عىلىمعا جول اشىق

جوعارى وقۋ ورنىنىڭ 82 جىلدىق اسا باي تاريحى قازاقستاننىڭ اكادەميالىق عىلىمى مەن جوعارى مەكتەبىنىڭ قارقىندى دامۋىمەن تىعىز بايلانىس­تى. قازۇۋ-دى ەلىمىزدىڭ بارلىق جوعارى ءبىلىم بەرۋ جۇيەسىنىڭ تىرەگى, بىلىكتى ماماندار ورداسى دەۋگە بولادى. ۋنيۆەرسيتەتتىڭ تۇلەكتەرى قازاقستاننىڭ جانە ونىڭ اۋماعىنان تىس جەرلەردەگى ءوندىرىستىڭ بارلىق سالالارىندا جەمىستى ەڭبەك ەتۋدە. بۇگىندە ءال-فارابي اتىنداعى قازۇۋ ەلىمىزدەگى كوش باستاپ تۇرعان جوعارى وقۋ ورىندارى اراسىنداعى قازاقستان رەسپۋبليكاسى پرەزيدەنتىنىڭ «ساپا سالاسىنداعى جەتىستىكتەرى ءۇشىن» سىيلىعىنىڭ ءبىرىنشى يەگەرى. Quacquarelli Symonds (QS, ۇلىبريتانيا) اگەنتتىگىنىڭ زەرتتەۋلەرىنە سايكەس, ءال-فارابي اتىنداعى قازۇۋ ءبىلىم بەرۋ باعدارلامالارى بويىن­شا 305-ورىنعا تۇراقتاندى. ءال-فارابي اتىنداعى قازاق ۇلتتىق ۋنيۆەرسيتەتى تمد ۋنيۆەرسيتەتتەرى اراسىندا ءۇشىنشى ورىندا. UNIFORM Project حالىقارالىق كونسورتسيۋم نەگىزىندە توكيو ۋنيۆەرسيتەتىمەن بىرىگىپ قازاقستان تاريحىندا ءبىرىنشى رەت سيرەك كەزدەسەتىن جوبا وتاندىق نانوسپۋتنيكتى ازىرلەۋ جۇمىستارى ءجۇرىپ جاتىر. بۇل ازىرلەمە باسقا دا جوبالار سياقتى ەكسپو-2017 كورمەسىندە تانىستىرىلماق. ۋنيۆەرسيتەتتىڭ ميسسياسى – ەلىمىزدىڭ قوعامدىق ءومىرى مەن عىلىمىنا, ەكونوميكانىڭ ماڭىزدى باعىتتارىنىڭ قارقىندى دامۋ ماسەلەلەرىن شەشۋگە باعىتتالعان زاماناۋي, جوعارى ءبىلىمدى, باسەكەگە قابىلەتتى ماماندار بۋىنىن قالىپتاستىرۋ. قازۇۋ قالاشىعىنىڭ بارلىق ايماعى Wi-Fi سىمسىز جەلىسىمەن قامتىلعان. ونىڭ كەز كەلگەن جەرىندە ءار ستۋدەنت ۋنيۆەرسيتەت بىرلەستىگىنىڭ جەلىسىندە جۇمىس ىستەۋمەن قاتار, ينتەرنەتكە اقىسىز قوسىلۋ ءمۇم­كىندىگىنە يە. سونىمەن قاتار, تاۋلىك بويى ىستەي­تىن 300 ورىندىق جاڭا ينتەرنەت-كافە جۇمىس ىستەيدى. قازۇۋ 400-دەن اسا شەتەل ۋنيۆەرسيتەتتەرىمەن ءوزارا ىنتىماقتاستىق تۋرالى كەلىسىمشارت جاساسقان. كەلىسىمشارت نەگىزىندە ماگيسترانت, دوكتورانتتارعا ەكى ادامنىڭ جەتەكشىلىك ەتۋ تاجىريبەسى كەڭىنەن ورىستەپ وتىر. ءبىر عىلىمي جەتەكشى قازاقستاننان بولسا, ەكىنشىسى – شەتەلدىك جوو-داعى بەلگىلى عالىم. وسىنىڭ بارلىعى قازۇۋ ستۋدەنتتەرى ءۇشىن حالىقارالىق دەڭگەيدە وقىپ, زەرتتەۋلەر جۇرگىزۋگە لايىقتى جول اشادى. رابيعا بولاتوۆا, ءال-فارابي اتىنداعى قازاق ۇلتتىق ۋنيۆەرسيتەتىنىڭ 4-كۋرس ستۋدەنتى. الماتى.