ءۇندى ءبيىنىڭ ۇيلەسىمى

كەشە ل.ن.گۋميلەۆ اتىنداعى ەۋرازيا ۇلتتىق ۋنيۆەر­سيتەتىندە «الماتى – قازاقستان», ءۇندى كلاسسيكالىق بي ورتالىعىنىڭ» 10 جىلدىق مەرەيتويىنا جانە اقما­رال قاينازاروۆانىڭ ونەر كەشىنە ورايلاستىرىپ, مەرەكەلىك باع­دار­لاما ءوتتى. بۇل كون­تسەرتتى قازاقستانداعى ءۇندىس­تان رەس­پۋب­ليكاسىنىڭ ەل­شى­لىگى تارتۋ ەتتى. كەش بارىسىندا تەك ءۇندى ءبيى عانا ەمەس, وعان قازاقتىڭ حالىق ءبيى قوسىلا ۇندەسىپ, مىڭ بۇرالعان بيشىلەردىڭ شەبەرلىگىن كورەرمەن قاۋىم ەرەكشە ىقىلاسپەن قابىلدادى. ءۇش تىلدە جۇرگىزىلگەن بۇل جوبا بي ونەرىن اسەرلەتە دارىپتەدى. بۇگىندە «الماتى – قازاقستان, ءۇندى كلاسسيكالىق بي ورتالىعى» – قازاقستانداعى ءۇندىس­تان ەلشىلىگىمەن, حالىقارالىق جانە قوعامدىق ۇيىمدارمەن, تەاتر­لارمەن, كونتسەرتتىك زالدارمەن, وقۋ ورىندارىمەن بىرلەسە جۇمىس جاساپ, شەبەرلىك سىنىپتارىن وتكىزۋدە, ءۇندىنىڭ كلاسسيكالىق ءبيى – ەرتەدەن كەلە جاتقان فيلو­سوفيالىق ونەر, وندا ءۇندى حالقىنىڭ ءومىر تىنىسى مەن قۇپيا سىرلارى باياندالادى. ايتا كەتەيىك, اتالمىش جو­بانىڭ جەتەكشىسى – قا­­­زاق­ستان­نىڭ ەڭبەك سىڭىرگەن قاي­راتكەرى, ءۇندى كلاس­سيكالىق بي ورتالىعىنىڭ ديرەكتورى اقمارال قاينازاروۆا. ول سونىمەن بىرگە بحاراتاناتيام ءۇندى كلاسسيكالىق بي ونەرىنىڭ جانە حورەوگرافيا ماگيسترى. اقمارال دەليدەگى ء(ۇندىستان, نيۋ-دەلي) مادەني قاتىناستار جونىندەگى ICCR ءۇندى كەڭەسىنىڭ بحاراتاناتيام ءبيىن كاسىبي ورىنداۋشىلارىنىڭ قۇرامىنا كىرەدى. «الماتى – قازاقستان, ءۇندى كلاسسيكالىق بي ورتالىعى»-2015 جىلى پولشادا وتكەن حا­لىقارالىق كونكۋرستىڭ گران-پري يەگەرى. قازاقستان مەن ورتالىق ازياداعى حالىقارالىق دەڭگەيدەگى تۇڭعىش دارا مەكەمە 2006 جىلدىڭ ناۋ­رىزىندا قۇرىلدى. ورتالىق جۇمىسىنىڭ نەگىزگى ماقساتى – ادامنىڭ ءتاني جانە رۋحاني الەمىن دامىتۋ, ءۇندى حالقىنىڭ كلاسسيكالىق ءبيى ارقىلى جەكە تۇلعانىڭ شىعارماشىلىق دەڭگەيىن انىقتاۋ جانە اعزانى ساۋىقتىرۋ, ءتۇرلى ۇلت وكىلدەرىن تۇسىنىستىك پەن ىنتىماققا شاقىرۋ, قازاقستان مەن ءۇندىستاننىڭ مادەني بايلانىسىن نىعايتۋ بولىپ تابىلادى. راۋشان تاۋىرحانقىزى, «ەگەمەن قازاقستان».