فوتو: egemen.kz/ ەرلان ومار
ولجاس بەكتەنوۆ مەملەكەت باسشىسىنىڭ ەل ەكونوميكاسىن ودان ءارى نىعايتۋ جونىندەگى العا قويعان مىندەتتەرىنە, قازاقستان حالقىنا جولداۋىندا بەلگىلەنگەن ستراتەگيالىق ماقساتتارعا سايكەس ۇكىمەت 2025 جىلى جۇيەلى وزگەرىستەرگە باعىتتالعان ءىس-شارالار قابىلداعانىن اتاپ ءوتتى.
«سالىق, تاريف جانە بيۋدجەت ساياساتىندا, تسيفرلىق جانە قۇرىلىس سەكتورلارىندا, سونداي-اق الەۋمەتتىك سالادا قابىلدانعان شەشىمدەر ەكونوميكانى دامىتۋعا توسقاۋىل بولىپ وتىرعان قۇرىلىمدىق ديسپروپورتسيالاردى جويۋعا باعىتتالدى. سالىق جانە بيۋدجەت رەفورماسى ۇلتتىق قوردان نىسانالى ترانسفەرتتەردى الماي-اق, ەلىمىزدىڭ ءۇش جىلدىق بيۋدجەتىن قالىپتاستىرۋعا مۇمكىندىك بەردى. ول 2028-ءشى جىلعا قاراي بيۋدجەت تاپشىلىعىن ىشكى جالپى ءونىمنىڭ 0,9%-نا دەيىن قىسقارتۋعا ىقپال ەتەدى. جەرگىلىكتى بيۋدجەتتەردىڭ رەسپۋبليكالىق بيۋدجەتكە تاۋەلدىلىگى 2025-ءشى جىلعى 50%-دان 2028 جىلى 34%-عا دەيىن تومەندەيدى», دەدى ولجاس بەكتەنوۆ.
جۇزەگە اسىرىلعان رەفورمالار كەزەڭىندە 2025 جىلدىڭ قورىتىندىسى بويىنشا ەكونوميكانىڭ ورنىقتى ءوسىمىن ساقتاپ قالۋعا قول جەتكىزىلدى. قۇندىق ماندە ءىجو-ءنىڭ ءوسۋى $20,1 ملرد-تى قۇرادى.
جالپى, 2025 جىلى ءىجو ءوسىمى 6,5%-دى قۇرادى. ەكونوميكالىق ءوسىمدى نەگىزگى سالالاردىڭ جەدەل دامۋى قامتاماسىز ەتتى. ونىڭ ىشىندە كولىك – 17,8%-عا, قۇرىلىس – 14,6%-عا, تاۋ-كەن ونەركاسىبى – 17,4%-عا, وڭدەۋ ونەركاسىبى – 12,2%-عا, ساۋدا – 26%-عا جانە اۋىل شارۋاشىلىعى – 5,9%-عا ءوستى.
ايتا كەتەيىك, ءدال قازىر پرەزيدەنت توراعالىعىمەن ۇكىمەتتىڭ كەڭەيتىلگەن وتىرىسى ءوتىپ جاتىر.
