حالىق جازۋشىسى ءابىش كەكىلباەۆتىڭ مۇراسى ساقتالادى

استانا. 29 ناۋرىز. ماڭعىستاۋ وبلىسىنىڭ اكىمى اليك ايدارباەۆتىڭ تاپسىرماسى بويىنشا قازاقستاننىڭ حالىق جازۋشىسى, كورنەكتى قوعام جانە ساياسي قايراتكەرى ءابىش كەكىلباەۆتىڭ مادەني مۇرالارىن ساقتاۋ جانە  شىعارمالارىن كوپشىلىككە تانىتۋ جونىندەگى ارنايى كوميسسيا قۇرىلاتىن بولادى. بۇل تۋرالى egemen.kz ءتىلشىسى حابارلادى. وبلىستىق مادەنيەت باسقارماسى كوميسسيا مۇشەلەرىن انىقتاپ, ءىس-قيمىل جوسپارىن جاساقتايدى. «ءابىش اعا تەك قانا ءبىزدىڭ ايماققا ەمەس, سونداي-اق بارلىق ەلگە تانىمال تۇلعا. ونىڭ اتى بۇكىل الەمگە بەلگىلى. بۇگىنگى ءبىزدىڭ ماقساتىمىز – بولاشاق ۇرپاققا ۇلاعاتتى مۇراسىن ساقتاپ, تانىتۋ. سول سەبەپتى كوميسسيا قۇرۋ جانە شارالاردى جوسپارلاۋ كەزدە مىندەتتى تۇردە ماڭعىستاۋ وبلىسى تۇرعىندارىنىڭ وي-پىكىرلەرى ەسكەرىلەدى», دەدى اليك ايدارباەۆ. ۇزاق مەرزىمدى جوسپاردى جۇزەگە اسىرۋ ءۇشىن جەرگىلىكتى بيۋدجەتتەن قاراجات بولىنەدى. داستان كەنجالين. دەرەك, سۋرەت: ماڭعىستاۋ وبلىسى اكىمىنىڭ ءباسپاسوز قىزمەتى.