كەپىلدىككە الىنعان ەگيپەت ۇشاعىنىڭ جولاۋشىلارى بوساتىلدى

استانا. 29 ناۋرىز. ەگيپەت ازاماتى باسىپ العان Egypt Air اۆياكومپانياسى A320 ۇشاعى كيپردىڭ لارناكي اەروپورتىنا قوندىرىلدى. قۇقىق قورعاۋ ورگاندارى وكىلدەرى جۇرگىزگەن كەلىسسوزدەن كەيىن لاينەر جولاۋشىلارىنىڭ باسىم بولىگى بوساتىلدى. بۇل تۋرالى ريا «نوۆوستي» اقپارىنا سىلتەمە جاساعان egemen.kz حابارلادى. دەگەنمەن, قازىر بوساتىلعان جولاۋشىلار جونىندە ءارتۇرلى ماعلۇماتتار ايتىلىپ جاتىر. ولاردىڭ ءبىرى ەكىنشىسىنە قارسى كەلەدى. ۇشاق الەكساندريا – كاير باعىتىندا ۇشىپ شىققان. ول مىسىر استاناسىنا جەرگىلىكتى ۋاقىت بويىنشا 8:30 ساعاتتا قولۋعا ءتيىستى بولعان. الايدا, لاينەر ۇشىپ شىققانان كەيىن جارتى ساعاتتان سوڭ باقىلاۋ شەڭبەرىنەن شىعىپ كەتكەن. الدىن الا اقپار بويىنشا, ۇشاق بورتىندا 51 جولاۋشى مەن ەكيپاجدىڭ 7 مۇشەسى وتىرعان. ۇشاقتى قورقىتۋ جولىمەن باسىپ العان ەر كىسى كوماندير مەن جولاۋشىلاردى ءوزىنىڭ تالابى ورىندالماعان جاعدايدا بەلىنە بايلاپ العان جارىلعىش زاتىن ىسكە قوساتىنىن ايتىپ قورقىتقان. لاينەر كاپيتانى كايردەگى ديسپەتچەرگە ۇشاقتى ءبىر قاسكويدىڭ باسىپ العانىن عانا حابارلاپ ۇلگەرگەن. كەيىنگى ءتۇسىپ جاتقان اقپارلارعا قاراعاندا, 59 جاستاعى ەگيپەت پروفەسسورى كەيپىندەگى لاڭكەس ەندى وزىنە باسقا ەلدەن ساياسي باسپانا بەرۋدى تالاپ ەتىپ جاتقان كورىنەدى. رۋسلان يگىلىك. دەرەك, فوتو: ريا نوۆوستي.