گرۋزين مۋزىكانتى 25 ساعات فورتەپيانودا وينادى

استانا. 31 ناۋرىز. گرۋزين پيانيستكاسى تامار بابيلۋا فورتەپيانودا توقتاماستان 25 ساعات ويناپ, ءوز ەلىنىڭ جاڭا رەكوردتىق ناتيجەسىنە قول جەتكىزدى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى. ەكسپەريمەنت گرۋزيا ۇلتتىق پارلامەنت كىتاپحاناسىنىڭ اكت زالىندا 28 ناۋرىز كۇنى ساعات 12:00-دە باستالىپ, 29 ناۋرىز كۇنى ساعات 13:00-دە اياقتالعان. وسى ۋاقىتتىڭ ىشىندە مۋزىكانت قىز ءوزىنىڭ شىعارمالارى مەن بەلگىلى كومپوزيتورلاردىڭ تۋىندىلارىنان 500-گە دەيىن كومپوزيتسيا ويناعان. بۇل گرۋزين پيانيستكاسىنىڭ وسى تۇرپاتتا رەكورد جاساۋداعى ءبىرىنشى تالپىنىسى ەمەس. تامار بابيلۋا مۇنداي ەكسپەريمەنتكە 2015 جىلى جۇگىنگەن ەكەن. الايدا, كوپ ۇزاماي قىزدىڭ قاتەرلى ىسىك اۋرۋىنىڭ ءۇشىنشى كەزەڭىمەن اۋىراتىنى انىقتالعان. وسى ناۋقاسىنا بايلانىستى تامار ەكسپەريمەنتتى توقتاتا تۇرعان. سەبەبى, ول مۇنىڭ كوپ كۇشىن الىپ كەتەتىن بولعان. «مەن 2015 جىلى گيننەستىڭ رەكوردىن جاڭارتقان بەنس پيتەردىڭ ويىنىن YouTube-تان كوردىم. وسىدان كەيىن مەن دە ءوزىمنىڭ الدىما سونداي ماقسات قويدىم. مەن سول كەزدە-اق توقتاۋسىز 25 ساعات ويناپ, رەكوردتى جاڭارتقىم كەلگەن. ول كەزدە ەڭ جوعارى كورسەتكىش 22 ساعات 10 مينۋت بولاتىن. الايدا, دەنساۋلىق جاعدايىما بايلانىستى بۇدان باس تارتۋعا تۋرا كەلدى. وسىدان كەيىن ۇندىستاندىق ءبىر ەر كىسى 127 ساعات 8 مينۋت كىدىرىسسىز ويناپ, رەكوردتى مۇلدەم وزگەرتىپ جىبەردى. مەن وسى رەكوردتىڭ وزىنەن اسىپ تۇسپەكشى ەدىم. بىراق دارىگەرلەرىم مۇنىڭ تاۋەكەلى تىم جوعارى ەكەنىن ايتىپ, دەنساۋلىعىما قاراۋىمدى سۇرادى. سوندىقتان مەن ءوزىمىزدىڭ ۇلتتىق رەكوردپەن شەكتەلگەندى ءجون كوردىم», – دەدى بيبيلۋا. گرۋزيا رەكوردتار فەدەراتسياسىنىڭ پرەزيدەنتى داۆيد بەگياشۆيلي بيبيلۋانىڭ رەكوردىن ناعىز ەرىك-جىگەردىڭ كورىنىسى رەتىندە باعالادى. تامار بابيلۋا فورتەپيانودا ءۇش جاسىنان بەرى ويناپ كەلەدى. ول - كوپتەگەن ۇلتتىق جانە حالىقارالىق كونكۋرستاردىڭ لاۋرەاتى. گرۋزياداعى مۋزىكا ورىنداۋشىلارىمەن جانە دىبىس جازبا ستۋديالارىمەن جۇمىس جاساسادى. تامار 2014 جىلدان بەرى Niutone ۆوكاليستەر توبىنىڭ پيانيستكاسى بولىپ كەلەدى. تالعات رايىمبەك. دەرەك: ras.kz. فوتو: dolcevita-magazine.com.