قازاقستاندىق ءانشى

الەمگە ايگىلى مۋزىكانتپەن كەلىسىمشارت جاساستى Cee-Lo Green دەگەن لاقاپ اتپەن تانىمال بولعان توماس دەكارلو كوللەۆەي ەسىمدى امەريكالىق ءانشى, كومپوزيتور ەلىمىزدەگى تالانتتى انشىلەردىڭ ءبىرى ءالي وتەگەنوۆپەن ءبىر جىلعا كەلىسىمشارت جاساستى. ءالي تىڭدارماندارىنا Prince Ali NeAura دەگەن ەسىم­مەن بەلگىلى. ونەر جولىن ەڭ العاش الماتى قالا­سىندا ءجۇرىپ ءان ايتۋدان باستاعان. سونداي-اق, ءالي تەلە­ارنا­لارداعى ءتۇرلى شوۋ­لارعا قا­تى­سىپ, جارىستاردا باعىن سىناعان. بۇگىندە 28 جاستاعى ءانشىنى جاستار جاعى جاقسى تانيدى. ول تانىمال پروديۋسەر بايان ەسەنتاەۆامەن دە بىرلەسىپ جۇمىس ىستەگەن. الايدا, بۇل سەرىكتەستىك ۇزاققا سوزىلمادى. الدىنا ماقسات قويعىش ءالي كولىگىن ساتىپ, مۇحيتتىڭ ارعى بەتىنەن ءبىر-اق شىعادى. وندا ول رەستورانداردا, تۇنگى كلۋبتاردا ءان ايتىپ ءجۇرىپ, Cee-Lo Green-مەن تانىسقان. بويىنداعى تالانتىن بايقاعان اتاقتى ءانشى قازاق جىگىتىن Mothership Music پروديۋسەرلىك ورتالىعىنا شاقىرادى. ءبىر جىلعا جاسالعان كەلىسىمشارت بويىنشا ءالي وتەگەنوۆ ال­داعى ۋاقىتتا كليپ ءتۇسىرۋ, البوم جازۋ جۇمىستارىنا كىرىستى. رەپەر, پروديۋسەر توماس دەكارلو كوللەۆەي كوپشىلىككە Goodie-Mob حيپ-حوپ توبىنىڭ مۇشەسى رەتىندە تانىلعان. بۇگىندە بىرنەشە ءاننىڭ اۆتورى. شىعارماشىلىق جولىندا ءبىراز جەتىستىكتەرگە جەتكەن. ايان ءابدۋالي, «ەگەمەن قازاقستان».