ۇلتتىق ۆاليۋتاعا كوبىرەك دەن قويعان ماڭىزدى

ەلباسى نۇرسۇلتان نازارباەۆ ۇلتتىق بانكتىڭ توراعاسى دانيار اقىشەۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى. كەزدەسۋ بارىسىندا د.اقىشەۆ مەملەكەت باسشىسىنا ۇلتتىق بانكتىڭ قازىرگى قىزمەتى, سونداي-اق, ەلدىڭ قارجى نارىعىنداعى احۋال تۋرالى باياندادى. قازاقستان پرەزيدەنتى قارا­جات­تى قازىرگى ۋاقىتتا ۇلتتىق ۆاليۋتامەن ساقتاۋ حالىق ءۇشىن ءتيىمدى ەكەنىن ايتتى. – تەڭگە بويىنشا پايىزدىق مولشەرلەمە جوعارى, ال شەتەل ۆا­ليۋتاسىنداعى سالىمداردا ول الدە­قايدا تومەن. ەلىمىزدەگى بارلىق ساتىپ الۋ, ساتۋ وپەراتسيا­لارى ءجا­نە ەڭبەكاقى تولەمدەرى ۇلتتىق ۆا­ليۋتامەن جۇزەگە اسىرىلادى. نەگىز­گى تاۋارلاردىڭ باعاسى تۇراقتى. سون­دىقتان قاراجاتتى تەڭگەمەن ساق­تاۋ بارلىق جاعىنان ءتيىمدى. حالىق­تىڭ ۇلتتىق ۆاليۋتاعا كوبىرەك دەن قويعانى ماڭىزدى, – دەدى نۇرسۇلتان نازارباەۆ. د.اقىشەۆ ناۋرىز ايىندا ۆاليۋتا نارىعىنداعى احۋال تۇراقتال­عانىن اتاپ ءوتتى. – مۇناي باعاسى, ساۋدا سەرىك­تەستەرىمىز بولىپ سانالاتىن ەلدەردەگى ۆاليۋتا باعامى سياقتى پارمەندى سىرتقى ىقپالدار تۇراقتالدى. وسىنداي جاعدايدا بيىلعى اقپان ايىنان بەرى تەڭگە نىعايا باستادى, بۇل ۇدەرىس وسى ايدا جالعاستى. ءبىز ۇلتتىق ۆاليۋتا باعامىنداعى اۋىتقۋ ايتارلىقتاي تومەندەگەنىن جانە ونىڭ 1,6%-عا نىعايعانىن بايقاپ وتىرمىز, – دەدى ۇلتتىق بانك توراعاسى. سونىمەن قاتار, د.اقىشەۆ سالىمداردى دوللارسىزداندىرۋ ءۇردىسى باستالعانىن ايتتى. – ەل تۇرعىندارى مەن كاسىپ­ورىن­دار ۇلتتىق ۆاليۋتاداعى سا­لىم­دارىن بىرتىندەپ كوبەيتە باس­تادى. وسى ايدا بۇل ءۇردىس كۇرت جە­دەل­دەدى, – دەدى ۇلتتىق بانك توراعاسى. مەملەكەت باسشىسى كەزدەسۋ قورىتىندىسى بويىنشا بىرقاتار ناقتى تاپسىرما بەردى. سۋرەتتى تۇسىرگەندەر س.بوندارەنكو, ب.وتارباۆ.