەلدى. داستۇرگە اينالعان مادەني شارا وسىمەن سەگىزىنشى رەت ۇيىمداستىرىلعان. يران حورەوگرافيالىق «پەرسەن سوكا» بي ءانسابلىنىڭ ونەرىنە وڭتۇستىكقازاقستاندىقتار ءتانتى بولىپ, ريزاشىلىقتارىن ءبىلدىردى. يران يسلام رەسپۋبليكاسىنىڭ قازاقستانداعى ەلشىسىنىڭ كەڭەسشىسى ماسۋد شەيح زەينەدديننىڭ شىمكەنتكە ەكىنشى رەت كەلۋى ەكەن. اۋليە-امبيەلەرگە باي, تاريحى قالىڭ شىمكەنت شاھارى وعان ابدەن ۇناپتى. – قازاقتار وتە اقجارقىن, اقپەيىل حالىق. ءبىزدىڭ وسىنداعى تۋىسقاندارىمىز ءوزىن تاريحي وتانىندا جۇرگەندەي سەزىنەدى. مەملەكەت باسشىسى نۇرسۇلتان نازارباەۆقا دەگەن قۇرمەتى بولەك. ەلدەگى جاسالىپ جاتقان جاقسى ىستەرگە ۇلەس قوسىپ جۇرگەندەردىڭ قاتارىندا يران جۇرتىنىڭ دا بولۋى كوڭىلدى وسىرەدى. ءبىز تۋىسقان حالىقپىز, – دەيدى ول. قازاق ەلىنىڭ ىقىلاسىنا تويعان يراندىقتار تاعى دا كەلمەك نيەتتە. باقتيار تايجان, «ەگەمەن قازاقستان».